Lew 24
24
Khôi juăt gah ŭnh kơđeng păng 'bĕng
1Kră Yang khan kơ Môis: 2Tơtă bĕ kơ kon pơlei Isơrael athei chĕp ba đak rơmă ôliwơ rơgoh, wă tơ̆k ŭnh kơđeng, wă bơwei ŭnh kơđeng khơ̆ng hơnơ̆ng. 3Arôn gô wei ŭnh kơđeng noh lăm hnam akŭm tơ 'nguaih kơ che pĕng hom tơdrong pơgơ̆p wă kơ ŭnh kơđeng noh oei khơ̆ng ling-lang đơ̆ng kơsơ̆ âu truh pơgê dơning 'bơ̆t anăp Kră Yang; noh jơ̆ khôi juăt pơkă ling-lang đĭ chăl kơ adrĕch adrung lu iĕm. 4Arôn gô wei ŭnh kơđeng dan kơpal jơ̆ng kơđeng hăm maih. Wă kơ ŭnh kơđeng khơ̆ng hơnơ̆ng 'bơ̆t anăp Kră Yang. 5Ih athei iŏk tơpŭng pơtŏ tơ ŭnh pơm mơjĭt-'bar tŏ 'bĕng, minh pôm 'bĕng man iŏk 'bar lăm mơjĭt êpha tơpŭng.a 6Ih săp pơrĕng 'bĕng kơpal gơ'bang maih pơm 'bar trong minh trong tơdrâu tŏ, 'bơ̆t anăp Kră Yang. 7Iŏk rơmă rơgoh, dan kơpal rim trong wă kơ 'blŏk hơdơ̆r 'bĕng noh, thoi tơmam soi, yua 'buh hăm ŭnh pơyơ̆r 'bơ̆t anăp Kră Yang. 8Rim wơ̆t năr pơdơh Sa'bat Arôn gô săp pơrĕng 'bĕng âu ling-lang 'bơ̆t anăp Kră Yang, tơmam âu đơ̆ng kon pơlei pơla Isơrael pơyơ̆r, noh jơ̆ minh tơdrong pơgơ̆p ling-lang. 9Lu 'bĕng âu gô 'măn kơ Arôn păng lu kon drŏ-nglo sư, lu sư gô sa tơ anih 'lơ̆ng rơgoh, yua kơ tơmam 'măn kơ lu sư noh rơgoh, noh đơ̆ng lu tơmam soi yua 'buh hăm ŭnh pơyơ̆r kơ Kră Yang, noh jing tơdrong juăt pơkă ling-lang.
Gah tơdrong bơngai pơma blông
10Đei minh 'nu kon drŏ-nglo mĕ sư bơngai Isơrael 'bă sư bơngai Êyiptơ sư yak chă ngôi lăm bơngai Isơrael, tơhil tôn tơteh băl hăm minh 'nu bơngai Isơrael. 11Kon bơngai drŏ-kăn Isơrael noh pơma blông păng hiap kơ anăn Kră Yang đe chông ba sư tơ Môis. Anăn mĕ sư Sôlômit, kon yă Dibri, đơ̆ng adrĕch adrung Đan. 12Đe chĭt sư truh tơ Kră Yang tơl pơdah kơ lu sư wă sek thoi yơ. 13Kră Yang khan kơ Môis thoi âu: 14Chông ba bĕ bơngai mă hiap pơtê̆ lĕch tơ 'nguaih kơ gơđông, đĭ-đăng đe bu mă kơtơ̆ng sư athei dan ti lu sư 'bơ̆t kơ̆l bơngai noh păng ăn đĭ-đăng kon pơlei pơla klơ̆m pơlôch sư păng tơmo. 15Păng khan bĕ kơ kon pơlei pơla Isơrael, bơngai hiap Kră Yang 'Bok Kei-Dei sư gô pŭ iŏk tơdrong phak đơ̆ng tơdrong yoch sư kơdih. 16Bu pơma blông kơ anăn Kră Yang; đe gô pơlôch sư, kon pơlei gô klơ̆m sư păng tơmo. Mă khan bơngai đơ̆ng tơmoi nai, dah bơngai kon pơlei sư kơdih, mưh pơma blông kơ Anăn Kră Yang đe gô pơlôch đĭ.
Iung kơting
17Bu mă pơlôch minh 'nu bơngai, đe gô pơlôch sư mơ̆n. 18Bu pơlôch minh pôm kon sem brem sư athei 'mong, wă khan tơdrong arih 'mong tơdrong arih. 19Tơdah minh 'nu bơngai pơm kơ rông 'bôt sư rơka, đe gô pơm kơ sư jĭ rơka lei-lăi thoi sư đei pơm kơ đe boih. 20Kơting 'mong kơting, măt 'mong măt, hơnĕnh 'mong hơnĕnh, đe gô pơm kơ sư rơka lei-lăi thoi sư pơm kơ đe rơka. 21Bơngai bu pơlôch kon sem brem sư athei 'mong, na bơngai bu pơlôch bơngai đe gô pơlôch sư. 22Mă bơngai tơmoi lăm pơlei pơla kơdih kư̆m gô yua minh tơdrong juăt đĕch; yua kơ Inh boih Kră Yang 'Bok Kei-Dei lu iĕm. 23Thoi noh Môis khan kơ kon pơlei Isơrael, chông anhăk bơngai hiap pơtê̆ lĕch tơ 'nguaih kơ gơđông, đơ̆ng noh klơ̆m sư păng tơmo. Na kon pơlei Isơrael pơm kiơ̆ nơ̆r Kră Yang mă đei tơtă bơih kơ Môis.
Currently Selected:
Lew 24: bdq
Highlight
Copy
Compare
Share
Want to have your highlights saved across all your devices? Sign up or sign in
©Bahnar Bible Association. All rights reserved.
