HOSEA 9
9
Hosea kutangaza ikabo aighu ya Israeli
1Wandu wa Israeli, msebonye ndima mkiboilwa sa wandu wa iro mbari. Inyo mwaghalukie mkamsigha Mlungu onyu, hata ndemkaie waloli kwake anduangi. Mwakuuzire isangenyi kose mkawuya malaya kwa mlimu Baali, mkaboilwa ni viro moregheshereghe ni malipo ghenyu. 2Ela kafwani koni ndemchaakaia na viro vekata na mavuda; ndemchaakaia na divei ingi. 3Wandu wa Israeli ndewichaakaia isangenyi ja BWANA, ela wichawuya cha Misri na kuja vindo viseelie aho Ashuru. 4Ndewichadima kumfunyira BWANA vizongona venywa andenyi ya agho masanga, hata vizongona vawo ndevichaamrira BWANA anduangi. Vindo vawo vichamlusha kula mundu uvijagha; kwa kukaia vichakaia sa vindo va ifonyi. Vichakaia tu kwa kuinja njala, hata mkate ghwaro ndeghuchaaredwa andenyi ya Hekalu ya BWANA. 5Welee, ngelo ikavika ya iro ndima ra dini riwikilo remtasa BWANA wibonya wada? 6Iji wasi ghwacha na wandu kusasarika, Misri ichawikwanya wipate kurikilwa Memfisi. Vilambo vawo va zoghori va feza na andu kose mizi yawo erekoghe, ichabukwa ni masaka na minjwa.
7Ngelo ekabwa yameria kuvika, agho matuku gha wandu kulipwa agho ghiwifwanagha. Matuku agho ghikacha, Israeli ichaghimanya. Inyo mwaawuyaghamba, “Uhu mlodi ni mkelu; umundu uchulo ni Roho ooka na isu.” Inyo mwaawuyazamilwa ni ini angu kaung'a renyu riko nyingi.#Lk. 21.22 8Mlungu ooniduma nikaie mlodi owionya wandu wake Israeli. Elaima kula andu nawuyaghenda mwawuyanideghia midegho sa nyonyi. Wandu waawuyanibonya m'maiza andenyi ya Hekalu icheni ya Mlungu. 9Waawuyabonya mawiwi icho kisha, sa iji koni werekoghe Gibea. Mlungu uchakumbuka mawiwi ghawo, na kuwikaba.#Wat. 19.1-30
Kaung'a ya Israeli na malipo gharo
10BWANA waghamba, “Iji nerezoyagha kummbona Israeli, odeeka sa kuwona zabibu rikizoghua kireti. Iji nerewiwonagha weke ndeyo, edeeka sa kuwona matunda gha imbiri gha tini riwurue kwa kimu charo. Ela iji werechieghe Mghondi ghwa Peori, wikazoya kutasa Baali; wikazoya kufwanana na iyo milungu wereikundieghe.#Mit. 25.1-5 11Kudima kwa Israeli kuchainjika sa nyonyi yaburuka; ndekuchaakaia na kuva wana angu kukaia na kifu, hata kungilwa ni kifu. 12Hata ngera walela wana, nichawiinja ungi usekaie moyo. Ngawisigha awa wandu, wichachelwa ni maza rizamie.”
13BWANA, naawuyawona wana wawo wikidiwa na kubwaghwa. 14Nilomba kuwibonye wada awa wandu ee BWANA? Kuwibonye wikuoghe vifu, hata wiseongoshee wana.
Kutanya kwa Mlungu aighu ya Israeli
15BWANA waghamba, “Wuwiwi ghwawo ghose ghoozoia Gilgali; aho niko werezoeghe kunizamia. Nichawifunya isangenyi japo, kwa wundu ghwa wuwiwi ghwa mabonyo ghawo. Sichaawikunda sena, kwa kukaia wabaa wawo wanileghie. 16Wandu wa Israeli weeka sa mudi ghuomie miri, ndewichaava matunda ghangi. Hata wikava, nichawibwagha wana wawo wiwikunde.”
Mlodi kughora malagho gha Israeli
17Mlungu wapo nimdumikiagha uchawiinja noko, kwa kukaia waleghie kumsikira, nawo wichakaa wikimara-mara aghadi ya iro mbari.
Currently Selected:
HOSEA 9: TAITA
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 1997
All rights reserved.
