Math 14

Thon de Jɔn Baptith

(Mak 6:14-29; Luk 9:7-9)

1Ɣɔn ë aköölkë, ke Ɣerod bɛ̈ny ë piŋ rin ke Yecu, 2go bänyke yɔ̈ɔ̈k an, “Raanë ee Jɔn Baptith, acï rɔ jɔt ë kɔc cï thou yiic, yen a looiyë luɔi rilkë në yen.”

3 # Luk 3:19,20. Ɣerod aacï Jɔn dɔm, ku duut, go tääu ë aloocic në biäk de Ɣerodiath, tiiŋ de Pilip mänhë. 4#Leb 18:16; 20:21. Acï Jɔn lɛ̈k en an, “Akënë päl yïn, luɔi bï en rëër ke yïn.” 5Ku aa de piɔ̈u luɔi nɛ̈k en en, ku aa riɔ̈c ë kut ë kɔc tei, aye kɔc tɔ ye tiët yen Jɔn.

6Na wën, acï akööl ë dhiëëthë Ɣerod tɔ ye aliith, ke nyan ë Ɣerodiath cɔ̈ŋ ë kɔc nïïm, go Ɣerod piɔ̈u miɛt. 7Na wën, ke lëk en lëk gutguut an, “Na de kë bä lip, ka bä gam yïn!”

8Ku nyanë, të cï ë kɔn wɛ̈ɛ̈t ë man, ke lueel an, “Gämë yɛn nɔm de Jɔn Baptith ee tënë ë atɛ̈nyic!”

9Na wën, ke melik dhiau piɔ̈u, ku në baŋ de gutguut wën cï lueel, ku në baŋ de kɔc rɛ̈ɛ̈r ë yen ëtök tëde cäm, ke yöök, an, bï gam en. 10Go raan tooc, an le Jɔn kiɛp nɔm wei ë aloocic. 11Go nɔmde bɛ̈ɛ̈i atɛ̈nyic, gɛ̈më duet, go jɔ lɛɛr të nu man. 12Go kɔckɛn ë piööcë bɛ̈n, bïk ku nömkï guöp, lek tɔ̈ɔ̈u, na wën, ke ke jɔ lɔ lek lɛ̈k Yecu.

Yecu Aciëëm Kuutdïït ë Kɔc

(Mak 6:30-44; Luk 9:10-17; Jɔn 6:1-14)

13Na wën, acï Yecu ë piŋ ke jël ëtɛ̈ɛ̈n ë abël, le ë jɔ̈ɔ̈ric ëtök, ku të cï kuut ke kɔc ë piŋ, ke biɔthkï cök, ke ke bɔ̈ bei ë wuötiic aciɛthkï ë kecök. 14Go Yecu lɔ biic, ku tïŋ kut dïït ë kɔc, ago piɔ̈u kok ke keek, ku tɔ kɔc dem kɔc tök ë keyiic.

15Na ɣɔn thëën, ke kɔckɛn ë piööcë ë ke bɔ̈ tëde yen, bïk ku luelkï, an, “Ëtënë ee jɔ̈ɔ̈ric, ku akɔ̈l ë guɔ thëi, yɔ̈ɔ̈kë kut ë kɔc, an, bïk jäl, lek ë bɛ̈i yiic, lek rö ɣɔ̈c këcam.”

16Go Yecu ke yöök an, “Acïkï bï dhil jäl, week, miackï keek ë këcamkï.”

17Gokï lueel an, “Wok de kuïïn cï pam kadhïc tei ee tënë, ku rec kaarou.”

18Go lueel an, “Yiënkï ke yɛn.” 19Go kut ë kɔc yɔ̈ɔ̈k an, “Bïk nyuc ë wal nïïm, ku nöm kuïïn cï pam kadhïc, ku rec kaarou, go nhial lieec, ku lueel, an, “Thieithieei, go kuïïn wääk yiic, ku gëm ke kɔcpiööcë, go kɔcpiööcë ke gäm kut ë kɔc. 20Gokï cam kedhie, abïk kuɛth. Ku kuanykï ka lɔ thueithuei, ka cï kɔc both, agokï diööny thiɔ̈ɔ̈ŋ kathiëër ku rou. 21Kɔc wën cäm aake cït agum kadhïny de röör, ku nu diäär ku mïth ayadäŋ.

Yecu Acath ë Pïïu Nïïm

(Mak 6:45-52; Jɔn 6:15-21)

22Na wën, ke Yecu dhil kɔckɛn ë piööcë tɔ lɔ ë abëlic ënɔnthiinë, bïk lɔ lɔŋtui ë yenɔm tueŋ, të löök en kuut ke kɔc tɔ jël. 23Na wën, acï kuut ke kɔc tɔ jël, ke lɔ nhial ë kuurdït nɔm ëtök, le lɔ̈ŋ. Na ɣɔn thëën, ke tɔ̈u ëtɛ̈ɛ̈n ëtök. 24Ku nu abël ë wɛ̈ɛ̈ric cil ënɔɔnë, ë lɔ jäŋjäŋ në apiöök, apëën yom.

25Na wën, të kɔɔrë piny nɔn ŋeep en rɔt, ke Yecu lɔ të nu keek ke cath ë pïïu nïïm. 26Na wën, acï kɔcpiööcë ye tïŋ ke cath ë pïïu nïïm, ke ke päu piɔ̈ɔ̈th, agokï lueel, an, “Ee jɔk,” agokï kiu në riɔ̈ɔ̈c.

27Go Yecu jam ke keek ënɔnthiinë, lueel an, “Pälkï röt piny, ee yɛn, duökï riɔ̈c!”

28Go Petero puk nɔm an, “Bɛ̈ny, tën ee yen yïn, ke yï yöök ɛn ke ya bï lɔ tëde yïn ë pïïu nïïm.”

29Go lueel an, “Bä. Na wën, acï Petero bɛ̈n biic ë abëlic, ke cath ë pïïu nïïm, an, le tëde Yecu. 30Na wën, acï yom tïŋ adït, ke riɔ̈c, go duɛ̈ɛ̈r dïïr, ku jɔ cööt, an, “Bɛ̈nydït, luäk ɛn.”

31Go Yecu ecin riny ënɔnthiinë, dɔm, ku yöök an, “Yïn ee raan dɛk ë gäm, eeŋö ë yïn piɔ̈u wïl ë kaamic?”

32Na wën, acïk bɛ̈n abëlic, ke yom kääc. 33Go kɔc nu ë abëlic bɛ̈n bïk ku lamkï, luelkï an, “Ee yic, yïn ee Wën ë Nhialic.”

Yecu Atɔ Kɔc de Gup Juäi Waar në Genetharet

(Mak 6:53-56)

34Ku të cï kek ɣet lɔɔk, ke ke bɔ̈ piny de Genetharet. 35Na wën, acï kɔc ke paanë e ŋic, ke ke tooc kɔc ë pinyë nɔm ëbɛ̈n, lek kɔc tök bɛ̈ɛ̈i të nu yen kedhie, 36agokï lɔ̈ŋ nɔn bï kek lupɔde jak thok tei, go kɔc ëbɛ̈n kɔc ë jak en agokï gup waar ëliŋliŋ.

Currently Selected:

Math 14: dip-JPB

Highlight

Copy