1 Kor 13
13
Nhiëër
1Na ya cak jam wokë liëp ke kɔc ayï tuucnhial, ku ciën nhiëër, ke yɛn cï ciët maläŋ kök, ku ciët alogör cï tɔɔŋ. 2#Math 17:20; 21:21; Mak 11:23. Ku na ya cak wël ŋiëc guiir, ku ŋiɛc kacïmoony kedhie, ku dɛ ŋïnydekäŋ kedhie, ku na ya cak dɛ gäm ëbɛ̈n, gäm duɛ̈ɛ̈r ɛn kurdït tɔ nyaai tëden, ku ciën nhiëër, ke yɛn cïn nɔm këdäŋ. 3Ku na ya cak kɔc miɔɔc ë kakï kedhie, bï kek këcam yök, ku na ya cak guöpdï gam an, bï nyop ë mac,#13:3: bï nyop ë mac; këcïgɔ̈ɔ̈r däŋ ade yic në baŋ bän rɔ leec. ku ciën nhiëër, acïn piath bä yök tëde ye.
4Nhiëër ee käŋ guum anande, ku apiɛth piɔ̈u, nhiëër acïnic tiɛɛl, nhiëër acïï rɔt ee leec, acïï rɔt ee tɔ dït, 5acïï kë cïï piɛth ee looi, acïï ka ke yenguöp ee kɔɔr, acie dap gɔ̈th, acïn kërɛɛc ee tak, 6acïï piɔ̈u ee miɛt kekë luɔi de kërac, ee piɔ̈u miɛt kekë yic. 7Ee këriëëc guum, ee këriëëc gam, ee këriëëc ŋɔ̈ɔ̈th, ee yepiɔ̈u ruut në këriëëc.
8Nhiëër acie dak anande. Ku na de guiëër ë wël nu, ka bï aa ciën naamde, ku na de liëp nu, ka bïk jɔ kɔ̈ɔ̈c, ku na de ŋïnydekäŋ nu, ka bï aa ciën naamde. 9Ënɔɔnë wo ŋic käŋ ë biäk tei, ku yok wël guiir ë biäk tei: 10ku të cï kë cï dikëdik bɛ̈n, ke kë nu ë biäk tei abï tɔ cïn naamde.
11Ɣɔn aa yɛn meth, yɛn ee jam cït man ë meth, ku yɛn ee käŋ piŋ cït man ë meth, ku yɛn ee käŋ tak cït man ë meth, ku ënɔn cän aa raan dït, ke ka ke mɛɛth acä ke pɔ̈l. 12Ku ënɔɔnë, wok ee daai ëmormor, cït man ë raan ë daai acidhathic, ku rial, wo bï aa daai ke wo tuum wonyïïn. Ënɔɔnë yɛn ŋic käŋ ë biäk tei, ku rial yɛn bï käŋ ŋic cït man cï en a ŋic.
13Ku ënɔɔnë adɔ̈ŋ gäm, ku aŋäth, ku nhiëër, kake kedhie, ku kë dïït ë kake yiic ee nhiëër.
Currently Selected:
1 Kor 13: dip-JPB
Highlight
Share
Copy
Want to have your highlights saved across all your devices? Sign up or sign in
The Bible in Jieeng de Padang © The Bible Society in South Sudan, 2011.
