Jol 2
2
Bɛ̈n ë Kɔyɔm ee Jäny në biäk de Kööl ë Bɛ̈nydït
1Kuɔthkï kaaŋ në Dhiɔn,
lɛ̈kkï kɔc në kuurdiën ɣeric nɔm.#2:1: kuur ɣeric: Kuur de Dhiɔn (tïŋ Aber de Wël).
Takï kɔc cieŋ piny lɛthë kedhie.
Kööl ë Bɛ̈nydït ë guɔ thiɔ̈k.
2Abï ya kööl ë mɔ̈ɔ̈th ku cuɔl,
ku ye kööl ë luät kööl col ë cut.
Rem dïït de tɔŋ ë kɔyɔm abï bɛ̈n,
ke cï piny paat cït run ë piny ee kur mɔ̈ɔ̈r nïïm.
Rem dïït ril kënë kɔn tïŋ,
ku acïn kë bï bɛ ciët en anande.
3Mac ee käŋ nyop në kenïïm tueŋ,
piny ee tɔ̈c cï dom de Eden në kenïïm tueŋ,
ku në kecök ciëën ee döŋ ke ye jɔ̈ɔ̈r baaŋ.
Acïn kë ye ban në kecin.
4 #
Nyu 9:7-9. Ayek piny baap cï jöŋgöör,
ku yek riŋ cï jöŋgöör ke tɔŋ.
5Ku awuɔɔuden të kɛɛc kek kur nïïm,
acït awuɔɔu de abëël ke tɔŋ,
ayek teny cït many nyop wal ril.
Ku yek röt kueer cï rem de tɔŋdïït cï rɔ kiëët, ë biäk de tɔŋ.
6Kɔc ayek piɔ̈ɔ̈th jiɛth të cïï kek thiɔ̈k,
ku tiëc riɔ̈ɔ̈c në kenyïïn kedhie.
7Ayek lɔ thïn cït jööt ke tɔŋ,
ku rueckï kɛ̈l cï rem de tɔŋ.
Ayek cath ke ke lɔ tueŋ kedhie,
ku acïkï röt ee yal kueer,
8acïkï kecök ee dɔ̈ɔ̈r kapäc, ŋɛk ee cath tëde.
Ayek tëëk në tɔɔŋ yiic,
ke cïn kë tɔ keek kääc.
9Ayek pänydït bäk,
ku riŋkï në kalde nɔm,
ayek ɣööt ruec nïïm,
ku tëkkï në awëër nyïïn cït man ë cuɛ̈ɛ̈r.
10 #
Nyu 8:12. Piny ee rɔt nieeŋ në kenïïm tueŋ,
ku lɛthë tënhial.
Akɔ̈l kekë pɛɛi acïk cuɔl,
ku kuɛl acïkï be riau.
11 #
Nyu 6:17. Bɛ̈nydït ee rel në rem de tɔŋde nɔm tueŋ.
Rem de tɔŋ ee löŋde riëëu
ajuëckï ku arilkï.
Kööl ë Bɛ̈nydït ee kööldïït tuc thok!
Eeŋa bï ye lëu në guöm?
Cɔ̈t de Puŋëpiɔ̈u
12Go Bɛ̈nydït lueel an, “Agut cï ënɔɔnë,
puɔ̈kkï wenïïm Ɛn në wepiɔ̈ɔ̈th ëbɛ̈n,
në reec de cäm, ku dhuöör, ku dhiëëu.
13Takï piɔ̈ɔ̈thkuön cï dhuɔɔŋ nyooth dhiën ë piɔ̈u,
Rɛ̈t ya wek lupɔɔ rɛt yiic acïï käŋ bï thöl.
Puɔ̈kkï röt Bɛ̈nydït Nhialicdun.
Në luɔi Yen adhuɛ̈ŋ ee piɔ̈u kok.
Acie dap gɔ̈th, ku ee nhiëër agɔk nyuɔɔth,
ee kɔc dap päl karɛc ku cïï kɔc lui këtuc.
14Eeŋa ŋic en, tɛk däŋ, duëër Bɛ̈nydït Nhialicdun yenɔm waar,
ku thieei week në rɛɛp juëc.
Ku ëtɛ̈ɛ̈n aduɛ̈ɛ̈rkï gäm miɔ̈c ë rap ku miɔ̈c ye dek.
15Kuɔthkï kaaŋ në kuur ë Dhiɔn nɔm,
caalkï thɛ̈k, ku calkï amatnɔm ɣeric!
16Matkï kɔc nïïm,
ku takï akutnɔm ɣeric,
määtkï röördït nïïm,
ku mïth kor,
ayï mïth thuët.
Takï monythiëk nyiëëŋ ɣönde piny,
ku bɔ̈ nyan kaman bei ɣönde.
17Ku takï bäny ke kake Nhialic läŋ,
bäny ee Bɛ̈nydït luööi në kaam de yïk kekë Luaŋdït.
Ë ke dhiau ku lɛ̈ŋkï:
an, “Kok piɔ̈u we kɔcku, Bɛ̈nydït.
Du kɔc ke nɔmdu tɔ biɔn gup, du ke bï tɔ ye kääŋ yup në juööriic.
Acïï rɔ̈ŋ bï kɔc aa lop an, “Nu Nhialicdu ë nou?”
Nhialic abe Piny tɔ Lok
18Ku ëtɛ̈ɛ̈n, Bɛ̈nydït abï piɔ̈u bɛ gɔ̈ɔ̈i në biäk de pinyde.
Ku be piɔ̈u kok kekë kɔcke.
19Ku abï puk nɔm an,
“Wek gäm keek rap,
ku mɔ̈n cï piac dhiim,
ku miök bï week lëu arëët.
Ku wek cä bï bɛ tɔ dɔl ë juöör gup anandun.
20Ku rem de tɔŋ de kɔyɔm wään bɔ̈ të lɔ rut, abä cuɔp wei tëmec ke week,
yɛn bï kɔ̈k ɣɛɛt në jɔ̈ɔ̈ric tëril.
Abïk nïïm lɔ gut në Wɛ̈ɛ̈r de Amilɔ kɔ̈u baŋ të lɔ aköl amiäk,
Ku ka thïk kecök ciëën, abïk ɣet në wɛ̈ɛ̈r tɔ̈u të lɔ aköl athɛ̈i.
Aŋuäc de gupken abï dït.
Abä ke riɔ̈ɔ̈k në baŋ de kajuëc cïk luöi week.
21Du riɔ̈c yïn piny,
miɛtëpiɔ̈u ku dɔl arëët,
në biäk de kajuëc cï ë Bɛ̈nydït luöi week.
22Duökï riɔ̈c läi roor.
Ɣään ke nyuäth nu ë jɔ̈ɔ̈ric acïk bɛ tɔ̈c,
tiim acïk bɛ luɔk në mïth,
yï enap ayï ŋaap acïk bɛ luɔk arëët aya.
23Miɛtkï piɔ̈ɔ̈th kɔc ke Dhiɔn,
dalkï në kë cï Bɛ̈nydït Nhialicdun luöi week.
Acï deŋ dap tɔ këër week në ɣɛɛr de yenpiɔ̈u.
Acï dëŋ dït bɛ tɔ tueny cït man ɣɔn tueŋ:
dëŋ yaak, ku dëŋ anyɔ̈ɔ̈c.
24Ku yiukun abïk thiäŋ në rap,
ku thiäŋ tönykun abïk nïïm lɔ wei në mɔ̈u ku miök.
25Wek bä cuöl kakuön cï riääk
në run ke luny de kɔyɔm, wään cï rɛɛpkun cam.
Ee Yɛn ë tuc week ee rem de tɔŋë.
26Ka wek bï nïïm bɛ dɛ kacaam bï we kueth.
Ka wek bï Bɛ̈nydït Nhialicdun bɛ lɛc nɔm,
Raan cï we luöi kake gäi.
Kɔckï acïï keek bï bɛ biɔɔn gup ananden.
27Yen abä wek en jɔ ŋic nɔn nu Yɛn ë weyiic, wek Yithriɛl,
ku ŋiɛckï nɔn Yan Bɛ̈nydït Nhialicdun Yatök
acïn raan däŋ pei.
Kɔckï acïï keek bï bɛ biɔɔn gup ananden.
Kööl ë Bɛ̈nydït
28“Ku në ee kakë cök, Yɛn bï Wëikï luööŋ në kɔc gup kedhie,
ka wɛ̈ɛ̈tkun, ayï duetkun abïk käŋ aa caar,
röördïtkun abïk aa nyuöth,
ku tïŋ dhuökkun nyuuth.
29Ayï lïïmkï aya, nɔn yek röör, ku nɔn yek diäär,
abä ke luöŋ gup Wëikï në aköölkë yiic.
30“Yɛn bï kagɛ̈iyë ke looi ee köölë
paannhial ku piny,
abï dɛ riɛm ku mac, ku piööl ë tol.
31 #
Math 24:29; Mak 13:24,25; Luk 21:25; Nyu 6:12,13. Akɔ̈l abï cuɔl,
ku pɛɛi abï thiɛth cït riɛm,
të kën ë kööldïït de riɔ̈ɔ̈c guɔ bɛ̈n, kööl ë Bɛ̈nydït.
32 #
Luɔi 2:17-21. #Rom 10:13. Ku ëtɛ̈ɛ̈n, raan ëbɛ̈n, raan ee Bɛ̈nydït cɔɔl rin, abï kony wëi.
Në biäk bï yen dɛ kuny de wëi në kuur ë Dhiɔn nɔm, ku Jeruthalem,
cït man cïï Bɛ̈nydït ye lueel an,
“Kɔc kɔ̈k abïk poth ë Jeruthalem, kɔc cä ke lɔc abïk pïïr.
Currently Selected:
Jol 2: dip-JPB
Highlight
Copy
Compare
Share
Want to have your highlights saved across all your devices? Sign up or sign in
The Bible in Jieeng de Padang © The Bible Society in South Sudan, 2011.
