ROMANOS 6
6
Lajemotik yuꞌun te mulile, kuxulotik yuꞌun te Cristoe
1¿Tut ya kaltik yuꞌun? ¿Me sigue ya jpastik te mulile yuꞌun ya yakꞌ ta ilel xan slekil yoꞌtan a te Diose? 2¡Ma jichuk! Joꞌotik te lajemotikix yuꞌun te mulile. ¿Tut me kꞌan kuxuyinukotik xan teme puru mulil ayotike? 3Ya skꞌan ya jnaꞌtik te tutꞌil a cham te Cristo, jun nax lajemotik sok te la kichꞌtik jaꞌe.
4Yuꞌun ta skuenta te ichꞌjaꞌe jun nax a mujkotik sok Cristo y jchamotik. Sok jich tutꞌil chaꞌkux te Cristoe ta skuenta te slekil spoder te Jtatik Diose, jich ya xchaꞌkuxotik, sok ya kichꞌtik achꞌ kuxlejal.
5Teme jun xanix ayotik sok te Cristoe jun nax chamenotikix sok, y jun nax chaꞌkuxotikix sok euk. 6Jnaꞌojtik te tutꞌil ayotik te nail toe jojkꞌaj ta krus sok Cristo, yuꞌun teꞌ jimix jilel a te spoder te jkꞌaꞌ kuxlejaltik te puru mulil aye, y ma ba ya smosoinotik xan te mulile. 7Porke te kꞌalal ay machꞌa xcham jtuluke, kolem ya xkꞌot yuꞌun te mulile. 8Te joꞌotik teme chamenotikix sok te Cristoe, ya xchꞌuun koꞌtantik te ya xkuxuyinotik sok euke. 9Jnaꞌojtik te Cristoe, te chaꞌkuxemix tale, ma yauk xcham xan. Te lajele maꞌyukix spoder te ya smil xane.
10Yuꞌun te Cristo te chame, cham jun nax buelta sbajtel kꞌinal ta skaj te mulile. Pero te tutꞌil kuxulixe, kuxulix yuꞌun Dios. 11Jaꞌ nax jich, te jaꞌexe naꞌaik me te chamenex yuꞌun te mulile, pero kuxulexix yuꞌun Dios te jun nax ayotik sok te Cristo Jesuse.
12Jaꞌ yuꞌun, mame awakꞌ te jaꞌexe te sigue ya yuꞌuninbeyex mulil te atiꞌbalulik te ya xlaje, y te sigue ya sujotik ta xchꞌuunel te tut ya skꞌan yoꞌtan te jtiꞌbalultike. 13Maꞌ awakꞌik entregal te atiꞌbalulik yuꞌun te mulile yuꞌun ta spasel te tut ma lekuke. Jaꞌ lek akꞌa abaik entregal ta stojol Dios, jich tutꞌil jtul gente te chame y te chaꞌkuxe. Sok akꞌaik entregal te atiꞌbalulik te ya xtuun yuꞌun ta spasel te tut leke. 14Jich te mulile maꞌyukix spoder ta atojolik. Yuꞌun ma kuxulukex ta skuenta te mantaliletike. Jaꞌ xanix me kuxulex ta skuenta slekil yoꞌtan te Diose.
Jun seña kꞌoem te mosoile
15¿Tutꞌil ay teme jich te? ¿Me ya xmulawotik xan porke maꞌba kuxulotik ta skuenta te mantaliletike, jaꞌ kuxulotik ta skuenta te slekil yoꞌtan te Diose? Batsꞌi ma jichuk. 16Te jaꞌexe lom lek ya anaꞌik teme ya awakꞌ abaik ta mosoil ta stojol jtul ajwalil te ya achꞌuunike, teme jiche, mosoilex yuꞌun te awajwal te machꞌa ya achꞌuumbey smantale. Jich mismo teme ya achꞌuunik spasel te mulile, jaꞌ ya xꞌikꞌawan bael ta lajel. Teme ya achꞌuunik te Diose, jich ya xkuxuyinex ta jun kuxlejal te toj aye. 17Pero kola yal Dios, te jaꞌex te nail to moso ayex yuꞌun te mulile, achꞌuunejikix ta awoꞌtanik jich tutꞌil te nojpesel te la awichꞌike.
18Jmel nax kolemexix ta mosoil yuꞌun te mulile, te jaꞌexe ochemexix ta tuunel yuꞌun te kuxlejal te toj aye. 19Jich ya kalbeyex ta skuenta nax seña te tutꞌil ay te genteetik ta balmilale, wokol ya xkꞌot ta awoꞌtanik lek te tutik aye. Jaꞌ yuꞌun, jich tutꞌil te nail toe awakꞌojik entregal te atiꞌbalulik ta spasel te tut ma tsaꞌamuke te lom ilob yuꞌun ta pasel te tut ma lekuke, jich te ora to akꞌaik entregal te atiꞌbalulik ta spasel te kuxlejal te toj aye. Jich yan-yanex ta lekubel ta stojol Dios te jayeb kꞌaal kuxulexe.
20Kꞌalal ayex to ta mosoil yuꞌun a te mulile, maꞌyukex ta abatinel yuꞌun te kuxlejal te toj aye. 21Pero, ¿tutiꞌ lokꞌ awuꞌunik a te tut la apasike? Te ora to ya xkꞌexawex yuꞌun, te jaꞌ nax te la yikꞌex bael ta lajele. 22Pero te ora to, kolemexix ta mosoinel yuꞌun te mulile; ochemexix ta tuuntesel yuꞌun te Diose. Jaꞌto ay tut lek ya ataik a, yuꞌun jaꞌ ya xlokꞌ awuꞌunik a te jun kuxlejal te lek ta stojol Diose, sok ta último ya ataik kuxlejal sbajtel kꞌinal. 23Te stojol te ya yakꞌ te mulile, jaꞌ te lajele. Pero te majtanil ya yakꞌ te Diose jaꞌ te kuxlejal sbajtel kꞌinal, te jun nax ya xkꞌootik sok te Cristo Jesus te Kajwaltik stukele.
Currently Selected:
ROMANOS 6: AMANNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento Tzeltal de Amatenango © Sociedad Bíblica de México, 2006.
