Luɔi 18

Në Korinth

1Na wën, aacï kakë thök, ke jël ë Athenai, bï Korinth. 2Ku yök Judai tök ëtɛ̈ɛ̈n cɔl Akula, raan cï dhiëëth ë Ponto, ku aa piɛc bɛ̈n ë Yitalia, kekë Pirithila tiiŋde, në biäk de löŋ cïï Kulaudio lueel an, bï Judai jäl ë Roma kedhie. Go bɛ̈n tëde keek, 3ago rëër ke keek, luɔi ee kek atëët kït, agokï ya luui ëtök, ayek atëët ee pɛɛny cuëëc. 4Go wël aa guiir luaŋ ë Nhialic ë akööl ke Thabath kedhie, ke bï Judai tɔ gäm wëlke, ayï Girikii.

5Na wën, aacï Thila bɛ̈n Makedonia kekë Timotheo, ke Paulo jieth piɔ̈u, go cök ë guïïr en Judai an, Yecu yen aye Kërtho. 6Ku të cï kek ater cak ku lɛ̈ɛ̈tkï, ke Paulo teŋ lupɔde, ku jɔ keek yɔ̈ɔ̈k an, “Ë riɛmdun tɔ̈u ë weyiëth, yɛn liu thïn, ëlë ënɔɔnë, yɛn bï lɔ tëde Juöör.” 7Go jäl ëtɛ̈ɛ̈n, le ɣön ë raan cɔl Tito Juthuto, raan riëëu Nhialic, thiëëkë ɣönde kekë luaŋ ë Nhialic. 8Ku Kirithipo, bɛ̈ny ë luaŋ ë Nhialic, acï Bɛ̈nydït gam kekë dhiënde ëbɛ̈n, ku gam Korinthoi juëc ayadäŋ, të cï kek jam piŋ, ago ke baptith.

9Ku yöök Bɛ̈nydït Paulo wakɔ̈u ke ee nyuöth an, “Du riɔ̈c, ye wël guiir, du mim, 10yɛn cath wo yïn, ku acïn raan bï rɔt yiëk ater ke yïn, bï yï nɔ̈k, yɛn de kɔc juëc ë pänydïïtëyic.” 11Go rëër ëtɛ̈ɛ̈n ë ruöön tök ku pɛ̈i kadhetem, ke ye jam ë Nhialic wɛ̈ɛ̈t në keyiic.

12Na ɣɔn, nu Galio ke ye bɛ̈ny de Akaya, ke Judai ke ke jɔt röt ë piɔ̈n tök lek tɔŋ yiɛ̈n Paulo, ku bïïkï të ye bäny löŋ guiir thïn. 13Ku luelkï an, “Raanë ee kɔc wëŋ an, bïk Nhialic aa lam në läm de ater kekë löŋda!”

14Na wën, ke Paulo an, tueer e thok, ke Galio yöök Judai an, “Tëë yen jam de luɔi rac ayï awäny cïï raan looi ë cuëër, wek Judai, adï piɛth luɔi bän këdun piŋ. 15Ku na ënɔɔnë, tëë yen ater ë wël tei, ku rin, ku löŋdun week, jakï woiyic week wapäc, yɛn cïn piɔ̈u luɔi bän kë cït ee kënë guiir!” 16Go ke cieec ɣön ee löŋ guiir thïn. 17Go Girikii kedhie gokï Thothene dɔm, yen aye bɛ̈ny de luaŋ ë Nhialic, ku duikï ɣöt thok ɣön ee löŋ guiir thïn. Ku Galio akën yecin tuɛɛl thïn, aa rɛ̈ɛ̈r.

Lɔ Ciëën Antiokia

18 # Kuɛ̈n 6:18. Na wën, ke Paulo ŋoot ke rɛ̈ɛ̈r ëtɛ̈ɛ̈n ë nïn juëc, na ɣɔn, ke tɔ̈ŋ wäthii, ku jël le Thiriya në abël, ku cath Pirithila ku Akula në yen, acï e nɔm muut ë Kenkuria: në këde jam wään cï lɛ̈k Nhialic.#18:18: në kuëŋ cï lueel: Kënë ee luɔi de ciɛɛŋ ë Judai ye raan muut nɔm ke ye kïn nyooth luɔi cï raan kuëëŋ lueel. 19Go bɛ̈n Epetho, ku nyiëëŋ keek piny ëtɛ̈ɛ̈n. Na wën, ke yenguöp ke lɔ luaŋ ë Nhialic, le wël guiir kekë Judai. 20Gokï lɔ̈ŋ an, yökë ke yï rɛ̈ɛ̈r wekë wook, go jäl. 21Go keek tɔ̈ɔ̈ŋ, ku lueel an, Dhuëëŋ abɔ̈ ënɔɔnë abä dhil lɔ looi Jeruthalem, ku yɛn bï a nɔm dɔ̈k week tei, të cï Nhialic e lueel. Go jäl ë Epetho ke cath ë abël.

22Na wën, aacï bɛ̈n bei ë abëlic ë Kaitharia, ke jɔ ɣön ë Nhialic lɔ thiëëc, ku jɔ lɔ Antiokia. 23Na wën, aacï rëër ëtɛ̈ɛ̈n ë aköölkë, ke jɔ jäl, le piny ë Galatia kuanyic, ayï paan ë Purugia, ke tɔ kɔcpiööcë ril ë gäm kedhie.

Apolo anu në Epetho ku Korinth

24Na wën, ke Judai tök bɔ̈ Epetho, cɔl Apolo, ee raan cï dhiëëth ë Alekandaria, raan ŋic wël guiir, ku ŋic kacïgɔ̈ɔ̈r aläl. 25Monyë acï wëët në kueer ë Bɛ̈nydït, ku ye raan lëthic, go kɔc guiëër ku wëët keek në ka ke Bɛ̈nydït ke cïn cöök wɛ̈ɛ̈c, ku ŋoot ke ŋic baptith ë Jɔn tei. 26Go jam gɔl luaŋ ë Nhialic ke ye nyin riɛl. Na wën, acï Akula kekë Pirithila e piŋ, ke leerkï ɣönden, ku wëëtkï apiɛth në kueer ë Nhialic. 27Na wën, aacï piɔ̈u dɛ luɔi bï en tëëk le Akaya, ke wäthii ke ke jɔ awerek gäär kɔcpiööcë ëtɛ̈ɛ̈n, läŋkï keek an, bïk loor, ku të cï en bɛ̈n ëtɛ̈ɛ̈n, ke jɔ kɔc cï gam në dhuëëŋ de Nhialic piɔ̈u kony aläl. 28Aaye Judai tiaam ë wël arëët ë kɔc nïïm, në nyuuth ee yen keek nyuööth ë gɔk në kacïgɔ̈ɔ̈r, an, Yecu yen aye Kërtho.

Currently Selected:

Luɔi 18: dip-JPB

Highlight

Copy