Mat 9
9
1Đơ̆ng noh Yêsu brŏk tơ pơlei Sư kơdih pah to đak. 2Tơ noh đe tung ba minh 'nu bơngai hơwen hơwo kơpal anhŭn anhăk tơ Yêsu. Yêsu 'bôh tơdrong lui đe noh 'lơ̆ng tơpă na Sư khan kơ bơngai hơwen hơwo ei thoi âu: “Ơ dăm, hiôk bĕ ih, yua kơ tơdrong yoch ih Inh pơklaih đĭ boih.” 3Lu thây bơtho tơdrong juăt đe Juđê kơtơ̆ng sư pơma thoi noh na lu sư mơmơnh lăm to khan: “Sư pơma blông kơ 'Bok Kei-Dei.” 4Yêsu băt kơ lu sư pơma mơmơnh lăm to jô̆ kơ Sư tơdrong 'noh na Sư khan: “Liơ iĕm pơma mơmơnh lăm to, khan Inh pơma kơnê̆? 5Inh khan kơ bơngai hơwen hơwo âu tơdrong yoch sư Inh pơklaih đĭ boih, tơdrong 'noh dah iĕm 'bôh Inh athei sư iung yak, na sư iung yak hloi, 'noh iĕm kư̆m băt kơ Inh gơh pơklaih yoch sư mơ̆n. Yua kơ kiơ iĕm pơma mơmơnh khan Inh pơma blông? 6Na dang ei Inh wă pơklaih jĭ sư, wă tơbăt ăn kơ iĕm băt kơ Inh Kon Bơngai gơh pơklaih tơdrong yoch kon bơngai ala teh âu.” Na Yêsu khan kơ bơngai hơwen hơwo ei thoi âu: “Iung bĕ, chĕp anhŭn ih brŏk tơ hnam.” 7Bơngai hơwen noh iung yak brŏk hloi tơ hnam sư. 8Lu đe oei kiơ̆ ei 'bôh tơdrong noh, lu sư hli na ư-ang kơ 'Bok Kei-Dei khan: “Bơngai âu 'Bok Kei-Dei ăn wă pơklaih yoch păng jĭ jăn kon bơngai tơpă.”
Yêsu pơtơm Mathiơ kiơ̆ Sư
9Yêsu năm ataih 'biơ̆ đơ̆ng noh, na Sư 'bôh Mathiơ oei jang 'bơ̆t hnam thuê̆. Yêsu pơtơm sư khan: “Bĕ kiơ̆ Inh.” Na sư gruih iung kiơ̆ hloi Yêsu. 10Đơ̆ng noh na Yêsu năm sŏng sa tơ hnam Mathiơ. Tơ ei đei lơ bơngai iŏk jên thuê̆ hăm bơngai pơm yoch sŏng sa hơdai Yêsu hăm lu bơngai pơhrăm păng Sư. 11Lu bơngai Pharisi 'bôh thoi noh na jet lu bơngai pơhrăm păng Sư thoi âu: “Yua kơ kiơ Yêsu sŏng sa hơdai păng lu bơngai iŏk jên thuê̆ hăm lu bơngai pơm yoch?” 12Yêsu kơtơ̆ng hloi lu sư pơma thoi noh na Yêsu khan kơ lu sư thoi âu: “Lu bơngai liĕm akâu ưh kơ kăl kơ 'bok pơgang ôh, pôm lu bơngai jĭ jăn đĕch kăl kơ 'bok pơgang. 13Lăm sơ̆p hla bơar 'Bok Kei-Dei khan sơ̆ thoi âu: ‘Tơdrong iĕm soi sơmah kơ Inh ưh kơ kăl ôh, Inh wă kơ iĕm 'mêm mơnat dih băl, noh kăl hloh kơ tơdrong iĕm soi sơmah kơ Inh.’ Na iĕm tơchĕng lăng tơdrong 'noh bĕ, wă kơ iĕm băt 'mêm mơnat kơ đĭ-đăng bơngai. Inh jur tơ âu ưh kơ sĭ chă wơ̆n lu bơngai 'lơ̆ng ôh. Inh năm tơ âu wă wơ̆n chă lu bơngai yoch wă kơ sư tơbral kơdih tơdrong yoch sư.”
Đe apinh Yêsu gah tơdrong ơ̆t kơ por
14Kơplah noh lu bơngai pơhrăm păng Yôhan mă pơm 'batem, lu sư năm jet Yêsu thoi âu: “Yua kơ kiơ nhôn hăm lu bơngai Pharisi ơ̆t kơ por wă kơkuh kơ 'Bok Kei-Dei, mă lu bơngai pơhrăm păng Ih ưh kơ ơ̆t?”
15Na Yêsu pơma pơtih gia kơ lu sư thoi âu: “Kơplah đe pơkong kơ bơngai mă iŏk akăn, lu bôl bơngai mă iŏk akăn noh chhôk ngă 'nă hal dêh, lu sư ưh kơ đei bu ơh sơ'ngon ơ̆t kơ por ôh. Pôm ning-mônh đĕch đe wă rôp anhăk bơngai mă iŏk akăn noh đơ̆ng bôl sư, 'bơ̆t ei kơnh trŏ kơ lu bôl sư ơh sơ'ngon ơ̆t kơ por.
Yêsu bơtho tơdrong 'nao phara kơ tơdrong đe juăt sơ̆
16Yêsu pơma pơtih gia dơ̆ng gah tơdrong đêl lu sư jet noh hei thoi âu: “Kơbĭ bu 'maih klĕp che 'nao tam mă tơtrŭt tơ che ao so. Tơ̆ng bu klĕp, ưh kơ jor che 'nao gô hek che ao so să hloh kơ noh dơ̆ng. 17Kư̆m thoi noh mơ̆n kơbĭ bu 'maih tring sik 'nao 'băt kơtang mong tơ kơdŭng akar so. Tơ̆ng bu tring sik 'nao 'băt kơtang noh tơ kơdŭng akar so pă jor gô pơchah. Đak sik gô lĕch hiong, kơdŭng gô pơchah răm. Tơ̆ng bu wă tring, sư athei tring mong sik 'nao tơ kơdŭng akar 'nao, yua kơ kơdŭng akar 'nao 'noh kơjăp.”
Yêsu tơiung arih kon Jairut lôch păng pơklaih minh 'nu drŏ-kăn tuh pham
18Kơplah Yêsu oei pơma tơdrong 'noh, na blư 'bôh minh 'nu kră wei-lăng hnam akŭm đe Juđê sơtơ̆p kŭl-tăng kơkuh păng khan: “Kon adruh inh 'nao lôch, inh apinh Ih năm chro ti pel akâu sư wă kơ sư iung arih dơ̆ng.”
19Yêsu iung kiơ̆ hloi sư, lu bơngai pơhrăm kư̆m kiơ̆ Sư mơ̆n. 20Đei minh 'nu bơngai drŏ-kăn tuh pham mơjĭt-'bar sơnăm boih, sư kiơ̆ đơ̆ng rŏng wă pel tơdrơi ao Yêsu. 21Drŏ-kăn noh sư tơchĕng khan: “Dah inh pel pôm ao Sư đĕch kư̆m klaih mơ̆n.” Na sư pel hloi ao Yêsu. 22Yêsu hue tơ rŏng 'bôh duch ei păng khan: “Ơ duch, ih 'nĕ kơ hli, kơlih kơ ih lui na ih klaih.” Drŏ-kăn noh klaih hloi 'bơ̆t anăp Sư. 23Lăp Yêsu truh tơ hnam kră wei-lăng hnam akŭm, Sư mơ̆t tơ hnam 'bôh bơngai hlôm tơgiĕp, bơngai nhơ̆m hmoi tơjrông tơjrang mang. 24Sư khan: “Iĕm lĕch đĭ tơ 'ngoaih, bơngai adruh âu ưh kơ lôch ôh, sư tep đĕch.” Na đe ei hiĕk kơ Sư. 25Sư pơpuh đe lĕch đĭ tơ 'ngoaih boih na Yêsu mơ̆t tơ anih đe pơdong atâu. Yêsu rôp ti sư, na bơngai noh iung arih hloi. 26Lu đe kơtơ̆ng tơdrong 'noh năm chă roi jơ̆p kơ tơring ei.
Yêsu pơklaih 'bar 'nu bơngai măt tol
27Yêsu lĕch đơ̆ng noh, kơplah oei rok trong đei 'bar 'nu bơngai măt tol năm kiơ̆ Sư. Na bre sư pơma 'bơ̆r re khan: “Ơ 'Bok Krist Kon Sâu pơtao Đawit, apinh Ih mơnat kơ nhi 'biơ̆ bĕ.”
28Lăp Yêsu mơ̆t tơ hnam, bre sư kư̆m mơ̆t kiơ̆ mơ̆n. Na Yêsu jet bre sư khan: “Biĕm hăm lui kơ Inh gơh pơklaih biĕm?” Bre sư khan: “Lui.” 29Na Yêsu pel măt bre sư păng khan: “Yua kơ biĕm lui na klaih.” 30Đang Yêsu pơma thoi noh, na măt bre sư klaih hloi. Yêsu khan tơdrăp kuă ăn bre sư roi kơ đe ră. 31Mă-lei bre sư lĕch đơ̆ng noh năm chă roi kơ đe tơdrong Yêsu pơklaih măt bre sư jơ̆p-jang kơ tơring ei.
Yêsu pơklaih minh 'nu bơngai kơmlo
32Lăp bre noh 'nao wă lĕch tơ nai, đei bơngai nai năm ba minh 'nu bơngai yang mơ̆t pơm kơ sư kơmlo. 33Na Yêsu pơpuh yang kơnê̆ ei lĕch đơ̆ng akâu bơngai noh na bơngai noh gơh pơma hloi. Đĭ-đăng lu bơngai tơpôl oei kiơ̆ ei lăng hlĭch, na lu sư khan: “Dêh char Isơrael bơ̆n đơ̆ng sơ̆ ưh kơ đei bu gơh pơm tơdrong mơsêh mơyang thoi âu ôh ii?” 34Mă-lei lu bơngai Pharisi khan: “'Noh đơ̆ng yŏng pơgơ̆r yang kơnê̆ tơgŭm sư na sư gơh pơpuh lu yang kơnê̆ noh.”
Yêsu mơnat kơ kon pơlei pơla
35Yêsu năm chă bơtho tơ rim pơlei tih iĕ, tơ lăm hnam akŭm, bơtho gah tơdrong 'nao 'lơ̆ng 'Bok Kei-Dei wă pơgơ̆r bơ̆n. Păng Sư pơklaih rah dôm tơdrong jĭ jăn kon pơlei pơla pơmat-tat. 36Yêsu 'bôh lu bơngai tơpôl noh Sư mơnat dêh, lu sư oei hli sơ'ngon đon ưh kơ băt pơm thoi yơ, dang lĕ kơ triu ưh kơ đei tơ'ngla wei-lăng. 37Yêsu 'bôh bơngai tơpôl lơ noh, na Sư pơma pơtih gia kơ lu bơngai pơhrăm păng Sư gah tơdrong đei lơ bơngai tam mă lui, mă-lei hui bơngai năm bơtho lu sư: “'Bôh ră 'ba lơ dôm noh, mă-lei hui bơngai wă năm kĕch iŏk. 38Thoi noh na bơ̆n athei adrin krao khan apinh tơ'ngla tơm mir âu wă wơh lơ bơngai năm tơgŭm kĕch iŏk 'ba âu.”
Yêsu wơh mơjĭt-'bar 'nu bơngai pơhrăm păng Sư năm chă bơtho tơdrong 'nao 'lơ̆ng
Currently Selected:
Mat 9: bdq
Highlight
Copy
Compare
Share
Want to have your highlights saved across all your devices? Sign up or sign in
©Bahnar Bible Association. All rights reserved.