Ɨ̀nnǔ nlwìꞌìnjɨ̀m 18
18
Àjàŋə mə Babylon à wǒ aà
1Ma yû a ghə̀ mə kɨ tsyǎ, mə̀ yə angel yî mɔ̀ꞌɔ a lô a aburə nsɨgə, ǹtswe nɨ̂ àdàꞌà yî wè, ŋ̀wèènə̂ yì ɨ keꞌè ǹsyɛ̂ ǹtsɨ̀m. 2A tɔŋnə̀ ŋ̀ghaa nɨ̂ ǹjì yî ǹtɨ̀ɨ̀ ǹswoŋ mə,
“À wò Mə̀! Babylon, ǹjɔ̀ꞌɔ̀ àlaꞌa yì ŋ̀wè ya à wò mə̂!
À tɨ̀gə̀ mə̂ m̀bə aa ndùgə bɨ̀demons,
àdɨ̀gə alə̀ə̀ntə ɨzwì jî bɨ̂ ɨ̀tsɨ̀m
m̀bə ɨdɨgə alə̀ə̀ntə̀ bɨ̂sɨŋ bɨ̂tsɨ̀m bìi bə̀ baa aà.
3Ǹloŋ mə ɨtoò tsɨ̀m nò mə̂ mɨlùꞌù mî tɨ̀ɨ̀ mɨ ŋghɨrə ɨnnǔ atsùùrə̂ mi mya mbaanə.
Bɨ̀fɔ̀ bɨ tsɨ̀m fàa nsyɛ bɨ kɨ̂ ŋ̀ghɨrə ɨnnǔ mâghàbə̀ bo bo.
Ŋ̀gǎŋntaŋ mɨ̀tàà fàa atu nsyɛ ɨ kɨ̀ mə̂ m̀fuꞌu ŋkabə yì ŋ̀wè nɨ̂ àfùꞌu annǔ njɨ̂ àkwàrə̂ yi yâ.”
4Mə̀ bû ǹyuꞌu njì yî mɔꞌɔ ɨ ghaà a aburə nswoŋə nɨ mə,
“Fɛ̀ꞌɛ̂ nɨ̀ ghuu bə̂ bâ, nɨ̀ maꞌatə yi mfɛꞌɛ ghuu;
tǎ waꞌà lò ŋghɨrə ɨbɨ̂ yi wa yì tsu,
tâ Nwì à waꞌà lò ŋ̀kɨ nɨŋ njô yì ya a nu bù;
5Ǹloŋ mə bɨ tàŋtə̀ mə ɨbɨ̂ waa ɨ saꞌà ŋ̀kɔꞌɔ nyweꞌe a aburə,
Nwì a kɨ̂ ŋ̀waꞌatə ɨbɨ̂ yi tsɨ̀m.
6Nɨ̀ kwiꞌinə annù yìi à lɛ sɨ ghɨ̀rə,
ǹtɛꞌɛ ŋkwiꞌinə ɨbɨ̂ yi ŋgaa ji baà.
Nɨŋ mɨlùꞌù ghu ndɔ̂ŋə̀, mìi mɨ tɨɨ ntsyàtə mìi mə à lɛ sɨ fa aa, ŋ̀gàà ji baà.
7Tsǒ mə à lɛ sɨ ŋee nɨ̂ nû ŋ̀kɨɨ njɨ nɨ̂ m̀bi ntərə aa,
kɨ naŋsə mfa ŋgɨꞌɨ bô àjəŋnə̀ ghu mbo tsiꞌì maa ajàŋə̀.
Ǹloŋ mə à lɛ sɨ swoŋə a mûm ǹtɨɨ yu mə, ‘Mə̀ bə̀ aa m̀fɔ̀ màŋgyɛ̀, ŋ̀ŋaŋnə a abə̀rə mə̀!
Kaa mə̀ sɨ̌ ŋkwiꞌi bə̂, kaa mə̀ aa yǐ waꞌà kɨ̀ ŋ̀kɨɨ njəŋnə,’
8maa ajàŋ, ŋ̀gɨꞌɨ ɨ̀ ka yǐ kuu ghu nu a atû ǹjwi yì m̀fùùrə̀,
mbə nɨ̀ghɔ̀ɔ̀ nɨ nzwitə bə̀, nɨ àjəŋnə̀, nɨ̂ ǹjì yî ǹtɨ̀ɨ̀,
tâ bɨ̀ kɨ ntɔɔ yi a mɔꞌɔ;
ǹloŋ mə Mmàꞌàmbî Nwìŋgɔ̀ŋ yìi à tsə̀rə̀ mə ɨsaꞌà yi aa à tswe nɨ mɨ̀dàꞌà.”
9Bɨ̀fɔ̀ bɨ nsyɛ bù bya bìi mə bɨ lɛ sɨ ghɨ̀rə annǔ mâghàbə̀ bo bo ŋ̀kɨɨ njɨ nɨ̂ m̀bi bo bo aa, ka yǐ kɨ yə̀ꞌə lə̀rə̀ nɨ̂ àkɨɨ̀ yaa, a noò yìi baa yǐ yə tâ bɨ̀ tɔɔ yi tâ fɨ̀lɨ tɨgə ŋkɔꞌɔ aà; 10baa yǐ tɨgə təə a asaꞌa aghaꞌa ɨ bɔꞌɔ nɨ̂ ŋ̀gɨꞌɨ yì ya, ɨ swoŋə nɨ mə,
“Wɛmɛɛ̀! Wɛmɛɛ̀! Wò ǹjɔ̀ꞌɔ̀ àlaꞌa yì ŋ̀wè,
wò ǹjɔ̀ꞌɔ̀ àlaꞌa Babylon yì ŋ̀wè!
Tsiꞌì a nɨ mû àtɨɨ noò, bɨ ghɛ̀nsə̀ mə̂ ǹnɨŋ njo a nu wò!”
11Ŋ̀gǎŋmɨtaa jî fàa nsyɛ yə̀ꞌə̀ nɨ̂ Babylon ǹjəŋnə, ǹloŋ mə kaa mbə̂ ŋù à waꞌà ayoo mɨtaa ghu bû ŋ̀ghɛɛ nyuu; 12kaa mbə ŋù waa bù ǹyuu, gold, kə̀ silva, ŋgɔ̀ꞌɔ atɨ̀ndùù, kə̌ njoo atɨ̀ndùù, ɨ̀tsə̀ꞌə atɨ̀ndùù jî fùꞌù jî sɨgɨ̀nə̀ jìi bɨ naŋsə nɨ̂ linen, ɨ̀tsə̀ꞌə atɨ̀ndùù jî bagɨtə, ɨtsə̀ꞌə̀ silk nɨ̂ ɨ̀tsə̀ꞌə̀ jìi ɨ ghə̀ꞌə̀ boò aà, m̀buu ɨti tsɨ̀m jìi mə ɨ tswe nɨ̂ àyàꞌà yî sɨgɨ̀nə̀ aa, ǹjoò tsɨ̀m jìi mə bɨ naŋsə nɨ mɨ̀sɔ̀ŋ mɨ nsəə aa, ǹjoò tsɨ̀m jìi bɨ naŋsə nɨ̂ ɨ̀tǐ ɨtɨ̀ndùù aa, njoo jìi mə bɨ naŋsə nɨ̂ àtɨ̀ɨ̀ bronze, iron, nɨ marble, 13ǹjoo jìi ɨ lùmə̀ ǹsoꞌotə tso, cinnamon, ǹjoo aghɔ̀ꞌɔ̀, ǹjoo jì lùmtə̀, məə̀, frankinsense, mɨ̀lùꞌù, mɨ̀ghurə, abaa yìi bɨ naŋsə ŋghɔ̀ꞌɔ̀, mɨ̀sàŋ, bɨ̀ŋkɔꞌɔ̀ ǹjɨ̀m, nɨ̂ m̀binjə̀rə̀, bɨ̀ləŋə bo bɨ̀kalɨgə, nɨ̂ ɨ̀bùꞌù, bə̀ bìi bɨ tswe ntɨ̀ɨ̀ aà. 14Ŋ̀gàŋmɨtaa jya ɨ swoŋ mə,
“Ǹjoo jya tsɨ̀m jìi mə ǹtɨɨ̀ ghu ɨ lɛ sɨ yə̀ꞌə̀tə̀ aa ɨ khə̀ mə̂ gho ŋghɛ̀ɛ̀ yi,
àfùꞌû yo tsɨ̀m bo bɨ̀ ǹjoo jì sɨgɨ̀nə tsɨ̀m jìi mə o tswòŋə̀ noo ghu mum aa ɨ ghɛ̀ɛ̀ mə̂ ǹtso, kaa ò ka yǐ waꞌà bù ǹyə!”
15Bə̀ bìi mə bɨ lɛ sɨ taŋə mɨtaa nɨ̂ ǹjoo mà jû aa, ǹtswe nɨ̂ àbìì yî ghàꞌàtə̀ ghu aa, ka tɨgə təə a asàꞌa aghaꞌa, ɨ bɔꞌɔ nɨ̂ ŋ̀gɨꞌɨ ya mə ɨ̀ kuu ghu nu aa, ɨ tɨgə yə̀ꞌə̀ nɨ̂ tɨ̀ɨ̀ ǹjəŋnə ɨ swoŋə nɨ mə,
16“Wɛmɛɛ̀! Wɛmɛɛ̀! Ǹjɔ̀ꞌɔ̀ àlaꞌa yì ŋ̀wè ya
mə bɨ lɛ ŋwɛꞌɛ nɨ̂ ɨ̀tsə̀ꞌə atɨ̀ndùù jî fùꞌù jî sɨgɨ̀nə̀ jìi bɨ naŋsə nɨ linen, bo bɨ̀ jì bagɨtə nɨ̀ jìi ghə̀ꞌə̀ boò
bɨ tsiꞌì nɨ gold, nɨ̂ ŋ̀gɔ̀ꞌɔ̀ atɨ̀ndùù nɨ̂ m̀bǔm njoo atɨ̀ndùù aà!
17Tsiꞌì a nɨ mû àtɨɨ noò bɨ ghɛ̀nsə̀ mə̂ m̀bwɛsə afùꞌù mà yû tsɨ̀mə̀.”
Ɨ̀tu ŋgǎŋntiì ɨ̀baŋ, bə̀ bɨ̀ tsɨ̀m bìi bɨ kuu abaŋə ŋkì aa, ŋ̀gǎŋntiì ɨbaŋ, bo bɨ̀ bə̀ bɨ̀ tsɨ̀m bìi bɨ fàꞌà a mûm ŋ̀kì aa, bɨ lɛ ntɨgə ntəə a asàꞌa aghaꞌa, 18ǹyəꞌə nɨ̂ àjàŋ yìi mə bo lɛ nyə fɨlɨ fya fɨ kɔꞌɔ̀ a nɨ̂ ǹjɔ̀ꞌɔ̀ àlaꞌa ya mə a lɛ sɨ khɨ aa, mə,
“À nɨ yuu njɔ̀ꞌɔ̀ àlaꞌa yìi mə ɨ̀ lɛɛ̀ m̀bə tsiꞌì tsǒ ǹjɔ̀ꞌɔ̀ àlaꞌa yì ŋ̀wè yulà aa ɛ!”
19Bo lɛ ntɨgə ŋkumə nɨ̂ àtû yaa nɨ̂ àbɨ̀rə̀, a ajàŋ yìi mə bo lɛ sɨ yə̀ꞌə̀ ǹjəŋnə, ǹnaŋsə nyəꞌə nswoŋə nɨ mə,
“Wɛɛ̀ ŋgɨꞌɨ, Wɛɛ̀ ŋ̀gɨꞌɨ̀ ǹjɔ̀ꞌɔ̀ àlaꞌa yì ŋ̀wè yû
Bə̀ bìi bɨ lɛ ntswe nɨ̂ ɨ̀baŋ a mûm ŋ̀kì ghu aa, lɛ ntɨgə ŋgǎŋkabə jì wè ǹloŋə afùꞌû yi yâ!
Tsiꞌì a atu mû àtɨɨ noò, a bwɛ̀ mə̂!
20Ka ndorɨtə̂ nɨ̀ ǹloŋ mə a wò mə̂ aa mbǎ aburə,
bə̀ bɨ Nwî nɨ ŋgǎŋntoo Kristo, nɨ̂ ŋ̀gǎŋntoo Nwî,
ǹloŋ mə Nwì à nɨ̀ŋ mə njo a nu Babylon ǹloŋ ɨnnù jìi mə à lɛ ŋghɨ̀rə̀ a nu bù aà!”
21Angel yî mɔ̀ꞌɔ yìi à lɛ ntswe nɨ mɨ̀dàꞌà aa a bwɛɛ̀ ŋ̀gɔ̀ꞌɔ̀ yìi ɨ̀ lɛ mbə tsǒ ŋ̀gɔ̀ꞌɔ̀ àbaa yì ŋ̀wè aa, m̀maꞌa a mûm ŋ̀kì mɨyaa yî wè aa, ǹswoŋ mə,
“Àâ àjàŋ yìi mə bɨ ka kɨɨ màꞌa njɔ̀ꞌɔ̀ àlaꞌà Babylon tsiꞌì nɨ̀ mɨ̀tsəꞌə̀, kaa tâ ŋù tsù à yi ŋwaꞌà yi bû ǹyə.
22Kaa bɨ ka yǐ waꞌà bù ǹyuꞌu njì mɨ̀lòŋ, kə̌ njǐ ŋgǎŋnyəə̀ ɨ̀kòò, kə̌ njì mɨ̀bàŋ mî tɔ̀ŋ, kə̀ ǹjì ǹtàŋ,
kaa bɨ ka yǐ waꞌa a mum wò bû ǹyuꞌu;
kaa bɨ̀ ka yǐ waꞌà ŋû àbofàꞌà
a mum wò bû ǹyə,
kaa waꞌǎ njì ŋ̀gɔ̀ꞌɔ̀ àbaa
a mum wò bû ǹyuꞌu;
23kaa tâ ŋ̀kàꞌà lâm
ɨ̀ waꞌǎ a mum wò bû ǹta;
kaa waꞌǎ njì ǹdoo nɨ̀yɔꞌɔ kə̀ yì mûŋgen
a mum wò bû ǹyuꞌu;
ǹloŋ mə ŋgàŋmɨtaà jo jì wè jya lɛ mbə aa bə̀ bî wè bìi mə bɨ lɛ ntswe a atu nsyɛ aà,
ò lɛ bweꞌesə̀ ɨ̀toò tsɨ̀m nɨ̂ ɨ̀nnù bɨ̂sɔ̀rə̀ jo jya aà.
24Àləə nu ŋgǎŋntoo Nwî, bo bɨ̀ àləə nu bə̂ bɨ Nwî,
bo bɨ̀ à yì bə̂ bɨ̀ tsɨ̀m bìi bɨ lɛɛ̀ ǹzwitə fàa nsyɛ aa,
bɨ lɛ nyə a njɔ̀ꞌɔ̀ àlaꞌà Babylon.”
Currently Selected:
Ɨ̀nnǔ nlwìꞌìnjɨ̀m 18: BFD
Highlight
Copy
Compare
Share
Want to have your highlights saved across all your devices? Sign up or sign in
© 1999, Wycliffe Bible Translators, Inc. All rights reserved.
