MABONYO GHA WADUMI 2
2
Kucha kwa Roho Mweli
1Nao iji ituku ja Pentekosto javika, awo wanughi werekoghe andu kumweri wose.#Wal. 23.15-21; Wuk. 16.9-11 2Shwa wori, wikasikira lwaka sa lwa mbeo mbaa iwetagha kufuma mlungunyi na kuichura nyumba yose andu werekoghe kidombo. 3Rikawoneka kwawo chumi sa chumu ra modo riwaghanyiro, na kukaria aighu ya kula umu wawo. 4Wikachulwa ni Roho Mweli wose, wikazoya kudeda na viteto vizima, sa iji uo Roho orewidimishireghe kughora. 5Na aho korekoghe na Wayahudi wamu werekoghe wikikaia Jerusalemu; wandu wimuobuagha Mlungu, wifumie kula isanga wurumwengunyi. 6Nawo iji wasikira ulo lwaka, wikakwanyika izungu ibaa wikishinika; angu werewisikireghe awo wanughi wikideda kwa kiteto cha kula umu wawo. 7Wikashinika na kutambika wikighamba, “Welee, awa wose wawuyadeda si Wagalilaya anguwada? 8Yakaia wada isi kusikira wikideda kwa kiteto cha kula umu odu? 9Wapelethi, Waamedi, Waelami, na wandu wikaiagha Mesopotamia, Judea, Kapadokia, Ponto, na Asia; 10Frugia na Pamfulia, Misri na isanga jimu ja Libya kaavui na Kurene, na waghenyi wifumie Roma, 11Wayahudi na wandu wingirie dini ya Kiyahudi, Wakirete na Waarabu; dawisikira wikighora malagho mabaa gha Mlungu kwa viteto vedu.” 12Wikashinika wose wikikambwa ni chongo na kukotiana, “Ni mazaki iri?” 13Ela wazima wikaseka wikighamba, “Waawongerwa ni divei mbishi.”
Machilo gha Petro
14Nao Petro ukawuka kimusi andwamweri na wadumi ikumi na umweri ukaghamba kwa lwaka lubaa, “Inyo wandu wa Judea, nenyo mmbose mkaiagha Jerusalemu, nisikirienyi mtambukilo. 15Wandu awa ndewiwongerie seji mugheshagha, angu idana ni saa idadu ra dime; 16ela ilagho iji nijo jereghoreloghe ni mlodi Joeli ukighamba:
17‘Huwu niko ichaakaia matuku gha kutua mbai,
waghamba Mlungu,
nichawidiria wandu wose Roho wapo;
wana wenyu wa womi na
wa waka wichafunya wulodi,
na wandu wenyu wa irika
wichawona mawono,
na waghosi wichaloda ndodo.#Joe. 2.28-32
18Ee, hata wadumiki wapo wa womi na waka,
nichawidiria Roho wapo matuku ghaja;
nawo wichafunya wulodi.
19Nani nichawiwonyera mashiniko aighu mlungunyi,
na alama aisi ndoenyi;
kuchakaia na bagha, modo, na mosi
ghwa ikungughu.
20Iruwa jichawuya kira,
na mori ghuchawuya ghwa ngundu sa bagha
imbiri Ituku ja Bwana jisechee,
ijo ituku ibaa jimanyikie.
21Na aho ichakaia,
uo ose uchaajiwangia irina ja Bwana uchakia.’
22“Sikirenyi malagho agha inyo wandu wa Israeli: Jesu wa Nazareti, ni mundu oremanyishiroghe worinyi konyu ni Mlungu kwa mabonyo gha ndighi, alama na mashiniko Mlungu oreribonyereghe kwa kumtumia aghadi konyu sa iji koni mwawuyamanya. 23Uo Jesu, orefunyiroghe konyu kwa mpango tiki ghoremanyikieghe kwa Mlungu; nenyo mkamsulubisha na kum'bwagha kwa mikonu ya wandu wawiwi.#Mat. 27.35; Mk. 15.24; Lk. 23.33; Joh. 19.18 24Ela Mlungu oremrukishireghe kufuma kwa wafu, ukamuinja luwawo lwa kifwa, angu ndeeredimikieghe chimmazire anduangi.#Mat. 28.5-6; Mk. 16.6; Lk. 24.5 25Angu Daudi waghorie huwu aighu yake;
‘Neremmbonieghe Bwana imbiri kwapo ngelo rose,
uko chia ya mkonu ghwapo ghwa kiwomi,
eri nisenyavurike.#Zab. 16.8-11
26Kwa huwu ngolo yapo ikaboilwa,
na madedo ghapo ghikachua iseko,
nani hata ngera neko na mumbi ghwa wunyonge,
nichadua ngikusuwiria.
27Angu ndekuchaaisigha roho yapo iduo kwa wafu,
hata ndekuchaamsigha Mweli wako
uwone kuwoa kungi anduangi.
28Oho kwanimanyisha chia ra irangi,
na iji kuko andwamweri nani,
nichachulwa ni kuboilwa.’
29“Wanidu, nadima kughora malagho gha aba odu Daudi kwa wuwana, seji uo moni orefueghe na kurikwa, na kaburi yake eko kodu hata linu. 30Uo moni angu orekoghe mlodi, nao ukimanya seji Mlungu orem'bonyereghe ighemi, angu uchamsera kidombo mndumu wa kivalwa chake kifumbinyi chake cha nguma,#Zab. 132.11; 2 Sam. 7.12-13 31orezoeghe kuwona; ukaja malagho gha kuruka kwake Kristo, seji usechaadua kwa wafu, hata mumbi ghwake ghusechaawoa anduangi. 32Uo Jesu, Mlungu oremrukishireghe kufuma kwa wafu, nesi diwose deko washahidi wa maza iri. 33Nao moni, umeria kujoswa kwa mkonu ghwa kiwomi ghwa Mlungu, na kuwusa kufuma kwa Aba ijo ilaghiro ja Roho Mweli, niko wachidia ichi mchiwonagha na kuchisikira wori. 34Angu Daudi nderejokieghe mlungunyi anduangi, ela uo moni waghamba,
‘Bwana oremzerieghe Bwana wapo,
sea kidombo chia ya mkonu ghwapo ghwa kiwomi,#Zab. 110.1
35hata nimerie kuwibonya wamaiza wako wikaie
kifumbi chewikiria maghu ghako.’
36“Kwa huwu Waisraeli wose ndewimanye loli, uhu Jesu moremsulubishireghe, Mlungu wam'bonya ukaie Bwana na Kristo wori.” 37Nao iji wereghisikireghe agho, wikadungwa ngolonyi kwawo wikamzera Petro na wadumi wambao, “Dibonya wada wanidu?” 38Petro ukawizera, “Heenyi m'baputizo kula umu onyu kwa irina ja Jesu Kristo mpate kulekwa kwa kaung'a renyu, nenyo mchapata inosi ja Roho Mweli. 39Angu ilaghiro iji ni jenyu, na ja wana wenyu, na awo wose wiko kula; awo wose Bwana Mlungu uchaawiwanga wiche kwake.”
40Na kwa malagho mazima mengi ukawishuhudia na kuwishashira ukighamba, “Mkukire mmbeni na kivalwa ichi chizamie.” 41Awo wereghiwadieghe malagho ghake werebaputiziroghe, na mtalo ghwa awo werechurikieghe jija ituku ghukavika elfu idadu. 42Wikafunga ndighi kughiwadia mafundisho gha wadumi, na kukaia na wungara, chiaimweri na kughuchikanya mkate, na kulomba Mlungu.
Mighendo ya awo wererumirieghe
43Alama na mashiniko rerekoghe rikibonywa ni wadumi, na wandu wose wikangilwa ni wowa. 44Na awo wose wererumirieghe, werekoghe chia imweri, nawo wikakaia na wungara ghwa vilambo vose.#Mab. 4.32-35 45Wikauza mali rawo, na vilambo vawo, wikawaghiana wose kula mundu seji orekundieghe. 46Na ituku ituku werekoghe wikingia Hekalunyi, na kughuchikanya mkate nyumbenyi kwawo, wikija vindo kwa kuboilwa na ngolo rielie, 47wikimkasa Mlungu na kukundwa ni wandu wose; na Bwana ukaghuchuria ituku ituku mtalo ghwa awo werekoghe wikikirwa.
©Bible Society of Kenya, 1997
All rights reserved.