Rom 13
13
1Đĭ-đăng kơ bơ̆n athei chu yom kơ bơngai mă pơgơ̆r bơ̆n. Tơ̆ng 'Bok Kei-Dei ưh kơ ăn, ưh kơ đei bu gơh pơgơ̆r. Đĭ-đăng lu bơngai pơgơ̆r đơ̆ng 'Bok Kei-Dei ăn ngăl. 2Thoi noh tơ̆ng bu ưh kơ chu yom kơ bơngai mă pơgơ̆r bơ̆n, bơngai noh dang sư ưh kơ chu yom kơ 'Bok Kei-Dei, yua kơ lu bơngai noh đơ̆ng 'Bok Kei-Dei ăn pơgơ̆r; na tơ̆ng bu ưh kơ chu, đe rôp phak bơngai noh. 3Lu bơngai pơgơ̆r ưh kơ sĭ sư wă rôp phak lu bơngai pơm 'lơ̆ng ôh, sư rôp phak lu bơngai pơm kơnê̆. Tơ̆ng bơ̆n wă huay kơ hli kơ lu bơngai pơgơ̆r, bơ̆n athei pơm 'lơ̆ng na lu sư bơnê. 4Lu bơngai pơgơ̆r noh lu sư dang jang tơdrong 'Bok Kei-Dei, wă kơ kon bơngai arih hiôk-hian. 'Noh na tơ̆ng bơ̆n pơm kơnê̆, bơ̆n hli kơ lu sư. Lu bơngai pơgơ̆r chĕp tak đao, lu sư trŏ tơdrong gơh chĕp. Yua kơ lu sư jang tơdrong 'Bok Kei-Dei, lu sư gơh rôp phak lu bơngai pơm kơnê̆ mă 'Bok Kei-Dei ưh kơ lăp đon. 5Thoi noh na bơ̆n athei chu yom kơ lu bơngai mă pơgơ̆r bơ̆n, wă kơ 'Bok Kei-Dei lăp đon kơ bơ̆n păng wă kơ bơ̆n đei jơhngơ̆m hiôk, yua kơ bơ̆n pơm trŏ. 6Thoi noh na mă sư iŏk thuê̆ đơ̆ng bơ̆n trŏ tơpă, yua kơ lu sư dang jang tơdrong 'Bok Kei-Dei. 7Păng yua kơ thoi noh na tơdrong kiơ trŏ kơ bơ̆n ăn, bơ̆n athei ăn; 'bok pơgơ̆r sư wă iŏk thuê̆ đơ̆ng bơ̆n, bơ̆n athei ăn kơ sư; sư wă kơ bơ̆n pơm kiơ, bơ̆n chu pơm.
Tơdrong 'mêm kơ bôl buăl ưh kơ tôch
8Tơdrong bơ̆n hre kơ đe, bơ̆n athei jah ăn na jah tôch. Mă gah tơdrong 'mêm kơ bôl buăl ưh kơ tôch ôh. Bơngai bu 'mêm kơ bôl buăl, bơngai noh ưh kơ hŭt ôh dôm tơdrong juăt 'Bok Kei-Dei pơkă. 9Tơdrong juăt 'Bok Kei-Dei pơkă sơ̆ thoi âu: Iĕm 'nĕ plah klo kăn đe, 'nĕ pơlôch bơngai, 'nĕ kơ tơtông, 'nĕ kơ 'nhĕng mŭk tơmam đe, mă tơdrong juăt nai kư̆m thoi tơdrong juăt Sư pơkă âu: Athei 'mêm kơ bôl buăl thoi iĕm 'mêm akâu kơdih. 10'Noh na tơ̆ng bơ̆n 'mêm kơ bôl buăl, bơ̆n ưh kơ pơm kơnê̆ kơ bôl buăl ôh. Tơ̆ng bơ̆n 'mêm kơ bôl buăl bơ̆n gô răk đĭ dôm tơdrong 'Bok Kei-Dei pơkă kơ bơ̆n noh.
11Dôm tơdrong inh bơtho iĕm âu, bơ̆n athei răk pơm kiơ̆ tơpă, yua kơ Kră Yang Yêsu Krist wă jê̆ jur boih; tơdrong noh iĕm kư̆m băt mơ̆n. Tơm hmơm bơ̆n lui sơ̆, năr Yêsu Krist jur oei đunh 'biơ̆; mă dang ei ưh pă đunh boih. Na bơ̆n athei adrin kral ling-lang 'nĕ pă nŏng kơ tep.
12Dang ei oei măng mu, ưh pă đunh 'năr gô lĕch. Yua kơ thoi noh na bơ̆n 'nĕ pă oei tơ lăm măng mu, bơ̆n athei oei tơ hơdah ling-lang wă kơ gơh tơblah păng yang kơnê̆. 13Bơ̆n athei pơm mă 'lơ̆ng thoi bơngai jang kơ'năr, 'nĕ pă et sik suai hli kơ pơm kư̆ kă; drŏ-nglo drŏ-kăn kư̆m 'nĕ kơ ngôi kư̆ kă; 'nĕ pơjah pơjăng păng đe, 'nĕ kơ 'nhĕng đe. 14Bơ̆n athei pơm 'lơ̆ng thoi Kră Yang bơ̆n Yêsu Krist sơ̆, Sư pơm 'lơ̆ng ling-lang. Bơ̆n 'nĕ kơ ăn akâu bơ̆n pơlung đon bơ̆n pơm ưh kơ 'lơ̆ng.
'Nĕ jô̆ băl kơ tơdrong sŏng sa
Currently Selected:
Rom 13: bdq
Highlight
Copy
Compare
Share
Want to have your highlights saved across all your devices? Sign up or sign in
©Bahnar Bible Association. All rights reserved.