HECHOS 24
24
Kꞌopoj ta stojol Felix te jPabloe
1Joꞌeb kꞌaal ta patil, kꞌot ta jtejklum Cesarea euk te Ananias, te statal saserdotee. Sjoyinej chaꞌoxtul moletik y sok jtul lisensiado te jTertulo sbiile. Kꞌo slebeyik smul te jPablo ta stojol te gobiernoe. 2Kꞌalal ikꞌotix tal a te jPabloe, te jTertuloe lijk yal te tut smulinej ta skꞌopike. Jich a yal ta stojol te gobierno Felixe:
—Kola awalbotik, gobernador, te ay bujtsꞌan kꞌinal ya kaꞌitike. Y kola awalbotik yuꞌun te spꞌijil awoꞌtan te ben lek chapal awuꞌun te nasion kuꞌuntike.
3Te tutꞌil jich ay ta sil tiempo sok ta bayuk, ya kaltik bayal kola awal gobernador Felix, te aꞌbilat ta jkuenta kuꞌuntike. 4Pero yuꞌun ma jaluk tiempo ya jkꞌaestik aye, awokoluk ya jkꞌantik te yauk awaꞌibotik jtsꞌinuk te jkꞌoptike.
5Yuꞌun te winik to yipal ta boliteswane, y ta spisil te balmilale yipal kꞌael ta slijkesel kꞌop, y ta yakꞌel division ta yolil te juriyoetike. Sok jaꞌ statal yuꞌun te machꞌatik xchꞌuunejik te Jesus te talem ta Nazarete, 6y kꞌan yakꞌ ixtaꞌajuk skꞌoplal te temploe. Jaꞌ yuꞌun jich a jtsaktik, y kꞌan jmeltsaantik jich te tutꞌil ay ta mantaliletik kuꞌuntike.
7Pero te statal soltaro Lisiase la xchꞌik sba a y sok skꞌajkꞌal la spojbotik tal lokꞌel. 8Y la yal te machꞌatik ya yalik te smule ya skꞌan te ya spasik presentar ta atojole. Jaꞌ yuꞌun jojkꞌobeya awaꞌiy stukel teme jich spisil te smul ya kaltike —xchi te jlisensiadoe.
9Te juriyoetik te teꞌelan aye jich mismo la yalik euk. 10Te gobiernoe la yaꞌbe seña te ya xkꞌopoj te jPabloe, y jicha lijk yal te jPabloe:
—Ben jun koꞌtan ya xkꞌopojon ta atojol. Porke ya jnaꞌ te ayix jaꞌbil te ay awaꞌtel ta alkalil liꞌ ba nasion to.
11Teme ya ajojkꞌoy xan ta leke, jich me ya awaꞌi te ay to nax lajchayeb kꞌaal te xkꞌoukon ta Jerusalene, te xkꞌo jkejan jba ta stojol te Diose. 12Y maꞌyuk a staikonik te ay machꞌa yipalon ta yalbeyele, ni maꞌyuk a jlijkes kꞌop te ba temploe, ni ta sinagogaetik, ni ta yolil te jtejklume. 13Te genteetik to ma staik te tut ya yakꞌik ta ilel te ya slebikon jmul ae. 14Pero te tut ya kal ta jamale jaꞌ te jchꞌuunej te Dios yuꞌun te jmeꞌ-jtate, jaꞌ te lekil achꞌ be te ma lek ta chꞌuunel ta skꞌopike, porke jchꞌuunej spisil te tut tsꞌibabil jilel ta mantaliletik sok ta sjun te jꞌalwanejetik yuꞌun te Diose. 15Pajal ay xchꞌuunel koꞌtan ta stojol Dios sok te genteetik to te yipalon ta smaliyel te ya xchaꞌkux tal te animaetike, chikan teme lek o ma lekuk yoꞌtanike. 16Jaꞌ sluwaril te sil tiempo kuidado ayon ta stojol te Diose y sok ta stojol te genteetike.
17“Cheb oxeb jaꞌbil xjoyeton ta yan luware, ta patil sujton tal ta jlumal, yuꞌun tal kakꞌ takꞌin y sok smajtan Dios ta templo. 18Jich yipalon ta spasel a te la staikon ta yutil templo te chaꞌoxtul juriyoetik te talemik ta estado yuꞌun Asiae. Juꞌix kuꞌun te la jlekutes jkꞌoplal ae, y maꞌyuk jtsoboj bayal gente, sok maꞌyukon ta slijkesel kꞌop teꞌae.
19Jaꞌik ya skꞌan ya xtal spas presentar liye yuꞌun ya xtal yalik te tut jmule, teme ay tut jpasoj te ma lekuk a yilike. 20Pero teme maꞌyuke, jaꞌ a wakꞌ yalik te machꞌatik liꞌ aylane teme ay jmul a stabikon te kꞌalal la yikꞌikon bael te ba junta yuꞌun te juriyoetike. 21O teme jaꞌ jmul a stabikon te kꞌalal tulan a kꞌopojon ta yalel te ba tsobolike, te la kale: “Te ora to jaꞌ ayon ta meltsaanel awuꞌunik te tutꞌil ay xchꞌuunel koꞌtan ta smaliyel te ya xchaꞌkux tal te animaetike”, te xoone —xchi te jPabloe.
22Kꞌalal te Felix la yaꞌiy te jich aye, yuꞌun lom lek albil te tutꞌil ay te lek achꞌ be yuꞌun te Jesuse, jich a xkejchan jilel ta xchapel te kꞌope. Y la yaltalanbe:
—Te kꞌalal ya xtal te statal soltaro jLisiase, ya jojkꞌobe tutꞌil ay te kꞌop awuꞌunike —xyut. 23Te Felixe la yalbe mantal te statal jtijk soltaroe te sigue ya xba yakꞌik ta prexo te jPabloe. Pero ma jmeluk ya xchukik, sok ay permiso yuꞌunik te ya xba ilek yuꞌun te sjoꞌtake.
24Kꞌaxix cheb oxeb kꞌaal a, chaꞌkꞌot xan te Felix sok te yiname te sDrusila sbiil te juriyo-antse. Te Felixe la yakꞌ tal ta ikꞌel te jPabloe, y la yaꞌibe lek sluwar te tutꞌil ay ta chꞌuunel te Jesucristoe. 25Pero kꞌalal la yaꞌbiyanbe te jPablo tutꞌil ya skꞌan te toj ya xkuxuyinotik ta balmilale, sok te tutꞌil ya skꞌan ya jnaꞌtik skomel juju-tulotik te jtiꞌbalultike, sok te tutꞌil ya yilbotik kaꞌteltik ta patil te Diose, te Felixe la yakꞌ yajtal yoꞌtan yuꞌun. Jaꞌ yuꞌun la yalbe:
—Lek ay, baanix. Ya jtikonat xan ta ikꞌel te kꞌalal ay tiempo kuꞌune —xchi.
26Te Felixe yoꞌtanuk ya xꞌaꞌbot takꞌin yuꞌun te jPabloe yuꞌun jich ya skoles bael a. Jaꞌ sluwar te chaꞌoxmel a yikꞌulan ta kꞌope. 27Cheb jaꞌbil te jicha kꞌax yuꞌune. Te nax a lokꞌ ta gobiernoil te Felixe. Jaꞌ sjelol a jil te Porcio Festoe. Te Felixe jaꞌ ya skꞌan te lek xꞌalbot skꞌoplal yuꞌun te juriyoetike, jich a yakꞌ jilel ta prexo te jPabloe.
Currently Selected:
HECHOS 24: AMANNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento Tzeltal de Amatenango © Sociedad Bíblica de México, 2006.
