Rom 4
4
1Bĭ gah tơdrong Abraham sơ̆, 'bok tơm lu bơ̆n bơngai Juđê, bơ̆n tơchĕng tơdrong sư thoi yơ? 2Lu bơngai Juđê juăt kơ ư-ang Abraham, khan Abraham kĕ kiơ̆ tôm tơdrong juăt 'Bok Kei-Dei pơkă, na 'Bok Kei-Dei lăp đon kơ sư. Mă-lei 'Bok Kei-Dei ưh kơ tơchĕng thoi noh ôh. 3'Bok Kei-Dei lăp đon yua kơ minh tơdrong sư lui đĕch. Bơ̆n băt tơdrong noh yua kơ sơ̆p hla bơar 'Bok Kei-Dei khan thoi âu: “Abraham đei đon lui păng gơnang kơ 'Bok Kei-Dei, na 'Bok Kei-Dei jô̆ sư bơngai 'lơ̆ng tơpăt.”
4Bĭ dah bơngai bu jang kơ đe, đe apah sư jên dah tơmam, noh ưh kơ sĭ đe mơnat ăn đĕch ôh, đe apah yua kơ tơdrong sư jang. 5Bơ̆n bơngai yoch mă-lei dah bơ̆n lui păng gơnang kơ Sư tơpă, Sư kư̆m jô̆ bơ̆n bơngai 'lơ̆ng tơpăt. Mă-lei noh ưh kơ sĭ Sư apah yua kơ bơ̆n kiơ̆ dôm tơdrong juăt Sư pơkă ôh, Sư mơnat yua kơ bơ̆n lui păng gơnang kơ Sư.
6Tơdrong 'bok Đawit sơ̆ kư̆m thoi noh mơ̆n. 'Bok Đawit khan dôm lu bơngai mă ưh kơ gơnang kơ akâu sư kơdih wă kiơ̆ tơdrong juăt 'Bok Kei-Dei pơkă, mă-lei gơnang kơ 'Bok Kei-Dei, 'Bok Kei-Dei kư̆m mơnat jô̆ lu sư bơngai 'lơ̆ng tơpăt na lu bơngai noh hiôk tơpă. Tơdrong sư pơma noh sơ̆ thoi âu:
7“Dôm lu bơngai mă 'Bok Kei-Dei pơklaih yoch,
dôm lu bơngai noh boih pŭn dêh.
8Dôm lu bơngai noh 'Bok Kei-Dei huay pă jô̆ yo kơ lu sư boih, na lu sư hiôk hơiă 'nă hal tơpă.”
9Tơdrong pŭn noh ưh kơ sĭ Sư ăn pôm lu bơngai kăt tơdra akar đĕch ôh, Sư ăn kơ lu bơngai mă ưh kơ kăt tơdra akar hai mơ̆n, thoi bơ̆n băt boih 'Bok Kei-Dei jô̆ Abraham bơngai 'lơ̆ng tơpăt yua kơ minh tơdrong sư lui đĕch. 10Kơplah 'Bok Kei-Dei jô̆ kơ Abraham bơngai 'lơ̆ng tơpăt noh sơ̆, đơ̆ng rŏng kơ Abraham kăt tơdra akar dah adrol kơ Abraham kăt tơdra akar? 'Bok Kei-Dei jô̆ sư bơngai 'lơ̆ng tơpăt adrol kơ sư kăt tơdra akar ưh kơ sĭ đơ̆ng rŏng ôh. 11'Bok Kei-Dei athei Abraham kăt tơdra akar sơ̆, wă kơ tơbăt tơdra tơdrong 'Bok Kei-Dei jô̆ sư bơngai 'lơ̆ng tơpăt yua kơ sư lui păng gơnang kơ 'Bok Kei-Dei tơpă. 'Bok Kei-Dei athei Abraham pơm thoi noh wă kơ Abraham pơm 'bă kơ 'bar khŭl bơngai. Khŭl mă mônh lu bơngai ưh kơ kăt tơdra akar, mă-lei 'Bok Kei-Dei kư̆m jô̆ sư bơngai 'lơ̆ng tơpăt yua kơ lu sư lui păng gơnang kơ 'Bok Kei-Dei tơpă. 12Khŭl mă 'bar wă khan lu bơngai mă kăt tơdra akar, 'Bok Kei-Dei jô̆ lu sư bơngai 'lơ̆ng tơpăt mơ̆n, yua kơ lu sư lui kơjăp thoi 'bok Abraham bơ̆n lui adrol kơ sư kăt tơdra akar sơ̆.
Tơdrong 'Bok Kei-Dei pơkă kơ Abraham
13Sơ̆ 'Bok Kei-Dei pơkă khan wă ăn kơ Abraham păng lu kon sâu sư pơgơ̆r jơ̆p kơ teh đak. 'Bok Kei-Dei pơkă kơ Abraham thoi noh sơ̆ yua kơ Abraham lui păng gơnang kơ 'Bok Kei-Dei tơpă, na 'Bok Kei-Dei jô̆ sư bơngai 'lơ̆ng tơpăt; ưh kơ sĭ yua kơ Abraham kĕ kiơ̆ tôm tơdrong juăt Sư pơkă ôh. 14Tơdrong pơgơ̆r teh đak, tơ̆ng 'Bok Kei-Dei ăn kơ lu bơngai mă gơnang kơ akâu sư kơdih wă kiơ̆ tơdrong juăt Sư, lei dang 'Bok Kei-Dei pơkă ưh kơ 'blep kơ tơdrong Sư pơkă khan wă ăn kơ lu bơngai mă lui păng gơnang kơ Sư. 15Dôm lu bơngai mă gơnang kơ akâu sư kơdih wă kiơ̆ tơdrong juăt 'Bok Kei-Dei pơkă sơ̆, lu sư trŏ kơ 'Bok Kei-Dei wă phak, yua kơ lu sư ưh kơ kĕ kiơ̆ tơdrong juăt 'Bok Kei-Dei pơkă. Tơ̆ng ưh kơ đei tơdrong juăt, bơ̆n ưh kơ băt pơm yoch kơ tơdrong juăt ôh.
16'Bok Kei-Dei pơkă khan wă ăn kơ lu kon sâu Abraham pơgơ̆r jơ̆p kơ teh đak. Tơdrong Sư pơkă noh, Sư wă ăn kơ bơngai bu mă lui kơ Sư; yua kơ Sư mơnat, na Sư ăn. Lu bơngai Juđê mă adrin kiơ̆ tơdrong juăt Sư pơkă, wă khan lu bơngai mă gơnang kơ Sư hăm đĭ jơhngơ̆m, lu bơngai noh Sư ăn. Mă-lei ưh kơ sĭ Sư ăn pôm lu đe noh đĕch ôh. Sư ăn kơ đĭ-đăng hăm lu bơngai tơmoi hai, wă khan lu bơngai mă lui 'blep trŏ thoi 'bok bơ̆n Abraham sơ̆. Thoi noh na Abraham boih pơm 'bok kơdră 'bă tơm đĭ-đăng kơ lu bơ̆n sơ̆. 17Yua kơ lăm sơ̆p hla bơar 'Bok Kei-Dei khan sơ̆ thoi âu: “Inh gô ăn kơ ih pơm 'bă kơ đĭ-đăng teh đak.”
'Bok Kei-Dei khan thoi noh na Abraham lui kơ nơ̆r 'Bok Kei-Dei, sư băt kơ 'Bok Kei-Dei gơh ăn kơ bơngai lôch gơh iung arih păng gơh pơjing tôm tơdrong hăm nơ̆r Sư pơma đĕch.
18-19'Bok Kei-Dei pơkă wă ăn kơ sư pơm 'bă kơ đĭ-đăng teh đak păng khan kơ sư, kon sâu sư ning-mônh lơ thoi lĕ sơnglŏng tơ plĕnh. Kơplah noh sơ̆ Abraham sư đei minh-hrĕng sơnăm boih, mă-lei sư ưh tam mă đei kon ôh. Sư kră pă kĕ boih, akâu sư dang lĕ kơ lôch. Gah akăn sư yă Sara kư̆m kră mơ̆n păng sư akâu pôm tăm, thoi yơ 'Bok Kei-Dei pơkă kơ sư khan pơm 'bă kơ đĭ-đăng teh đak? Tơdrong noh, tơ̆ng bơ̆n, ưh kơ gan wă lui ôh. Mă-lei sư lui kơ nơ̆r 'Bok Kei-Dei pơkă kơ sư noh, sư ưh kơ hiơt ôh dôm tơdrong 'Bok Kei-Dei pơkă.
20Păng đon sư ưh kơ tơchĕng wă lui dah ưh ôh, sư kư̆ kơ lui dôm tơdrong 'Bok Kei-Dei pơkă kơ sư rai đunh rai kơjăp, rai ư-ang 'Bok Kei-Dei. 21Sư băt tơpă 'Bok Kei-Dei gô pơm 'blep thoi Sư pơkă wă ăn kơ sư. 22Yua kơ sư lui na sơ̆p hla bơar 'Bok Kei-Dei khan: “Abraham đei đon lui păng gơnang kơ 'Bok Kei-Dei, na 'Bok Kei-Dei jô̆ sư bơngai 'lơ̆ng tơpăt.”
23Mă-lei tơdrong chih roi noh ưh kơ sĭ jô̆ kơ Abraham đĕch ôh. 24Sư jô̆ kơ bơ̆n hai mơ̆n, dah bơ̆n lui păng gơnang kơ Sư hăm đĭ jơhngơ̆m klơm klak tơpă. Sư boih tơiung arih Yŏng bơ̆n Yêsu Krist đơ̆ng lôch. 25Yêsu lôch tang yua kơ tơdrong yoch bơ̆n, 'Bok Kei-Dei tơiung arih Sư, wă ăn kơ bơ̆n jing 'lơ̆ng tơpăt hăm Sư.
Dôm lu bơngai lui kơ Yêsu oei hiôk hăm 'Bok Kei-Dei
Currently Selected:
Rom 4: bdq
Highlight
Copy
Compare
Share
Want to have your highlights saved across all your devices? Sign up or sign in
©Bahnar Bible Association. All rights reserved.