LUCAS 23
23
Te Jesuse tejkꞌanot ta sit te jPilatoe
1Spisilik a jajchik bael. La yikꞌik bael ta stojol jPilato te Jesuse. 2Teꞌ kꞌo slebeyik smul a. La yalik:
—Te winik to ya slijkes kꞌop yuꞌun te jlumaltike. Ya yal te ma xjuꞌ ya jtojtik jtojemaltik yuꞌun te mukꞌul rey Cesare. Y ya yal te jaꞌ Cristo te rey stukele —xchiik.
3Te jPilatoe la sjojkꞌobe:
—¿Me jaꞌat te reyat yuꞌun te juriyoetike? —xchi.
La sjakꞌ te Jesuse:
—Jaꞌat te jich ya awale —xchi.
4Jich te jPilatoe la yalbe te stataletik yuꞌun te saserdoteetike sok spisil te genteetike:
—Ma jtabe tut smul te winik to —xchi.
5Pero mas xniket lijkel ta kꞌop:
—Te tut ya snojpeswan ae ya slikes kꞌop ta spisil te jtejklumetik ta Judeae. Lijk tal ta Galilea, y ta ora to jich ya spas liye —xchiik.
Te Jesuse tejkꞌanot ta sit te jHerodese
6Te tutꞌil jich a yaꞌi te jPilatoe, la sjojkꞌo teme talem ta Galilea te winike. 7Te kꞌalal la yalik te teꞌ talem ae, te jPilato la stikon bael ta stojol jHerodes, te jaꞌ gobierno yuꞌun a te Galileae, yuꞌun talem ta Jerusalen ae.
8Te jHerodese ben kontento sujt yuꞌun te la yil te Jesuse, yuꞌun ayix kꞌaal te yoꞌtanuk ya yile. Yuꞌun yaꞌiyojbe sluwar skꞌoplal te Jesuse, y ya skꞌan te ayuk milagro ya xꞌaꞌbot yile.
9Bayal tuti sjojkꞌobe, pero te Jesuse ni jpꞌaluk aꞌ sjakꞌbe. 10Teꞌeyik ekꞌa te stataletik yuꞌun te saserdoteetike y sok te maestroetik yuꞌun te mantaliletike. Bayal tuti yalik te tut smulinej ta skꞌopik te Jesuse. 11Jich te jHerodese sok te soltaroetik yuꞌune la stseꞌlayik y la spꞌajik te Jesuse. Yuꞌun ya stseꞌlayik a te Jesuse, la slapbeyik kꞌuꞌul-pakꞌal te ben tsaꞌam ta ilel, jich tutꞌil te reye. Te nax a te jHerodese la stikon sujtel ta stojol te jPilatoe. 12Mismo kꞌaal a pajt yoꞌtanik te jPilato sok te jHerodese, yuꞌun te nail toe skontrainej sbaik.
Chapbot skꞌoplal ta milel te Jesuse
13Te jPilatoe la stsob tal te stataletik yuꞌun te saserdoteetike sok te juꞌeletik yuꞌun te jtejklume, 14y la yaltalanbe:
—Te jaꞌexe la awikꞌbikon tal te winik to. Ya awalik te ya slijkes kꞌop te ba jtejklume. Pero la jojkꞌobeyix ta asitik y maꞌyuk a jtabe smul jich tutꞌil te ya awalik te ay smul ta akꞌopike. 15Sok euk te jHerodese maꞌyuk smul a stabe. Jaꞌ yuꞌun la stikonix tal sujtel. Jich maꞌyuk smul te ya xjuꞌ ya yichꞌ milel yuꞌune. 16Ya me kaꞌbe kastigo y ta patil ya me jkoles bael —xchi.
17Te jujun kꞌine te jPilato ya spasbey te tut ya skꞌan yoꞌtan te genteetike te ya skoles bael jtul jchukel ae. 18Pero spisil te genteetike lijk awunikuk:
—Ikꞌaik bael ta milel me to. Ja xꞌakoles bael te jBarrabase —xchiik ta aw. 19Te jBarrabase ochem ta prexo yuꞌun te la slijkes kꞌop ta jtejklume sok te milawaneme. 20Te jPilato kꞌan skoles bael te Jesuse y la yalbe xan te jtejklume. 21Pero mas tulan xan a awunik:
—¡Mila ta krus! ¡Mila ta krus! —xchiik.
22Ta yoxebal buelta te jPilatoe la yaltalanbe:
—¿Tut ma tsaꞌamuk spasoj? Te joꞌone maꞌyuk tut ma tsaꞌamuk a jtabe te ya xjuꞌ ya xlaj yuune. Ya me kaꞌbe kastigo y ta patil ya jkoles bael —xchi.
23Pero mas tulan a lijkik xan ta aw te ya skꞌanik te ya xmilot ta kruse. Te tutꞌil tulan a awunik ta skꞌanel te genteetike y te stataletik yuꞌun te saserdoteetike, jicha juꞌ yuꞌunik. 24Te jPilatoe lijk snop ta yoꞌtan te ya spasbe te tut ya skꞌanike. 25Jich a skoles bael te winik te stꞌujojik te ya xkol bale. Jaꞌ te machꞌa ay ta prexo yuꞌun te la slijkes kꞌop sok te milawane. Y la yaꞌbe entregal ta skꞌabik te Jesuse, jich te tut ya skꞌan yoꞌtanike.
Te Jesuse jojkꞌanot ta krus
26Kꞌalal la yikꞌik bael te Jesus te ba sojkꞌanik ta kruse, la stsakik jtul Cirene-winik te Simon sbiile te xkꞌotuk tal ta kꞌalkꞌaltike, y la yaꞌbeyik xkuch te kruse. Nail ay kꞌael te Jesuse.
27Bayal genteetik stsꞌakliyejik kꞌael. Ay bayal antstik ya xꞌokꞌik y xꞌawlajan yuꞌun ajtal-oꞌtan yuꞌun te Jesuse. 28Pero te Jesuse la skꞌelu sujtel y la yaltalanbe:
—Antstik yuꞌun Jerusalen, ma xꞌawokꞌetayikon. Okꞌetaya aba atukelik, y sok te awuntikilike. 29Porke ya me sta skꞌaalel te jich ya xꞌalote: “Ben tsaꞌam slekil te machꞌa ma xꞌalajike, sok euk te machꞌa ma xchuꞌunbot xchuꞌike.” 30Sok jich ya xlijk yalik te gentee: “¡Aꞌ jemuk tal ta jbajtik te witstikile!” Sok jich me ya yalbeyik te chꞌin witstikile: “¡Laꞌ, nakꞌaotik!” ya me yutik. 31Porke teme jich ya spasbikone te yaxal teꞌ kꞌoemone, jaꞌukix to a te jaꞌex, te takin teꞌ kꞌoemexe —xchi te Jesuse.
32Sok yikꞌojik kꞌael cheb winketike te bayal tut ma tsaꞌamuk spasojike yuꞌun pajal ya xba jojkꞌanek ta krus sok te Jesuse. 33Kꞌalal a kꞌot te ba chꞌin stunle te Bakeljolol sbiile, teꞌ sjojkꞌanik ta krus a te Jesuse sok xchebal te winketik te bayal tut ma tsaꞌamuk spasojike, jtul ta sbatsꞌil kꞌab y jtul ta xkꞌexom kꞌab. 34Te Jesuse la yal:
—Jtat, pasbeya perdon, porke ma snaꞌik te tut ya spasike —xchi.
Te soltaroetike lijkik ta tajmal yuꞌun ya yilik te machꞌa ya xkꞌot ta skuenta te skꞌuꞌ-spakꞌ te Jesuse. 35Te genteetike teꞌeyik ekꞌa yipalik ta yilel te tut ya xkꞌot ta pasele. Y asta te juꞌeletike ya yikꞌtinik euk te Jesuse. Jich ya yalik:
—La skolta te yane. Ora to aꞌ skolta sba kiltik euk, teme batsꞌik jich te jaꞌ Cristo te tꞌujbil yuꞌun te Diose —xchiik ta yikꞌtinel.
36Te soltaroetike ya yikꞌtinik euk te Jesuse. Tijilajik tal y la yaꞌbeyik yuchꞌ chꞌaal bino. 37Jich a yalbeyik:
—Teme jaꞌat te reyat yuꞌun te juriyoetike, kolesa aba atukel —xchiik ta yikꞌtinel.
38Sok ay pakꞌbil jun letrero chꞌujteb ta sjol krus te tsꞌibabil ta griego-kꞌop sok ta latin-kꞌop sok ta hebreo-kꞌop: “Jaꞌto, jaꞌ te rey yuꞌun te juriyoetike”, xchi te letreroe.
39Jtul te jmulawil te bayal tut ma tsaꞌamuk spasoje, te pajal jipil sok ta krus te Jesuse, la yikꞌtin euk. Jich a yal:
—Teme jaꞌat te Cristoate, kolesa aba atukel y kolesaotik euk —xyut.
40Pero te jtul xane la skom te sjoye, sok la yalbe:
—¿Meꞌn makꞌ xiꞌat yuꞌun te Diose te tutꞌil pajal ayat ta kastigo sok te Jesuse? 41Te joꞌotike ay rason te ayotik ta wokole, porke jaꞌ yipalotik ta stojel te tut ma tsaꞌamuk jpasojtike. Pero te winik to maꞌyuk tut ma tsaꞌamuk spasoj —xchi.
42Te nax a la yalbe te Jesuse:
—Jesus, naꞌaon me te tut ora ya awichꞌ awaꞌtele —xyut.
43Te Jesuse la sjakꞌbe:
—Jamal ya kalbeyat, te ora to ya me joyin jbajtik ta lekilal —xchi.
Jicha cham te Jesuse
44Ol kꞌaal a ijkꞌub spisil te balmilale, jaꞌto ta las tres mal kꞌaal. 45Te kꞌajkꞌale majk bael. Y te pakꞌ te makal a te temploe chꞌiꞌ koel ta olil. 46Te Jesuse tulan a awun y la yal:
—Jtat, ya kaꞌbeyat ta akꞌab te jchꞌulele —xchi. Y te jich a yale, lok xchꞌulel.
47Te kꞌalal la yil te tuti kꞌot ta pasel, te statal soltaroe ben tsaꞌam skꞌoplal a yalbe te Diose. Jich a yal:
—Batsꞌi jich a nix a te winik to maꞌyuk smul —xchi.
48Y spisil te genteetik te talemik ta yilel te tuti kꞌot ta pasele, kꞌalal sujtik bael la smajulan kꞌa stiꞌ yoꞌtanik yuꞌun. 49Pero spisil te machꞌatik ya snaꞌbe sba te Jesuse y sok te antstik te stsꞌakliyejik tal kꞌalal ta Galileae, teꞌ laj jil a. Jakal yipalik ta skꞌeluyel te tuti kꞌot ta pasele.
Te Jesuse mukbot te stiꞌbalule
50Ay jtul winik te Jose sbiil te ben lek y toj ta winikil te ay slumal ta Arimatea jun jtejklum yuꞌun te Judeae. Sok yichꞌoj yaꞌtel yuꞌun te juriyoetike, 51pero ma yakꞌ sba a te tuti snopik te ya spasike. Jaꞌ yipal ta smaliyel te ya xꞌoch ta ajwalil te Diose. 52Jaꞌ bajt te ba ay te jPilatoe, y la skambe te stiꞌbalul te Jesuse. 53La skoes te ba kruse, sok la spots ta sakil pakꞌ. Ba yakꞌ jilel te ba jun jutbil ton te ma to ayuk machꞌa mujkem ae. 54Jaꞌ skꞌaalel a te ya xchap sbaik yuꞌun te skꞌaalel kuxo-oꞌtane te ya xlijkixe.
55Te antstik te sjoyinejik tal te Jesuse kꞌalal ta Galilea, ba yilik te chꞌene. La yilik te tutꞌil aꞌbil jilel te stiꞌbalul te Jesuse. 56Kꞌalal laj sujt bael ta nae, la xchapbeyik xpoxil stiꞌbalul te ben tsaꞌam yikꞌe. Te antstike la xkux yoꞌtanik ta skꞌaalel kuxo-oꞌtan jich tut ya yal te mantale.
Currently Selected:
LUCAS 23: AMANNT
Highlight
Share
Copy
Want to have your highlights saved across all your devices? Sign up or sign in
Nuevo Testamento Tzeltal de Amatenango © Sociedad Bíblica de México, 2006.