Romanos 13

1Yajmato'ŋoyjaya tumduma'ŋbʌ'nis te' mʌja'ŋ aŋgui'moyeta'm, porque ja'ndiyʌ eyaco aŋgui'moye sino que te' Diojsis quiojtyajupʌ. Y te' nʌ 'yaŋgui'moyajupʌ Diojsiste' quiojtyaju. 2Te'cotoya iwʌ's ja'n myato'ŋoyjay te' aŋgui'moyajpapʌ, ja'n myato'ŋoyjay te' Diojsis quiojtyajupʌ. Y iwʌ's ja'n myato'ŋoyjay, ñe'cʌtij mye'tzpa tyoya. 3Porque te' aŋgui'moyajpapʌ's ja'nde' wa'y chʌcna'tzu oyepʌ tiyʌ chʌcpapʌ's, sino te' yatzipʌ tiyʌ chʌcpapʌ's. Juca sunbamis wa'mis jana na'tzu te' aŋgui'moyajpapʌ, tzʌcʌ oyepʌ tiyʌ y maŋbamij nwyʌcotzamyaju ñe'cʌ'sta'm. 4Porque Diojsiste' quio'aŋgui'mbapʌ mis oye'ajcuquiotoya. Pero juca ndzʌcpamis yacha'cuy, na'tzʌ, porque ja'nde' comeque ñʌ'ijtu 'yaŋgui'mʌtʌjcuy wa'y yajnʌco'aŋgʌ'oyu. Porque Diojsiste' quio'aŋgui'mbapʌ wa'y yajco'aŋgʌyu chʌcpapʌ's yacha'cuy. 5Te'cotoya pyʌcpa wa'mis mato'ŋoyjayu, ja'n na' porque muspamij nyajco'aŋgʌyu, sino te'šejtijque' wa'mis mujsu ndzoco'yojmo que nʌmis ndzʌjcu oyepʌ tiyʌ. 6Te'cotoyamijte' ŋguiocoyo'oytyamba, porque te' aŋgui'moyajpapʌ Diojsiste' quio'aŋgui'moyeta'm, y yʌ'wo'mote' yojšajpapʌ.

7Tumduma'ŋbʌ'nis yajcoyowa jya'tzi, pyʌcpašej. Juca iwʌ ja'tzpa tiyʌ'iwʌ yosaŋgʌsi, yajcoyowa. Juca iwʌ ja'tzpa cocoyo'oquiuquiʌsi, yajcocoyo'oya. Juca iwʌ pyʌcpa wa'y quiʌna'tzʌyaju, yajcʌna'tzʌya, y juca pyʌcpa wa'y myʌja'ŋgomʌ'yaju, yajmʌja'ŋgomʌ'ya pyʌcpaše'ŋ. 8Uy tzʌctame ja'tzi ya'iwʌcʌsi, sino que našunʌtʌjtamʌ, porque iwʌ's šunba tyʌwʌ nʌte' quiojamu te' aŋgui'mguy. 9Te'cotoya, uy cʌtzʌjcʌ'oy, uy yajca'oy, uy nu'mi, uy sutzi testigosay, uy ni'aŋsu'noy. Y tiyʌ aŋgui'mguytyij itʌ, yʌ'šejtʌ ndumʌnʌctʌ'pyʌ'pa: Sunʌ ndʌwʌ jujcha' mis sunba ne' nwin. 10Iwʌ's šunba tyʌwʌ ja'n chʌcjay yatzipʌ tiyʌ. Te'cotoya juca sunbatʌ ndʌwʌ ŋgojambʌ'patʌ te' aŋgui'mguy.

11Y yʌtij, como muspa'ndʌ tiyʌ aŋsʌŋyʌ', nu'cwa'nde' hora wa'ytyʌ itzaŋwajtamu nwitʌm porque yʌtij masa' tome wa'ytyʌ ŋgotzocta'nu que ja'nde' nwʌ'aŋjamdamu'ctʌ. 12Nʌwa'nde' quiʌtʌjcu te' tzu', y maŋbapa'nde' minu tʌ Ngomi. Ndzacta'mitʌy tʌta'm ndzoco'yojmopʌ pi'tza'ŋajcu'yis chʌqui, y ŋgoquipta'mitʌy nwin tʌ nʌctʌ'yoquiu'yis šʌ'ŋgʌpit. 13Witta'mitʌy oye jujcha' jama's wyi'noyj, ja'n tzuwitpapʌšej, ni no'tpapʌšej, ni ja'n ispʌquitzʌcpapʌšej, ni ja'n tocoyupʌšej, ni ja'n quipotoŋbapʌšej, ni ja'n ni'aŋsu'nopyapʌšej. 14Pero paquipʌctamʌ ndzoco'yojmo Ngomi Jesucristopit, y uy tzʌcjaytyame cuenta mis ŋgüerpo wa'mis ndzʌcjayu ñe' šu'noquiuy.

Currently Selected:

Romanos 13: ZCNT

Highlight

Copy