HOSEA 7

1“Ingelo nawuyakunda kuwiboisa wandu wapo Israeli, niko kaung'a rawo rifunukukagha na mabonyo ghawo kuwoneka. Waawuyakaliana weni na weni; waawuyabara nyumba na kuiwa, na kusoka wandu vilambo chienyi. 2Ela ndewiwuemanya wei nawuyarikumbuka kazi rawo mbiwi rose. Mabonyo ghawo ghawimara chia rose na kuwikwa imbiri kwapo.”

Njama mbiwi andenyi ya ngome

3BWANA waghamba, “Wandu wadamkalia mzuri na wabaa wake kwa kutumia njama rawo mbiwi. 4Wose ni wakalii wisewadie wuloli ghungi. Kuzamilwa kwawo kooka sa modo ghuko irikonyi ghusesindikirwagha ni muochi mikate, hata mufu waghukanda ghwameria kungirwa chachu. 5Ituku ibaa ja mzuri odu, wabaa werewongerieghe kwa divei ibirie hata wikadaika, na mzuri ukarangana nawo. 6Ngolo rawo ra mikalo reeka sa iriko ja modo; wialalajokwa ni machu kio chee, nakesho ghiajoka sa lumu lwa modo.

7“Wabwaghie wabaa wawo wose kwa machu ghawo gha modo. Wazuri wawo wabwaghilo umu umu, hata ndekuwadie ungi wawo wawuyanilomba wutesia.”

Israeli na iro mbari ra wandu

8BWANA waghamba, “Wandu wa Israeli weeka sa mkate ghuseghalusiro kwa wundu ghosuwiria kwa wandu wa iro mbari. 9Ndewiwuemanya wei uko kusuwiria kwa wandu niko kwawisoka ndighi rawo; waghosia na ndighi, ela ndewiwuemanya. 10Kukukasa kwa wandu wa Israeli kwawuyashudia aighu yawo; aighu ya maza rose riwipatire, ndewighalukie na kuwuya cha kwapo ini BWANA Mlungu wawo. 11Israeli ooka sa mbughi isena akili; wandu wake wiammbanga Misri uchewitesia, sena ii chia wiakimbiria cha Ashuru. 12Ingelo wakakimbia, nichaighorua nyavu yapo nipate kuwiwada na kuwisera andoenyi sa nyonyi ra mbeonyi; nichawikaba kwa wundu ghwa mabonyo ghawo ghizamie.

13“Ni bugha kwawo! Wanileghie na kunisigha. Wichatoteshwa. Kumangu nawikombua ela waawuyanitasa icho kisha. 14Ndewiwuenilomba kwa loli putu, ela waawuyakukumba andonyi sa wandu wisemuichi Mlungu. Wikakalomba viro na divei wiabonya sa wandu wa iro mbari. Ni wandu winileghie putu! 15Hata ngera ni ini niwijosere na kuwingira ndighi, ela waawuyaghesha kiwiwi aighu yapo. 16Wanisighie na kuighalukia milungu isewadie ndighi; wakaia sa ndana ikomekie isedimagha kusuwirilwa. Wabaa wawo wichabwaghwa wudenyi angu wikukasire, na Wamisri wichawiseka.”

Currently Selected:

HOSEA 7: TAITA

Highlight

Copy