ROMANOS 3
3
1Jaꞌ yuꞌun, ¿tut ya sta a teme juriyoe o teme yichꞌoj sirkunsisione?
2Bayal ya sta y lom bayal skꞌoplal. Te primeroe, akꞌtalanbot ta skuentaik te juriyoetik te skꞌop Dios. 3¿Pero, tut ya sta a teme ma junuk yoꞌtan jtul chebuke? ¿Me yuꞌun wan teꞌ sjilesotikix a te Diose teme ma junuk koꞌtantike? 4¡Maꞌuk! Ma jichuk. Te Diose jmel nax yaloj te tut batsꞌi jiche, aunke spisil winketik ya sleik lot. Yuꞌun jich ya yal te Sjun Diose:
“Jamal me ya xchiknaj te batsꞌi jich te tut ya awale, y jich me ya xjuꞌ awuꞌun te kꞌalal ya awichꞌ chapele”, xchi me.
5Pero teme ta skuenta ma tsaꞌamukotik te ya xchiknaj a te toj ya xchapawan stukel te Diose, ¿tut me ya kaltik? ¿Me yuꞌun ma lekuk yoꞌtan te Diose te ya yaꞌbotik kastigoe? Jich ya xkꞌopojon ya kaꞌi te tutꞌil machꞌa maꞌyuk tut xchꞌuuneje. 6Maꞌuk. Porke jichuk ma tojuk te Diose, ¿tut kꞌan juꞌuk yuꞌun te ya yichꞌbe jkuenta smulik spisil te gente ta balmilale?
7Pero teme jlot nax a te tut ya kaltike, ya me xchiknaj xan ta mas te slekilal te tut batsꞌi jich yuꞌun te Diose. ¿Tut yuꞌun ya xkꞌo yichꞌon jkuenta a jich tutꞌil jmulawil? 8Jich ya kaltik yaꞌiyel: ¿Tuꞌun makꞌ jpastik te tut ma leke, yuꞌun jich me ya xtal a te tut leke? Ay chaꞌoxtul te ya yalik te joꞌon jich ya kakꞌ ta nopel, pero te machꞌa jich ya yalike, ya me staik kastigo yuꞌun.
Jpisiltik jmulawilotik ta sit Dios
9¿Tut kꞌoemotik a? Teme juriyootike, ¿meꞌn joꞌotik mas lekotik ke te yane? ¡Maꞌuk! Kalojix ta jamal tutꞌil te juriyoetike sok te machꞌa ma juriyouke pajal meꞌtalanbil yuꞌun te spoder te mulile. 10Yuꞌun jich ya yal te Sjun Diose:
“Maꞌyuk machꞌa lek te tut ya spase, maꞌyuk ni jtuluk. 11Maꞌyuk machꞌa ya yaꞌibe sluwar; maꞌyuk machꞌa ya sle te Diose, 12spisil jaꞌ stamojik te ma lekil beuke; spisil pajal chꞌayemikix bael. Maꞌyuk machꞌa lek tut ya spas, maꞌyuk ni jtuluk. 13Te sbe yikꞌe jajchik tut xchenal jchamel te jeꞌelixe; te yakꞌike puru le-lot. Te yaꞌnimal stiꞌike jachik kꞌoem te ba ya snakꞌ sbeneno te chane, 14y te stiꞌe nojel ta puru ma tsaꞌamuk y ben kꞌux ta aꞌiyel. 15Te yokike xyalajan ta smalel chꞌichꞌ; 16ya me xlajinwanik sok ya xꞌakꞌawanik ta wokol te ba ya xkꞌaxike. 17Ma snaꞌbeyik sba te sbeelel bujtsꞌan kꞌinale. 18Ni maꞌyuk skꞌoplal ta yoꞌtanik teme ya xiꞌik te Diose”, xchi me.
19Jnaꞌojtik spisil te tut ya yal te sjunal mandaliletike jaꞌ ya yalbe te machꞌatik ayix ta skuentae, yuꞌun ma xjuꞌ ya smak sbaik ta kꞌop a spisil te genteetik te ayik ta balmilal te ya yichꞌ kastigo yuꞌun te Diose. 20Porke te Diose maꞌyuk machꞌa ya yalbe te jaꞌ libre ya xkꞌot yuꞌun te xchꞌuunej te tut ya yal te mantaliletike. Yuꞌun te mantaliletike jaꞌ nax ya xtuꞌun te ya yaꞌbotik jnaꞌtik te jmulawilotike.
Te kolele jaꞌ nax ta skuenta te xchꞌuunel koꞌtantike
21Pero te ora to, parteix ay te mantaliletike. Dios a yakꞌix ta naꞌel te tutꞌil toj ya yilelotik ta stojole. Jich jamal tsꞌibabil jilel ta sjunal te mantaliletike y sok ta sjunal te jꞌalwanejetike. 22Dios ya yakꞌotik ta libre yuꞌun jmultik teme la jchꞌuuntik te Jesucristoe. Y jich pajal skꞌoplal ta spisilik te machꞌatik ya xchꞌuune, 23yuꞌun spisilik mulawenik y jakal ayik te ba ay slekilal te Diose. 24Pero te Diose, ta slekil yoꞌtan y majtanil nax te la yakꞌotik ta libre yuꞌun te jmultike, ta skuenta te tojbilix jmultik yuꞌun te Cristo Jesuse. 25Dios la yakꞌ te jaꞌ jPas-perdon kuꞌuntik te Cristoe, te la smal te xchꞌichꞌele. Te perdon to ya jtatik ta skuenta te xchꞌuunel koꞌtantike. Jaꞌ ya yakꞌ ta naꞌel a te toj stukel te Diose, te la yakꞌ kꞌaxuk te muliletik te nameye, 26jaꞌ nax ta skaj te ya smaliye. Jaꞌ jich mismo te ora to te ya yakꞌ ta ilel te toj stukel te Diose, y sigue toj kꞌalal ya yal te libre ya xkꞌotik yuꞌun smulik te machꞌatik ya xchꞌuun te Jesuse.
27¿Ba me ya sjiles te stoybail winik ta stojol Diose? Ma spasix teꞌae. Yuꞌun ma xkol yuꞌun xchꞌuunel te mantaliletike; jaꞌ nax teme la xchꞌuun te Jesuse. 28Jaꞌ yuꞌun ya jnaꞌtik te Diose ya yal te libre ya xkꞌot yuꞌun smul te winik teme ay xchꞌuunel yoꞌtane. Maꞌ jaꞌuk ya sujotik ta spasel te tut ya yal te mantaliletike. 29Te Diose ma jaꞌuk nax Dios yuꞌun te juriyoetike. Klaro chikan te jaꞌ Dios yuꞌun spisil euk te nasionetike. 30Yuꞌun jtul nax te Diose, maꞌyuk yan. Te Diose ya yakꞌ ta libre yuꞌun smulik spisilik te machꞌatik ay xchꞌuunel yoꞌtane. Ma jaꞌuk ya yichꞌ jkuenta yuꞌun teme yichꞌoj o ma yichꞌojuk sirkunsisione. 31¿Me yuꞌun ta skaj te la jchꞌuuntikixe te ma baleuk ya xkꞌot kuꞌuntik te mantaliletike? Ma jichuk. Mas lek xan te ay spuersa te mantaliletik yuꞌune.
Currently Selected:
ROMANOS 3: AMANNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento Tzeltal de Amatenango © Sociedad Bíblica de México, 2006.
