Jo 2
2
Anih oei lu adrĕch adrung Isơrael
1Kră Yang khan kơ Môis păng Arôn: 2Adrĕch bơngai Isơrael rim 'nu oei jê̆ hla-kơ lu sư kơdih, oei 'bơ̆t ala che đe chih adrĕch adrung sư kơdih; lu sư oei tơklă băl anăp păng tăp dăr Bơsŭn Anih Akŭm.
3Kơđông linh Juđa oei tơ gah hơlĕch gah măt 'năr lĕch, đei hla-kơ khŭl lu sư. Yŏng kơdră adrĕch bơngai Juđa noh Nahsôn, kon drŏ-nglo Minađap. 4Khŭl linh lu sư đei chih jô̆ boih, đei tơpơh-jĭt puăn-rơbâu tơdrâu-hrĕng 'nu.
5Adrĕch bơngai Isakar kơđông lu sư oei jê̆ Juđa. Yŏng kơdră sư Nathanel, kon drŏ-nglo Suar; 6khŭl linh đe chih jô̆ boih pơđăm-jĭt puăn-rơbâu puăn-hrĕng 'nu.
7Đang kơ noh adrĕch Sabulôn; yŏng kơdră sư Êliap, kon drŏ-nglo Hêlôn; 8păng khŭl linh sư đei chih jô̆ boih pơđăm-jĭt tơpơh-rơbâu puăn-hrĕng 'nu;
9Đĭ-đăng bơngai oei lăm kơđông Juđa kiơ̆ thoi lu sư đei jô̆ minh-hrĕng tơhngam-jĭt tơdrâu-rơbâu puăn-hrĕng 'nu; lu sư jing khŭl yak adrol ba trong kơplah lu sư yak năm.
10Hla-kơ păng kơđông linh Rubên kiơ̆ kơ khŭl lu sư oei tơ gah gơal. Yŏng kơdră adrĕch Rubên noh Êlisur kon drŏ-nglo Sêdur; 11păng linh sư, đei chih jô̆, puăn-jĭt tơdrâu-rơbâu pơđăm-hrĕng 'nu.
12Adrĕch Simêôn kư̆m athei oei jê̆ Rubên. Yŏng kơdră bơngai adrĕch Simêôn noh Sêlumiel kon drŏ-nglo Surisadai; 13lu linh sư, đe jô̆ pơđăm-jĭt tơsĭn-rơbâu pêng-hrĕng 'nu.
14Đơ̆ng noh đei adrĕch Gat, Yŏng kơdră adrĕch Gat noh Êliasap kon drŏ-nglo Rêuel; 15lu linh sư, đe jô̆ puăn-jĭt pơđăm-rơbâu tơdrâu-hrĕng pơđăm-jĭt 'nu.
16Đĭ-đăng bơngai oei lăm anih linh Rubên, kiơ̆ thoi lu sư đei chih jô̆ minh-hrĕng pơđăm-jĭt mônh rơbâu puăn-hrĕng pơđăm-jĭt 'nu. Lu khŭl sư 'nâu athei yak năm mă 'bar.
17Đơ̆ng rŏng kơ noh Bơsŭn Anih Akŭm pôk năm hơdai lu adrĕch Lêwi, oei tŏk-bŏk anih lu khŭl bơngai nai; kơđông khŭl Lêwi gô yak kiơ̆ thoi đei asong boih, rim 'nu kiơ̆ kơ khŭl păng kiơ̆ kơ hla-kơ kơdih.
18Hla-kơ khŭl kơđông linh Êphraim păng lu linh sư athei oei tơ gah bơmơ̆t. Yŏng kơdră bơngai Êphraim noh Êlisama kon drŏ-nglo Amihut; 19păng khŭl linh sư, kư̆ kiơ̆ kơ đe chih jô̆, đei puăn-jĭt rơbâu pơđăm-hrĕng 'nu.
20Adrĕch Manase athei oei jê̆ anih adrĕch Êphraim. Yŏng kơdră adrĕch Manase noh Gamaliel, kon drŏ-nglo Pêdasur; 21păng khŭl linh sư, kiơ̆ kơ đei chih jô̆, đei pêng-jĭt 'bar-rơbâu 'bar-hrĕng 'nu.
22Đơ̆ng noh adrĕch adrung Bênjamin. Yŏng kơdră adrĕch Bênjamin noh Abidan kon drŏ-nglo Gideôni, 23khŭl linh sư, kiơ̆ thoi đe jô̆, đei pêng-jĭt pơđăm-rơbâu puăn-hrĕng 'nu.
24Thoi noh, kiơ̆ kơ đe đei jô̆ khŭl linh hăm lăm kơđông Êphraim, kiơ̆ kơ khŭl linh, đei minh-hrĕng tơhngam-rơbâu minh-hrĕng 'nu: Khŭl sư athei năm kiơ̆ mă pêng.
25Hla-kơ kơđông linh Đan păng lu linh sư athei oei gah yă-nơ̆m. Yŏng kơdră adrĕch Đan noh Ahiser, kon drŏ-nglo Amisadai; 26khŭl linh sư đe jô̆ đĭ-đăng đei tơdrâu-jĭt 'bar-rơbâu tơpơh-hrĕng 'nu.
27Adrĕch Aser khŭl kơđông sư oei jê̆ Đan. Yŏng kơdră adrĕch Aser noh Pagiel, kon drŏ-nglo Ôkran; 28khŭl linh sư, đe jô̆ đĭ-đăng, puăn mơjĭt-mônh rơbâu pơđăm-hrĕng 'nu.
29Đơ̆ng noh adrĕch Neptali. Yŏng kơdră Neptali noh Ahira, kon drŏ-nglo Ênan; 30păng khŭl linh sư, đe jô̆ đĭ-đăng, pơđăm-jĭt pêng-rơbâu puăn-hrĕng 'nu.
31Thoi noh, kiơ̆ kơ đe đei jô̆ kiơ̆ kơ kơđông khŭl linh Đan, đei minh-hrĕng pơđăm-jĭt tơpơh-rơbâu tơdrâu-hrĕng 'nu. Lu sư kiơ̆ kơ hla-kơ lu sư kơdih khŭl adrĕch Đan lu sư yak tuch-luch.
32'Nâu adrĕch bơngai Isơrael đe đei jô̆ boih kiơ̆ kơ adrĕch 'bă lu sư kơdih. Lăm rim kơđông linh kiơ̆ kơ khŭl linh đe jô̆ đei đĭ-đăng tơdrâu-hrĕng pêng-rơbâu pơđăm-hrĕng pơđăm-jĭt 'nu. 33Mă-lei adrĕch bơngai Lêwi đe ưh kơ chih jô̆ ôh hơdai lăm sơ̆p hla bơar adrĕch Isơrael, kiơ̆ thoi nơ̆r Kră Yang đei tơtă kơ Môis.
34Adrĕch kon pơlei Isơrael pơm rok kiơ̆ kơ nơ̆r Kră Yang đei tơtă ăn boih kơ Môis, na lu sư pơm kơđông anih kiơ̆ kơ hla-kơ lu sư kơdih păng lu sư yak nơnăm kư̆m kiơ̆ kơ adrĕch 'bă lu sư kơdih.
Currently Selected:
Jo 2: bdq
Highlight
Copy
Compare
Share
Want to have your highlights saved across all your devices? Sign up or sign in
©Bahnar Bible Association. All rights reserved.