Lew 22
22
Tơdrong jang pơyơ̆r, 'bok soi athei 'lơ̆ng rơgoh
1Kră Yang khan kơ Môis, 2Khan bĕ kơ Arôn păng lu kon drŏ-nglo sư, wă kơ lu sư kơchăng pơm mă 'lơ̆ng lu tơmam pơyơ̆r kon pơlei Isơrael, mă đei 'măn pơyơ̆r pơm rơgoh ăn kơ Inh, wă kơ lu sư huay kơ pơm kơnê̆ 'mê̆-'mach kơ anăn 'lơ̆ng rơgoh Inh, Inh boih Kră Yang. 3Khan bĕ kơ lu sư. Tơdah đei bu lăm lu kon sâu iĕm lăm đĭ chăl arih lu iĕm năm jê̆ lu tơmam 'lơ̆ng rơgoh mă kon pơlei Isơrael pơyơ̆r 'măn lê̆ kơ Kră Yang, na bơngai noh sư đei tơdrong kơnê̆ 'mê̆-'mach, đe gô puh tơlĕch sư weh đơ̆ng anăp Inh, Inh boih Kră Yang. 4Tơdah bơngai bu lăm kon drŏ-nglo Arôn jĭ chin dah jĭ lĕch đak kơtăk, ưh kơ gơh sa ôh tơmam đe 'măn lê̆ 'lơ̆ng rơgoh dĭng truh tơ sư rơgoh 'lơ̆ng 'mơ̆i. Tơdah bu đei hơtŭt 'bơm bơngai đei kơnê̆ 'mê̆-'mach yua kơ 'bơm akâu lôch, dah bơngai đei đak kơtăk lĕch, 5tơdah hơtŭt 'bơm hơdrông kơep lep-ler, dah hơtŭt 'bơm minh 'nu bơngai đei tơdrong kơnê̆, pơm kơ sư kư̆m kơnê̆ 'mê̆-'mach. Mă tôm tơdrong kiơ nai kư̆m kơnê̆ 'mê̆-'mach lei-lăi. 6Bu hơtŭt 'bơm dôm tơmam noh jing kơnê̆ 'mê̆-'mach truh kơmăng, ưh kơ gơh sa tơmam đe 'măn lê̆ rơgoh mă-lei đang kơ hum lăm đak. 7Đang kơ 'năr mơ̆t bơih, sư jing rơgoh lei na gơh sa tơmam rơgoh yua kơ tơmam noh tơmam sa sư. 8Sư ưh kơ gơh sa ôh kon sem bri lôch kơmăp, dah lôch đơ̆ng sem bri kăp, wă kơ sư huay kơ kơnê̆ 'mê̆-'mach, yua kơ Inh boih Kră Yang. 9Yua kơ noh na sư athei bơwei nơ̆r Inh pơkă, kơnh hli kơ lu sư pŭ tơdrong yoch păng lôch hloi yua kơ đei pơm dôm tơdrong Inh tơtă jing kơnê̆ 'mê̆-'mach, Inh boih Kră Yang pơm kơ sư jing rơgoh 'lơ̆ng.
Khôi juăt gah tơdrong sa tơmam rơgoh
10Minh 'nu bơngai tơmoi ưh kơ gơh sa tơmam rơgoh 'lơ̆ng ôh, bơngai tơmoi chă oei lăm hnam 'bok soi dah bơngai chă jang mưng kơ đe kư̆m ưh kơ gơh sa tơmam rơgoh 'lơ̆ng. 11Mă-lei bơngai ayơ mă 'bok soi iŏk jên răt bơih păng lu bơngai mă tơpŭ lăm hnam sư gơh sa tơmam sa sư. 12Tơdah kon adruh 'bok soi chă klo bơngai tơmoi drŏ-kăn noh ưh kơ gơh sa ôh tơmam rơgoh 'lơ̆ng. 13Păng tơdah kon adruh 'bok soi adro, dah klo sư achăng lê̆, ưh kơ đei hơ'lơ̆p ôh, na wih brŏk tơ hnam 'bă sư thoi oei 'lơ̆p sơ̆ lei sư gơh sa tơmam 'bă sư. Mă-lei ưh kơ đei bơngai tơmoi ayơ gơh sa tơmam noh ôh. 14Tơdah bu hơch 'bơm sa tơmam rơgoh 'lơ̆ng, sư athei 'mong ăn kơ 'bok soi đêl sư sa noh păng ăn thim dơ̆ng minh lăm pơđăm kiơ̆ kơ tơdrong gĭt sư, ăn kơ 'bok soi tơmam sa noh. 15'Bok soi ưh kơ gơh pơm 'mê̆-'mach kơ tơmam soi mă kon pơlei Isơrael pơyơ̆r ăn kơ Kră Yang. 16Bu sa tơmam rơgoh đêl pơyơ̆r thoi noh gô pŭ iŏk tơdrong sư hlôi pơm glăi, yua kơ Inh boih Kră Yang pơm kơ lu sư jing rơgoh 'lơ̆ng.
Tơdrong rơih kon sem pơm tơmam soi
17Kră Yang khan kơ Môis, 18athei khan bĕ kơ Arôn păng lu kon drŏ-nglo sư păng đĭ-đăng kon pơlei Isơrael, tơdah đei minh 'nu lăm hnam Isơrael dah bơngai tơmoi oei lăm char Isơrael lu sư, ba tơmam soi pơyơ̆r dah tơmam soi pơsĭt tơdrong pơkă dah tơmam soi lăp đon 'maih wă pơyơ̆r kơ Kră Yang jing tơmam soi 'buh, 19wă kơ Inh iŏk athei pơyơ̆r minh pôm rơmo, triu, dah bơbe tơno ưh kơ đei jĭ kiơ, rôp đơ̆ng lăm hơdrong. 20Lu iĕm 'nĕ kơ pơyơ̆r kon sem dơrong ayơ mă đei jĭ kiơ kiơ, yua kơ tơmam soi noh Inh ưh kơ iŏk ôh. 21Tơdah minh 'nu bơngai pơyơ̆r kơ Kră Yang tơmam soi 'blŏk bơnê hăm rơmo, triu dah pơyơ̆r pơsĭt tơdrong pơkă dah pơyơ̆r tơmam soi Inh lăp đon. Wă kơ gơh iŏk, tơmam pơyơ̆r noh athei 'lơ̆ng, ưh kơ đei jĭ kiơ kiơ. 22Lu iĕm 'nĕ kơ pơyơ̆r kơ Kră Yang minh pôm kon sem dơrong ayơ mă măt tol, tơgơ̆ jơ̆ng, rơka, tơ'boch roch jĭ lak, iĕm 'nĕ kơ rôp sư pơm tơmam soi 'buh hăm ŭnh pơyơ̆r kơ Kră Yang tơ kơpal chơnang soi. 23Lu iĕm gơh rôp minh pôm rơmo dah triu đei jơ̆ng kơjung hnang, dah kơđeh hnang wă pơm tơmam soi lăp đon 'maih wă, mă-lei gah tơmam soi pơsĭt tơdrong pơkă, kon sem tơmam soi thoi noh Kră Yang ưh kơ iŏk ôh. 24Lu iĕm 'nĕ kơ pơyơ̆r kơ Kră Yang lăm char iĕm kơdih minh pôm sem dơrong bŏng sư pơchah, hĕch dah krĕo lê̆. 25'Nĕ kơ iŏk đơ̆ng ti bơngai tơmoi, minh pôm kon sem tơmam soi ayơ mă thoi noh, wă pơyơ̆r tơmam soi kơ Kră Yang 'Bok Kei-Dei ih. Yua kơ akâu sư rơka rơkĕch, Inh ưh kơ iŏk ôh tơmam soi noh. 26Kră Yang khan kơ Môis. 27Tơdah, kon rơmo, kon triu, kon bơbe, đơ̆ng rŏng kơ sư tuh athei oei hơdai mĕ sư lăm tơpơh năr. Mă-lei ưh kơ hloh năr mă tơhngam ôh, iŏk đơ̆ng năr âu tơ anăp Inh gô iŏk sư jing tơmam pơyơ̆r soh hăm ŭnh ăn kơ Kră Yang. 28Mă rơmo akăn dah triu akăn, iĕm 'nĕ kơ pơlôch yŏng păng kon sư lăm minh năr. 29Tơdah lu iĕm pơyơ̆r tơmam soi 'blŏk bơnê kơ Kră Yang, lu iĕm athei pơyơ̆r mă trŏ thoi noh, na Inh iŏk. 30Đe gô sa tơmam sa noh lăm năr noh, 'nĕ kơ lê̆ minh kơnăt 'măn kơ năr dơning. Inh boih Kră Yang. 31Thoi noh lu iĕm athei bơwei pơm kiơ̆ tơdrong Inh tơtă, Inh bơih Kră Yang. 32'Nĕ pơm 'mê̆-'mach kơ anăn 'lơ̆ng rơgoh Inh, na Inh đei tơdrong 'lơ̆ng rơgoh lăm kon pơlei Isơrael, Inh boih Kră Yang Tơ'ngla pơm kơ iĕm jing rơgoh. 33Wă khan Tơ'ngla chông anhăk ba iĕm đơ̆ng char Êyiptơ, wă kơ Inh pơm Kră Yang 'Bok Kei-Dei lu iĕm, Inh boih Kră Yang.
Currently Selected:
Lew 22: bdq
Highlight
Copy
Compare
Share
Want to have your highlights saved across all your devices? Sign up or sign in
©Bahnar Bible Association. All rights reserved.
