HOSEA 13

Kutanywa kwa kutua kwa Israeli.

1Iji kichuku cha wandu wa Israeli cherededagha kala, wandu wazima wa vichuku vizima va Israeli wedeeka wikisughusika; Israeli odeeka ukiwoneka wa ighu andenyi ya Israeli; ela wandu wake wiendabonya kaung'a kwa kutasa Baali, wikafwa. 2Na idana waawuyachuria kubonya kaung'a kwa kukubonyera weni milimu ichanilo wiitase; milimu iyo ibonyero kwa feza; kazi ibonyero kwa wuya ghwa mdamu. Nawo waghamba, “Funyenyi vizongona kwa ihi milimu.” Ikaia wada wandu wisusugha mlimu ghwa njau! 3Kwa huwo wichasoweka sa ikungughu ja luma lwa nakesho, kara kara na mami ghiinjikagha kokio, na kara kara na makanda ghidukwagha noko ni mbeo kufuma kwa lwala loelea viro, angu sa mosi ghufumagha na idirisha.

4BWANA waghamba, “Ini ne BWANA Mlungu wako nikufunyire kufuma isanga ja Misri. Ndekuwadie Mlungu ungi mzima ela ini moni, ndekuwadie mkiri ungi mzima kunichumba ini. 5Na ini nerekulindiagha iji korekoghe kireti, ijo isanga jiomie.#Wuk. 8.11-17 6Ela iji morejieghe mkaghuda andenyi ya isanga ja ilaghiro, morekujosereghe ngolonyi konyu mkaniliwa. 7Kwa huwo nichammbwada sa shimba, nichamlaliria chienyi sa inge. 8Nichamramia chienyi sa dubu wasokwa wana wake; nichamrashua-rashua na kumja shwa wori sa shimba, seji nyamandu ya isakenyi irashuagha.

9“Nichamnona ee wandu wa Israeli! Nani udikagha kumtesia? 10Morekoghe mkilomba mzuri na vilongozi. Da widima wada kuikira iyo mbari?#1 Sam. 8.5-6 11Namnekie wazuri kwa machu ghapo, na kwa lubio ngawiinja noko.#1 Sam. 10.17-24; 15.26

12“Mawiwi na kaung'a ra Israeli raandikilo na kuwikwa nicha. 13Israeli ooka sa mwana mkelu uleghagha kufuma ingelo mae wakakumba lufu lova. 14Nichawikira awandu na wurumwengu ghwa wafu; nichawikombua na ndighi ra kifwa. Ee kifwa luvia lwako loko hao? Sichaakaia na wughoma ghungi,#1 Wakor. 15.55 15hata ngera Israeli wawoneka kukaia nicha aghadi ya waruna, ela nichawetesha mbeo ya mruke ghwa mashariki ifumagha cha kireti, nayo ichaomera ndoria rake ra machi na viriwa. Iyo mbeo ichakaba na kughusha stoo ra mali rake na ra vilambo vake va zoghori mbaa. 16Suti Samaria ikabo kwa wundu ghonilegha. Wandu wake wichafwa wudenyi; wana wawo wichabarilwa ndonyi, na waka wawo wiko na vifu wicharashulwa.”

Currently Selected:

HOSEA 13: TAITA

Highlight

Copy