ROMANOS 11
11
Ay tsabil te israeletik te ya xkolike
1Jich ya jojkꞌoy te ora to: “¿Me yuꞌun wan jkꞌaxel a xchꞌojix jilel te israeletik te Diose?” xchion. Ma jichuk. Joꞌon mismo israelon euk, stsꞌumbalon te jꞌAbrahame y sok te jtijk stsꞌumbal te jBenjamine. 2Te Diose ma spꞌajojuk te israeletik te jtejklum yuꞌune, te tsabil yuꞌun ta slijkjibal toe. Ya skꞌan ya anaꞌik te jich tsꞌibabil jilel skꞌoplal ta Sjun Dios yuꞌun te jꞌalwanej Eliase, yuꞌun teꞌ yal ta skꞌoponel Dios a, te ma tsaꞌamuk yaꞌtel te jtejklum Israele. La yal: 3“Kajwal, la smilikix te jꞌalwanejetik awuꞌune sok la sjimikix te skajanibal amajtan yuꞌunike. Joꞌon xanix jilemon te kuxulon toe, y ya me skꞌan smilikon euk”, xchi me. 4Pero Dios la sjakꞌ: “Ay to siete mil winketik kuꞌun te ma skejanej sbauk ta sit te dios Baale”, xchi. 5Jaꞌ jich te ora to, ay to jilem chꞌinuk te sobrail te israeletike te tsabilik ta skuenta slekil yoꞌtan Dios.
6Teme jaꞌ ta skuenta nax te slekil yoꞌtan te Diose, ma jaꞌukix ta skuenta te tut juꞌem yuꞌunik spasele. Porke te jaꞌuk ta skuenta te ay tut juꞌem yuꞌunik spasele, ma jaꞌuk kꞌuxutaybilik yuꞌun ta slekil yoꞌtan Dios te jichuke.
7Jich ya jnaꞌtik te ma juꞌ yuꞌunik te israeletike te tut la sleike. Pero te machꞌatik tsabilik yuꞌun te Diose jich la staik ta leel stukelik. Te yane tulanej bael yoꞌtanik, 8jich tut ya yal te Sjun Diose:
“Dios a yakꞌ chꞌayuk yoꞌtanik, y jich asta te ora to, la yakꞌtalanbe sit te ma xyile, y sok xchikin te ma xyaꞌiye”, xchi me.
9Sok jich a yal euk te jDavide:
“Te skꞌinike aꞌ sujtuk ta stranpaik sok ta syajkilik, yuꞌun ya xlaj yal a, y te ya staik kastigo a. 10Te sbakꞌ sitike a me chokubuk, y ma me xyilikix a. Y te spatike a me kꞌujajuk ta sil tiempo”, xchi me.
Ay skolelik te machꞌatik ma juriyouke
11Te ora to ya jojkꞌoy: “¿Me yuꞌun wan jmel nax a laj yal te juriyoetike?” xchion. Ma jichuk. Ta skaj te maꞌ xchꞌuunik te juriyoetike, te yan jtejklume jich a staikix te kolele, yuꞌun te israeletike ya me xlaj ilinik yuꞌun.
12Jich ta skuenta te smulik te juriyoetike, jaꞌ lek a staik bendision te machꞌatik ayik ta balmilale. Y ta skuenta te palta a staike, jich ay bendision a staik a te machꞌatik ma juriyouke. Jaꞌ yuꞌun mas to xan ya staik bendision a te kꞌalal spisil ya xchꞌa ochik xan te juriyoetike.
13Pero ay tut ya jkꞌan ya kalbeyex te jaꞌex te ma juriyoukexe. Yuꞌun te Dios a stikonon tal ta akuentaik te ma juriyoukexe, y lom bayal skꞌoplal ta koꞌtan te kaꞌtel aꞌbilone. 14Yipalon ta sleel tutꞌil xlijk jbikꞌtatesbey yoꞌtanik ta atojolik te machꞌatik jtsꞌumbale, yuꞌun jich me ya staik ekꞌa te kolele. 15Te tutꞌil pꞌajot yuꞌun Dios te juriyoetike, te gente ta balmilale jich me ya staik butsꞌan kꞌinal ta stojol Dios. ¿Me ma wan jichuk te kꞌalal ya xchꞌa ikꞌot xan te juriyoetike? Jich kꞌoem te tutꞌil ya xchꞌa kux tal te machꞌatik chamenike.
16Teme yuꞌun Dios te primero waj te ya yichꞌ pasele, jich yuꞌun Dios swolol te matsꞌe. Sok teme yuꞌun Dios te jwol teꞌe, jich yuꞌun Dios euk te skꞌab-kꞌabe. 17Ay jich tutꞌil batsꞌi skꞌab-kꞌab olivo teꞌ chaꞌoxtul te juriyoetik, te bojtalanot lokꞌele. Te jachikat tutꞌil jun skꞌab olivo teꞌ te ma tsꞌunbiluke, teꞌ ba sluwar ta tsꞌumbal olivo teꞌ la awich tsꞌakel te jaꞌate. Jich jun xanix a kꞌoat sok te yisime y mismo yutsilal a kꞌoat sok te tsꞌunbil olivo teꞌe. 18Pero ma me akuyik te kꞌax lek ayex te tutꞌil te batsꞌi skꞌab-kꞌab teꞌe. Teme ya akuy aba te kꞌax lek ayate, naꞌa me te ma jaꞌukat mero yisimate, yuꞌun jaꞌ xanix jokꞌolat te ba yisim te teꞌe.
19Ya wan awalik: “Jich, pero te skꞌab kꞌab te bojtalanot lokꞌele, yuꞌun jich me ya stsꞌakelon a te ba olivo teꞌe”, teme xchiexe. 20Batsꞌi jich te la yichꞌik bojtalanel lokꞌele, pero jaꞌ yuꞌun te maꞌyuk xchꞌuunel yoꞌtanike. Y te jaꞌate ayat ta skuenta nax te ay xchꞌuunel awoꞌtane. Jaꞌ yuꞌun ma me atoy abaik. Jaꞌ mas lek te ya axiꞌike. 21Porke teme Dios ma spasbe perdon te batsꞌi skꞌab-kꞌab te teꞌe, jich euk te jaꞌexe mak spasbelex perdon. 22Aꞌiya awaꞌiyik. Yuꞌun ben lek te Diose, pero tulan ya yakꞌ skastigo euk. Jich a yaꞌbeyix kastigo te machꞌatik a yalik ta mulile. Yan te jaꞌexe ayix slekil yoꞌtan ta atojolik. Pero puersa ya skꞌan xkuxuyinex sok sil tiempo te tutꞌil ay te slekil yoꞌtane. Yuꞌun teme ma jichuk ya apasike, jich me ya awichꞌik bojel lokꞌel euk. 23Sok teme ya to xchꞌuunik te juriyoetik, teme la sjilesik te stulanil yoꞌtanike, ya to me yichꞌik tsꞌakel ta achꞌ. Yuꞌun te Diose ay spoder te ya xchꞌa tsꞌaktalan xane. 24Porke te jaꞌat te ma juriyoukat la awichꞌ bojel tal lokꞌel ta ba jwol olivo teꞌ te ma tsꞌunbiluke, tal stsꞌakelat a te ba mero lekil olivo teꞌe. Jaꞌuk to xan a te juriyoetik te batsꞌil jaꞌ skꞌab kꞌab te lekil olivo teꞌe, ya me yichꞌ tsꞌaktalanel ta achꞌ te ba batsꞌi olivoe.
Spisil te Israel ya xkol
25Kermanotak, ya jkꞌan te ya anaꞌik te tutꞌil ay te kꞌop to te ma akꞌot ta naꞌel ta nail toe, jaꞌ te tut snopoj ta yoꞌtan te Diose, skuenta yuꞌun makꞌ me ya atoy abaik a te tutꞌil ay apꞌijil ta akꞌopike. Te israeletike ay tulanejem yoꞌtanik olil, jaꞌ to teme tsꞌakay ta spisil te jich yipal ya xchꞌuunik Dios te machꞌatik ma stsꞌumbaluk Israele. 26Te kꞌalal ya xkꞌot ta pasel to, spisil te israeletike ya me staik skolelik. Yuꞌun jich ya yal te Sjun Diose:
“Te jkoltawaneje ya xjajch tal ta Sion. Ya me xchꞌaybey te tut ma tsaꞌamuk a spas te stsꞌumbal Jacobe. 27Jaꞌ to jaꞌ te trate ya jpas sok te kꞌalal ya jchꞌaybey te smulike”, xchi me.
28Te tutꞌil te juriyoetik la spꞌajik te skꞌop Dios yuꞌun te kolele, jaꞌ skontraik a kꞌot yuꞌun te Diose, yuꞌun jich me la awichꞌik kꞌuxutayel te jaꞌexe. Pero te Diose ya to me xkꞌuxutaylan porke stꞌujojlan te antibo smeꞌ statike.
29Batsꞌi jich teme Dios la yal te ya xkuxutaylan, ma ba ya xchꞌaybey skꞌop. Ni makꞌ ya stikon sujtel te machꞌatik ikꞌbilix yuꞌun te Diose. 30Te nameye, jaꞌex te ma la achꞌuunik te Diose. Pero te ora to te juriyoetike ma xchꞌuunejikukix te Diose. Jich kꞌuxex ta yoꞌtan Dios te jaꞌexe. 31Jaꞌ nax jich mismo te juriyoetik ma xchꞌuunejikuk te ora to. Pero jaꞌ xanix yuꞌun te ay slekil yoꞌtan Dios ta atojolike. Jaꞌ nax jich te ora to ay xkꞌuxul yoꞌtan ta skuentaik. 32Porke te Diose jun nax a yakꞌtalan te pajal ma xchꞌuunot yuꞌune, yuꞌun jich me pajal ya xkꞌuxutay ta spisil.
33Yuꞌun lom kꞌax mukꞌ y bayal te slekil yoꞌtan Diose. Sok lom bayal te spꞌijile y sok te tut ya snaꞌe. Maꞌyuk machꞌa ya xjuꞌ yuꞌun snaꞌel te tut snopoj ta yoꞌtane, sok ni ma xjuꞌ ta naꞌel te tut ya spase. 34Yuꞌun jich tsꞌibabil:
“¿Machꞌa kꞌan snaꞌbe spensar te Kajwaltike? ¿Sok machꞌa kꞌan spꞌijutes? 35¿Machꞌa kꞌan smajtantes nailuk, te ya xjuꞌ ya sujtesbot sjelol yuꞌun ta patile?” xchi me.
36Porke spisil te tutik aye ya xtal ta stojol Dios, y jaꞌ pastalanbil yuꞌun y stukel yuꞌun. Ben tsaꞌam slekil ta sbajtel kꞌinal te Diose. Jichuk.
Currently Selected:
ROMANOS 11: AMANNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento Tzeltal de Amatenango © Sociedad Bíblica de México, 2006.
