1 Kor 14
14
Kajuëc në Biäk de Miɔ̈c de Wëi
1Cuɔpkï nhiëër cök, ku kaarkï ka ke Wëi arëët, ku kë ŋuän ë keek ee guiëër bä wek wël ŋiëc guiir. 2Raan ee jam ë thoŋ mɛɛn acie jam ke kɔc, ee jam ke Nhialic, acïn raan ee këde piŋ, ku ee jam në kacïmoony ë wëike yiic. 3Ku raan ee wël guiir ee guïïr ke kɔc ë ke bï kueet, ku bï ke riit piɔ̈ɔ̈th, ku luk ke piɔ̈ɔ̈th. 4Raan ee jam ë thoŋ mɛɛn ee rɔt kueet etök, ku raan ee wël guiir ee ɣön ë Nhialic kueet.
5Ku yɛn duëër piɔ̈u miɛt të ya wek jam ë thook mɛɛn wedhie, ku luɔi bä wek wël aa guiir yen anu ë yapiɔ̈u arëët. Ku raan ee wël guiir yen adït awär raan ee jam ee thook mɛɛn, të kën en jam puk, ke ɣön ë Nhialic ë bï kueet. 6Ku ënɔɔnë, wek mïthëkɔckuɔ, të bä yɛn tëde week, ke ya jam ë thook mɛɛn, ee këpiɛthou bä yiɛ̈n week, të kɛ̈n ɛn jam wo week në kë cï nyuöth ɛn, ayï në ŋïny ŋiɛc ɛn käŋ, ayï në guiëër guiëër ɛn wël, ayï në wëët wɛ̈ɛ̈t ɛn week?
7Acakaa ka cïn pïïr, ka ye dhiau, nɔn ee yen kaaŋ de aruöör, ku nɔn ee yen thom, të cïn en luɔi bï dhiënde rɔt pɔ̈ɔ̈c, kë cï kooth bï jɔ ŋic adï, ayï kë cï gut, bï kɔc ŋic adï? 8Ayï kaaŋ, të cï en e röl guɛ̈l, röl dhal kɔc, eeŋa bï rɔt guik ë tɔŋ? 9Yen acït week ayadäŋ, të luɛɛl wek jam dhal kɔc në thoŋ mɛɛn, bï ŋic adï yen kë cï lueel? We bï käŋ aa lueel ë pëëric! 10Abï dɛ të nu thook kith yiic ë piny nɔm, ku acïn thok ë keyiic thoŋ cïn jamden cï lueel. 11Ku të kuöc ɛn thoŋ jiɛɛmë raanë, ke yɛn bï aa raan ë guɛl tëde raan jam, ku raan wën jam abï aa raan ë guɛl tëde yɛn. 12Ayï week ayadäŋ, na kaarkï ka ke Wëi aläldïïtë, jakï kɔɔr luɔi bä wek wöör në kuɛ̈t bä wek ɣön ë Nhialic kueet.
13Yen raan ee jam ë thoŋ mɛɛn ë läŋ ke bï jam ŋiëc puk. 14Ku të läŋ ɛn në thoŋ mɛɛn, wëikï kek aläŋ, ku ŋïny ŋiɛc ɛn käŋ acïn kë cï yök thïn. 15Jɔ aa ŋö? Yɛn bï lɔ̈ŋ wokë wëikï, ku bä lɔ̈ŋ wokë ŋïnydekäŋ aya: yɛn bï kët wokë wëikï, ku bä kët wokë ŋïnydekäŋ aya. 16Be an, cie looi wuya, ku jɔ Nhialic thieei wekë wëiku kapäc, ke raan rɛ̈ɛ̈r ëtɛ̈ɛ̈n ke ye raan kënë wɛ̈ɛ̈t, bï “Amiin” lueel adï, nɔn kën en kë luel piŋ? 17Yïn ë Nhialic ŋiëc leec nɔm në yic, ku raanë akënë kueet.
18Thieithieei Nhialicdï, yɛn ee jam në thook mɛɛn, ka week wäär wedhie. 19Ku në yɛn an, aŋuän luɔi bän wël kadhïc lueel ɣön ë Nhialic wokë ŋïnydekäŋ, luɔi bän kɔc kɔ̈k wɛ̈ɛ̈t aya, awär aguum ke wël kathiëër në thoŋ mɛɛn, në wël dhal kɔc.
20Wek mïthëkɔckuɔ, duökï bï aa mïthiikë në ŋïnydekäŋ, yak aa mïththii ateteet në racdepiɔ̈u tei, ku në ŋïnydekäŋ yak aa röördït. 21#Yith 28:11,12. Aye gɔ̈ɔ̈r ë löŋic an,
“Wok ë thok mɛɛn pei ku liëp mɛɛn pei,
kek a bän ke jam wokë jurë,
ku acakaa yɛn ë jam në keek alë,
ka cïkï këdï bï piŋ, ke lueel Bɛ̈nydït kï.”
22Yen ka, thook mɛɛn ee gök nyuuth kɔc, ku acie këde kɔc cï gam, ee këde kɔc kën gam, ku guiëërë wël acie këde kɔc kën gam, ee këde kɔc cï gam.
23Yen na cï ɣön ë Nhialic guëër ëbɛ̈n tëtök, ku jamkï ë thook mɛɛn kedhie, ku bɔ̈ kɔc kɔ̈k ɣöt kɔc kënë wɛ̈ɛ̈t, ayï kɔc wën kën gam, ke cïkï bï lueel an, cäk miɔ̈l? 24Ku na guiir kɔc wël kedhie, ku jɔ raan kën gam bɛ̈n ɣöt, ayï raan kënë wɛ̈ɛ̈t, ka bï käŋ yök ë yepiɔ̈u kedhie, ka cï piŋ, ku abï luɔp piɔ̈u në käŋ nyïïn kedhie. 25Ago ka cï thiaan ë yepiɔ̈u jɔ tïc, ago rɔt cuat piny ë yenɔm, ku lɛm Nhialic, ku jɔ lueel an, “Nhialic anu ë weyiic ëdhöc!”
Guɛ̈ɛ̈r Ɣön ë Nhialic
26Jɔ aa ŋö, wek mïthëkɔckuɔ? Të guɛ̈ɛ̈r wek tëtök, week wedhie, ŋɛk ade din ë Debid, ku de ŋɛk wëët, ku de ŋɛk thoŋ mɛɛn, ku de ŋɛk kë cï nyuöth en, ku de ŋɛk puŋ puk en jam. Yak käŋ tɔ loi kedhie në këde kuɛ̈t bï kɔc kuet. 27Ku na de kɔc jam ë thoŋ mɛɛn, abïk aa rou tei, ku të juëc kek, abïk aa diäk, ku abïk jam, ŋɛk ë këde tääu, ku tɛ̈ɛ̈u ŋɛk këde, ku raan tök abï jam pukic. 28Ku të cïn en raan ee jam pukic, ke raan lɔ lik ɣön ë Nhialic, ku jɔ jam yenguöp kekë Nhialic. 29Ayï kɔc guiir wël ë ke guïïr kaarou ayï diäk, ku kɔc kɔ̈k ë ke them jam luelkï. 30Ku na de kë cï nyuöth raan däŋ raan rɛ̈ɛ̈r ëtɛ̈ɛ̈n, ke raan tueŋ lɔ lik. 31Wek duëër wël guiir wedhie, ye ŋɛk këde tääu, ku tɛ̈ɛ̈u ŋɛk këde, ke we bï piööc wedhie, ku muk we piɔ̈ɔ̈th wedhie. 32Ku wëi ke kɔc guiir wël aceŋ keek ë kɔc guiir wël. 33Nhialic acie Nhialic de liëëpëkäŋ, ee Nhialic de mät.
Cït man tɔ̈u en në ɣööt ke Nhialic yiic kedhie, ɣööt de kɔc cï gam.
34Ë diëërkun ë ke ye lɔ lik ë ɣööt ke Nhialic yiic: akënë päl keek nɔn bï kek jam thïn, në ke ye tɔ̈u ke ke ye wël piŋ, acït man lueelë löŋ en ayadäŋ. 35Ku na de kë kɔɔrkï luɔi bï ke piööc ë ye, ë ke thiëc röörken gup paanden, ee ayäär të jiɛɛmë tik ɣön ë Nhialic yic.
36Eeŋö? Ee week ë bïï jam ë Nhialic? Ë cïï yïnë week tei? 37Ku na de raan cï rɔt tɔ ye tiët ee wël guiir, ayï raan ŋic ka ke Wëi, ke gam ka gäär week, nɔn ee kek ka cïï Nhialic thɔ̈n kɔc. 38Ku na de raan kuc jam, ke kuc tei.
39Yen ka, wek mïthëkɔckuɔ, kaarkï guiëërëwël arëët, ku duökï jam ë thoŋ mɛɛn ee pëën. 40Ë käŋ ë ke ye looi apiɛth kedhie, ku yek kecök kuany apiɛth.
Currently Selected:
1 Kor 14: dip-JPB
Highlight
Share
Copy
Want to have your highlights saved across all your devices? Sign up or sign in
The Bible in Jieeng de Padang © The Bible Society in South Sudan, 2011.
