Mat 10
10
1Yêsu krao mơjĭt-'bar 'nu bơngai pơhrăm păng Sư, ăn kơ lu sư gơh pơpuh tơlĕch lu yang kơnê̆ đơ̆ng akâu bơngai păng ăn kơ lu sư gơh pơklaih rim tơdrong jĭ jăn kon bơngai. 2Na âu jô̆ tôm lu anăn mơjĭt-'bar 'nu lu sư: Simôn mă Yêsu anăn Pêtrôs, sư pơm tih 'biơ̆ kơ bôl sư; oh sư Andrê; Yakơ hăm oh sư Yôhan. 'Bă bre sư Sêbêđê. 3Đơ̆ng noh lu đe Philip hăm 'Barthôlêmi; Thôm hăm Mathiơ, bơngai mă iŏk jên thuê̆ sơ̆; Yakơ kon Alphê hăm Thađê; 4Simôn mă kiơ̆ khŭl đe Sêlôt sơ̆ hăm Juđa Ikariôt, bơngai mă plơ̆ plĕch kơ Yêsu.
5Yêsu wơh mơjĭt-'bar 'nu bơngai pơhrăm păng Sư âu, Sư khan: “Iĕm 'nĕ kơ năm tơring đe mă ưh kơ khŭl Isơrael păng 'nĕ kơ năm tơring đe Samri. 6Iĕm athei năm tơ tơring bơngai Isơrael bơ̆n, yua kơ lu sư dang triu jrok trong. 7Iĕm năm bơtho lu sư khan: ‘Năr âu trŏ năr 'Bok Kei-Dei wă pơgơ̆r iĕm boih.’ 8Păng iĕm chă pơklaih hloi lu bơngai jĭ jăn, tơiung arih lu bơngai đơ̆ng lôch, pơklaih lu bơngai jĭ chin păng pơpuh tơlĕch lu yang kơnê̆ đơ̆ng akâu bơngai. Inh asong đĕch tôm tơdrong iĕm gơh pơm noh. Na iĕm kư̆m bơtho asong đe thoi Inh asong iĕm mơ̆n, ưh kơ iŏk jên ôh. 9Păng 'nĕ kơ chĕp ba jên. 10'Nĕ kơ chĕp kơdŭng tah tơmam, dah hrŭk 'bar blah ao, dah chĕp hiă chơkhŏ, dah 'long jra, yua kơ iĕm dang bơngai jang sa apah, iĕm jang tơgŭm đe, đe 'me sa iĕm.
11“Iĕm truh tơ pơlei ayơ, mă pơlei tih iĕ, iĕm jet lăng tơ ei bơngai bu 'lơ̆ng na iĕm oei hloi tơ hnam bơngai noh truh tơ năr iĕm wă năm tơ pơlei nai. 12Lăp wă mơ̆t tơ hnam, iĕm khan: ‘'Bok Kei-Dei ăn kơ hnam iĕm chơt hiôk.’ 13Dah bơngai lăm hnam ei bơngai 'lơ̆ng tơpă, lei iĕm apinh 'Bok Kei-Dei ăn kơ hnam noh chơt hiôk khŏm khŏm; dah ưh, iĕm lê̆. 14Anih hnam ayơ dah pơlei ayơ ưh kơ sơng iŏk iĕm păng ưh kơ wă mơ̆ng tơdrong iĕm bơtho sư, thoi noh na lăp iĕm brŏk đơ̆ng pơlei 'noh iĕm sơpuih 'bruih tơ jơ̆ng iĕm tơbăt ăn kơ lu sư 'Bok Kei-Dei wă phak lu sư ning-mônh. 15Inh khan kơ iĕm tơpă, truh năr 'Bok Kei-Dei wă sek tơlang ning-mônh Sư gô phak kon pơlei Sôđôm păng kon pơlei Gômôrơ hơiơch 'biơ̆ kơ pơlei mă ưh kơ sơng iŏk iĕm, mă khan 'bar tŏ pơlei noh pơm kơnê̆ dêh ră sơ̆.
16“Inh wơh iĕm năm chă bơtho đe iĕm athei kơchăng hŏ, yua kơ dang lĕ wơh triu năm tơ kŏ-so. Na iĕm athei chă đon hơgei thoi 'bih, iŏk jơhngơ̆m dim dang kơtơp. 17Iĕm athei kơchăng, yua kơ đe gô rôp iĕm jao kơ lu kră sek tơlang păng tôn teh iĕm tơ hnam akŭm đe Juđê. 18Păng đe gô jao iĕm kơ lu 'bok tih păng 'bok pơtao yua kơ iĕm jang tơdrong Inh. Iĕm kư̆m gơh ră roi kơ lu sư păng roi kơ lu bơngai dêh đe tơdrong 'nao 'lơ̆ng Inh. 19Mưh đe rôp iĕm jao kơ lu kră sek tơlang, iĕm 'nĕ mah tơchĕng kơ tơdrong iĕm wă pơma kơ lu sư noh hŏ. 20Yua kơ đei Yang Bơhngol 'Lơ̆ng đơ̆ng 'Bă bơ̆n tơgŭm kơplah lăm iĕm pơma, ưh kơ sĭ kơ iĕm gơh pơma kơdih ôh.
21“Gô đei 'nhŏng jao oh sư bơngai lui tơ̆p mă đe pơlôch. Kư̆m đei mơ'nah 'bă sư jao kon sư tơ̆p mă đe pơlôch. Kư̆m đei mơ'nah kon sư hil plơ̆ kơ mĕ 'bă sư jao ăn kơ đe pơlôch. 22Đĭ-đăng bơngai gô areh arĕnh kơ iĕm yua kơ tơdrong jang Inh. Thoi noh bu wă adrin lui kơ Inh truh tôch, bơngai 'noh gô klaih. 23Dah đe pơm kơnê̆ kơ iĕm tơ pơlei âu, iĕm kơdâu bơtho pơlei nai dơ̆ng. Inh khan kơ iĕm tơpă, kơplah iĕm oei chă bơtho đe tam mă jơ̆p kơ dêh Isơrael, Inh Kon Bơngai jur boih.
24“Bơngai mă pơhrăm ưh kơ gơh pơhloh kơ 'bok thây. Bơngai đĭch ưh kơ layơ pơhloh kơ yŏng sư ôh. 25Dôm tơdrong đe pơm kơ 'bok thây, bơngai pơhrăm athei chu đe pơm kơ sư mơ̆n; dôm tơdrong đe pơm kơ yŏng sư, đĭch sư kư̆m athei chu mơ̆n. Dah đe mah jô̆ kơ Inh yang Belsêbul khŭl yang kơnê̆, đe jô̆ kơ iĕm kang loi.
26“Mă-lei iĕm 'nĕ mah hli kơ lu sư ôh, yua kơ dôm tơdrong 'lơ̆ng đe gô băt, dôm tơdrong hrĕp đe gô 'bôh ning-mônh. 27Thoi noh na tơdrong âu Inh bơtho kơdrô̆ iĕm, thoi lĕ kơ bơtho lăm măng mu ưh kơ đei bu băt, ưh kơ đei bu 'bôh. Mă-lei iĕm gô bơtho tơ hơdah măt 'năr, wă khan iĕm gô bơtho tơ anăp bôl lơ. 28Iĕm 'nĕ hli kơ đe pơlôch akâu iĕm, mă-lei bơhngol iĕm sư ưh kơ gơh pơlôch ôh. Iĕm athei hli kơ 'Bok Kei-Dei đĕch, Sư gơh pơrăm akâu iĕm hăm bơhngol iĕm tơ dơnâu ŭnh. 29Bơ̆n băt sem rĕch tĕch hơi dêh, 'bar tŏ lăp minh hlak jên, mă-lei 'Bok Kei-Dei kư̆m wei rong sư mơ̆n. Mă minh pôm păr huŏng tơ teh, Sư kư̆m băt mơ̆n. 30Sŏk bơ̆n Sư jô̆ băt tôm. 31Thoi noh na iĕm 'nĕ kơ hli, 'Bok Kei-Dei 'mêm kơ iĕm hloh kơ Sư 'mêm kơ sem rĕch.
Bu lui kơ Yêsu athei roi kơ đe
32“Bu roi kơ đe khan sư lui kơ Inh, Inh kư̆m roi kơ 'Bă Inh tơ plĕnh ti, bơngai 'noh sư lui kơ Inh tơpă. 33Bu hli kơ đe, mơlâu kơ đe na sư khan sư ưh kơ lui kơ Inh, Inh kư̆m roi kơ 'Bă Inh tơ plĕnh ti thoi noh mơ̆n.
Kon bơngai tơklah dih băl yua kơ Yêsu jur tơ teh sơ̆
34“Iĕm 'nĕ tơchĕng Inh jur tơ teh âu dang ei na kon bơngai wă jing hiôk-hian hloi. Ưh ôh. Inh jur tơ teh âu dang lĕ pơchĕp ăn kơ kon bơngai tak đao tơblah băl wă kơ hang nuih 'mơ̆i. 35Inh jur tơ teh âu na kon bơngai hil areh kơ tơduă bôl sư mă lui kơ Inh. Kon drŏ-nglo areh kơ 'bă sư yua kơ 'bă sư lui kơ Inh; kon drŏ-kăn areh kơ mĕ sư, mai sư areh kơ tơnei sư. 36'Nhŏng oh pôm hnam mă ưh kơ lui hil areh kơ 'nhŏng oh mă lui.
37“Bu 'mêm kơ mĕ 'bă sư hloh kơ sư 'mêm kơ Inh, bơngai 'noh ưh kơ trŏ kơ tơbôl hăm Inh ôh. Bu 'mêm kơ kon sư hloh kơ sư 'mêm kơ Inh, bơngai 'noh kư̆m ưh kơ trŏ wă tơbôl hăm Inh mơ̆n. 38Bu ưh kơ chu tôi 'long pơglang sư kơdih lôch kiơ̆ Inh, bơngai 'noh kư̆m ưh kơ trŏ wă tơbôl hăm Inh mơ̆n. 39Bu ưh kơ chu lôch yua kơ tơdrong Inh, bơngai 'noh lôch hoh hoh đĕch, ưh kơ yua kiơ ôh. Bu chu lôch yua kơ tơdrong Inh, bơngai 'noh gô arih ling-lang.
Kră Yang apah bơngai mă tơgŭm tơdrong jang Sư
40“Bu sơng iŏk iĕm, bơngai 'noh dang sơng iŏk Inh; bu sơng iŏk Inh, noh dang sư sơng iŏk 'Bă Inh mă wơh Inh. 41Bu sơng iŏk bơngai pơtruh nơ̆r 'Bok Kei-Dei, sư băt kơ bơngai noh pơtruh nơ̆r 'Bok Kei-Dei tơpă, bơngai 'noh gô đei tơdrong apah thoi 'Bok Kei-Dei apah bơngai mă pơtruh nơ̆r Sư noh. Bu sơng iŏk bơngai 'lơ̆ng tơpăt, sư băt kơ bơngai noh tơpăt tơpă, bơngai 'noh gô đei tơdrong apah thoi 'Bok Kei-Dei apah bơngai mă 'lơ̆ng tơpăt noh mơ̆n. 42Bơngai bu asong minh kơchŏk đak nhă kơ lu bôl bơ̆n mă pơm iĕ âu yua kơ bôl bơ̆n kiơ̆ Inh, bơngai 'noh 'Bok Kei-Dei gô apah sư tơpă.”
©Bahnar Bible Association. All rights reserved.