Bɛ̈n 29

Lööŋ tɔ Aron ee Bɛ̈ny de Kake Nhialic kekë Wɛ̈ɛ̈tke

(Leb 8:1-36)

1“Ku kë bä looi kï në gɛm bï yïn Aron gam kekë wɛ̈ɛ̈t bïk Ɛn luööi ke ke ye bäny ke kake Nhialic. Nöm miɔɔr atiëëk tök, ku nyök amɛ̈l kaarou cïn kë dak në kegup. 2Ku thal kuïïn cï pam në awany nyuäŋ. Ku thal kak nyuäŋ në miök de olip. Ku thal bethkawith nyuäŋ cï tɔc kɔ̈u në miök. Loi keek në awany de agamɔ lɔ mot. 3Ku tääuwë keek në diöny tökic ku bɛ̈ɛ̈iyë keek në diönyic, bɛ̈ɛ̈iyë miɔɔr ëtök ku nyök amɛ̈l kaarou. 4Ku bɛ̈ɛ̈iyë Aron në paany de mät thok kekë wɛ̈ɛ̈tke, ku wak keek në pïïu. 5Ku jɔ Aron yiëk kɔ̈u lupɔɔ ke bääny de kake Nhialic. Yiëkë kɔ̈u lupɔ, ku ajïpɔ, ku alulut ee lɔ në ajïpɔ kɔ̈u, ku lupɔ de yɔu, ku lupɔ de duöt ë yic. 6Ku dɛ̈ɛ̈rë nɔm lupɔ de dër ë nɔm. Ku duötë nɔm göl ɣeric. 7Ku nöm miök de tɔc, ku wälë në yenɔm tɔc yïn en.

8“Bɛ̈ɛ̈iyë wɛ̈ɛ̈tke, ku yiëkë kekɔ̈ɔ̈th aluluut. 9Ku dut keyiic në lupɔɔ ke duöt ë yic. Ku yiëkë kenïïm atɛ̈ɛ̈ny. Yen luɔi bïï yïn keek tɔ ye bäny ke kake Nhialic ka. Ku luɔi de kake Nhialic abï jɔ aa këden ë caaŋden.

10“Ku bɛ̈ɛ̈iyë miɔɔr ë paany de mät thok. Ku tɔ Aron tɛ̈ɛ̈u e cin ë miɔɔr nɔm kekë wɛ̈ɛ̈tke. 11Ku näk miɔɔr ëtɛ̈ɛ̈n në paany de mät thok në Yanɔm. 12Ku jak riɛm de miɔɔr në riöp nɔm, ku tɔc yïk tuŋ. Ku wälë riɛm cï döŋ piny në yïk thar piny. 13Ku nöm kɔɔl yiëëc ëbɛ̈n, kɔl ë yäc ku cïïn, ku nöm cuäny, ku rook kaarou në kɔɔlken, ku nyop keek në yïk nɔm, ke ye miɔ̈cdï. 14Ku nyop rïŋ ë miɔɔr ë wut këc, ayï biöŋde, ayï cïïnke. Ku kënë ee miɔ̈c de kërac bï karɛc ke bäny ke kake Nhialic nyaai.

15“Ku nöm nyɔɔŋ tök në nyökiic, ku tɔ Aron tɛ̈ɛ̈u e ciin ë yenɔm kekë wɛ̈ɛ̈tke. 16Ku näk, ku nöm riɛmde ku wiɛ̈ɛ̈thë në biäk ke yïk kaŋuan. 17Ku tɛmë nyɔk në thïïm, ku wak cök, ku cïïn, ku mat keek në nɔm, ku tääuwë keek në rïŋiic. 18#Epe 5:2; Pil 4:18. Ku nyop nyɔk ëbɛ̈n në yïk nɔm, ke ye miɔ̈c ye nyuöp Bɛ̈nydït, atuɔ̈mde ee Ya miët piɔ̈u.

19“Ku nöm nyɔɔŋ däŋë, ku tɔ Aron tɛ̈ɛ̈u e ciin ë yenɔm kekë wɛ̈ɛ̈tke. 20Ku näk, ku nöm riɛmdɛn biäk tɔc yïn Aron yïnh cuëc thok nhial. Ku tɔc yïth ke wɛ̈ɛ̈tke thook. Ku tɔc riöpkɛn butbut de ciin cuëëcken ëbɛ̈n. Ku tɔc riöp butbut ke kecök kedhie. Ku wälë biäk de riɛm cï döŋë në biäk ke yïk kaŋuan. 21Ku nöm biäk de riɛm nu në yïk nɔm. Ku nöm miök thiinakäŋ në miök ë tɔc, ku wïïthë në Aron guöp kekë lupɔɔke, ku wïïthë biäk në lupɔɔ ke wɛ̈ɛ̈tke gup, ku yen ke lupɔɔke abï yiic ɣɛɛr, ku jɔ Ya bɛ̈n gäm Aron kekë wɛ̈ɛ̈tke.

22“Nöm kɔɔl ke nyɔk, kɔl ë yɔ̈l, ku kɔl ë yäc, ayï kɔl ë cïïn. Ku nöm biäk piɛth ë cuäny, ku rook kaarou në kɔl de kekɔ̈ɔ̈th. Ku nöm ɣäm cuëc (në luɔi yen nyɔɔŋ tɔ yë kɔc ee bäny ke kake Nhialic). 23Ku nöm kuïn cï pam tök, ku kak tök, ku bethkawith në diöny yic. 24Ku tääuwë keek në Aron cin kekë wɛ̈ɛ̈tke. Ku tɔ ke gëmkï Yɛn ke ke ye miɔ̈c de anyuɔɔk. 25Ku jɔ ke bɛ̈n nööm në kecin, ku nyop keek në yïk nɔm në miɔ̈c ye nyop ëtök. Atuɔ̈mde abï Ya miët piɔ̈u.

26“Ku nöm aguöt nɔm ë nyɔk, ku gämë Yɛn ke ye miɔ̈c de anyuɔɔk. Ku aguöt nɔm yen abï aa biäkdun.

27“Të tɔ raan ee bɛ̈ny de kake Nhialic, ke aguöt nɔm kekë ɣäm ë nyɔɔŋ ë näk ë ke gëmë Yɛn ke ye miɔ̈c de anyuɔɔk. Ku pucë keek bei bïk aa kake bäny ke kake Nhialic. 28Kënë ee löŋ cä bï waar. Të cïï kɔckï miɔ̈c de mät nɔ̈k, ke aguöt nɔm kekë ɣäm de kë ë näk ee kake bäny ke kake Nhialic. Yen miɔ̈c bï kɔc aa gäm Ɛn ka Yɛn Bɛ̈nydït.

29“Wadäŋ të cïï Aron thou, ke lupɔɔ ɣeriic ke Aron, lupɔɔ ke bääny de kake Nhialic ë ke gëmë keek wɛ̈ɛ̈tke, bïk keek aa cieŋ të cïï ke tɔ ee bäny ke kake Nhialic. 30Wën de Aron bï lɔ̈ɔ̈k gäm luɔi de wun ke ye bɛ̈ny de kake Nhialic yen abï lupɔɔ ke Aron aa cieŋ, ku le yen ke tëɣeric në Paany de Mätic. Abïï keek aa cieŋ në nïniic kadhorou. 31Nöm rïŋ de nyɔɔŋ cï nɔ̈k tɔ Aron ee bäny ke kake Nhialic kekë wɛ̈ɛ̈tke, ku thal tëɣeric. 32Ku tɔ cuetkï në paany de mät kedhie, thök ayï kuïïn cï pam cï döŋ piny ë diöny yic. 33Abïk kakë aa cam në luɔi ye kek kak ë looiyë atɛɛm, bïï ë keek tɔ ye bäny ke kake Nhialic, ku ee keek kapäc kek abï këcamë aa cam në baŋ yen këcam ɣeric. 34Pëk ë kë cï döŋ piny ëbɛ̈n, nɔn yen rïŋ ku nɔn ee yen kuïïn cï pam, ke ɣɔ̈kë mac, acïï bï bɛ cam në luɔi yen kë ɣeric.

35“Luöiyë Aron ka cä lɛ̈k yïn ëbɛ̈n kekë wɛ̈ɛ̈tke në nïniic kadhorou. 36Ye miɔɔr nɔ̈k ke ye miɔ̈c de kërac në aköölkë yiic kadhorou në këde atɛɛm. Ku yïk abä luöi miɔ̈c de kërac, ke ye kë teem ë yen, ku tɔc yïk në miök de olip ke bï yic ɣɛɛr. 37Loi atɛɛm de yïk në nïniic kadhorou, ku ëtɛ̈ɛ̈n, yïk abï yic jɔ ɣɛɛr aläl, ku raan lɔ ye jak ku nɔn ee yen kë jak en, ka abï riɛl de ɣɛɛrde yicde ye luöi kërac.#29:37: bïï riɛl de ɣɛɛrë yic ke riɔ̈ɔ̈k: Aa ye lueel an kɔc ayï käŋ aduëërkï riääk të cï kek kë ɣeric jak.

Miɔ̈c de Aköölnyïïn ëbɛ̈n

(Kuɛ̈n 28:1-8)

38“Ye nyök amɛ̈l kaarou gam aköölnyïïn ëbɛ̈n ë yïk nɔm, nyök amɛ̈l ee ruöön tök. 39Ye nyɔɔŋ tök gam miäk adurduur, ku gamë däŋë thëën. 40Ye nyɔɔŋ tueŋ gam kekë kë ye them athiäŋ kekë aɣar lɔ mot cï liääp kekë miök. Ku miaacë biäk de mɔ̈u piny ke ye miɔ̈c. 41Ku gamë nyɔɔŋ ye nyök rou thëën kekë miɔ̈c ë rap cït miɔ̈c wën amiäk ke cï liääp ë miök, kekë mɔ̈nde aya. Kënë ee miɔ̈c ye nyuöp Bɛ̈nydït. Ku atuömde abï Ya miët piɔ̈u. 42Ku ye miɔ̈c ye nyop ëbɛ̈n aköölnyïïn gäm Ɛn në paany de mät thok. Të bän aa mat thïn wokë week, ku jääm week. 43Ku Yɛn bï aa mat wokë kɔc ke Yithriɛl ëtɛ̈ɛ̈n, ku ëtɛ̈ɛ̈n abï dhuëëŋdï tɔ piɛth. 44Ku Yɛn bï paany de mät tɔ ɣeric kekë yïk. Ku kuëny Aron bei kekë wɛ̈ɛ̈tke bïk Ɛn aa luööi ke ke ye bäny ke kake Nhialic. 45Ku Yɛn bï ya Nhialic de kɔc ke Yithriɛl, ku Yɛn bï rëër në keyiic. 46Ku abïk Ɛn jɔ ŋic nɔn Yan Bɛ̈nydït Nhialicdɛn wään bïï ke bei paan ë Rip, ka abïk Ɛn tɔ rɛ̈ɛ̈r në keyiic. Ee Yɛn aye Bɛ̈nydït Nhialicden.

Currently Selected:

Bɛ̈n 29: dip-JPB

Highlight

Copy