1 CORINTIOS 2
2
Jaꞌ ay ta alel te tutꞌil a cham ta krus te Cristoe
1Pero kermanotak, te kꞌalal tal kalbeyex awaꞌiyik te tutꞌ batsꞌi jich snopoj te Diose, ma jaꞌuk a kal te spꞌijil jkꞌop naxe sok ma yuꞌunuk mukꞌ a kakꞌ jba. 2Te kꞌalal la joyinexe, la jnop ta koꞌtan te jaꞌ nax ya kalbeyex skꞌoplal te Jesucristoe, sok te tutꞌil a cham ta kruse. 3Te kꞌalal ayon ta awolilike, maꞌyuk puersa a kaꞌiy y ben yaꞌbon sik yuꞌun xiꞌel. 4Y te kꞌalal la jkꞌoponex y sok te la kalbeyex te skꞌop Diose, ma jaꞌuk a tuun kuꞌun te spꞌijil jkꞌop yuꞌun te ya jtsalex aye. Ma jichuk. Jaꞌ a kaꞌbeyex achꞌuunik ta skuenta te Espíritu y sok ta spoder te Diose. 5Jaꞌ yuꞌun te tutꞌil ay xchꞌuunel awoꞌtanike jaꞌ ta skuenta spoder te Diose y ma jaꞌuk ta skuenta spꞌijil te genteetike.
Te Diose ya yakꞌ ta nopel ta skuenta te Espíritu yuꞌune
6Pero, te ba ay te machꞌatik xchꞌuunejix lek te Diose, jich ya xtuun kuꞌuntik te pꞌijil kꞌope. Pero ma jaꞌuk ya kaltik te pꞌijil kꞌop skuenta te balmilal to, ni ma jaꞌuk te machꞌatik sjapuyejike te nopol ya xlaj chꞌayik baele. 7Jaꞌ ya kaltik te spꞌijil skꞌop Dios te mukꞌul aye. Jaꞌ bi, jaꞌ te la snop ta yoꞌtan te kꞌalal ma to spas a te balmilale te ya slebotik jlekilaltik sbajtel kꞌinale. 8Jaꞌ to jaꞌ te ma snaꞌbeyik sluwar te machꞌatik sjapuyejik te balmilal to. Yuꞌun te kꞌoemuk ta yoꞌtanike maꞌ smilik ta krus te ajwalil yuꞌun te lekilale te jichuke. 9Pero komo jich tsꞌibabil jilel ta Sjun te Diose:
“Te Diose xchapoj yuꞌun te machꞌatik kꞌanbil yuꞌune te tut maꞌyuk machꞌa yiloje sok maꞌyuk yaꞌiyeje sok te ma snopojuke”, xchi me.
10Dios la yaꞌbotikix jnaꞌtik te tutik ta skuenta te Espiritue. Yuꞌun te Espiritue ya xjuꞌ yuꞌun te ya yakꞌ ta naꞌel spisil, manchuk me jaꞌ te tut mukꞌul ay yuꞌun stukel te Diose.
11Porke ¿machꞌa winketikil te ya xjuꞌ yuꞌun snaꞌel te tut ay ta yoꞌtan te winike? Yuꞌun jaꞌ nax stukel te winike te ya snaꞌ te tut ay ta yoꞌtane. Jaꞌ nax jich te Diose, úniko te Espíritu yuꞌune te ya snaꞌ tutꞌil ay te Diose. 12Y te joꞌotike ma jaꞌuk kichꞌojtik te spꞌijil te balmilale. Jaꞌ kikꞌojtik te Espíritu te tikonbil tal yuꞌun te Diose, yuꞌun jich me ya jnaꞌbeytik sluwar a te tutik yakꞌojbotik te Diose ta skuenta slekil yoꞌtan. 13Jich te kꞌalal ya kalbeytik skꞌoplal te tutik to, jaꞌ ya kaltik te tut yakꞌojbotik jnoptik te Espiritue, y ma jaꞌuk te kꞌopetik te jnopojtik nax ta jpꞌijiltike. Jich ya kalbetik te tutik skuenta Espíritu te machꞌatik yikꞌojikix te Espiritue. 14Te machꞌa maꞌyuk ta skuenta te Espiritue, ma skꞌan xchꞌuunik te tutik skuenta te Espíritu yuꞌun Dios, yuꞌun jowil nax kꞌoem ta yoꞌtanik. Sok ma xjuꞌ yuꞌunik snaꞌbeyel sluwar, yuꞌun makꞌ xkoltayot ta yichꞌel jkuenta yuꞌun te Espiritue. 15Pero te machꞌatik ayix ta skuenta te Espiritue ya xjuꞌ yuꞌun yichꞌel jkuenta spisil te tutik aye. Y maꞌyuk machꞌa ya xjuꞌ yuꞌun yichꞌbeyel jkuenta stukel. 16Yuꞌun jich ya yal te Sjun Diose: “¿Machꞌa kꞌan snaꞌbey tutꞌ ay spensar te Kajwaltike? ¿Machꞌa kꞌan juꞌuk yuꞌun ya spꞌijutes? xchi me. Pero te joꞌotike kichꞌojbeytikix spensar te Cristoe.
Currently Selected:
1 CORINTIOS 2: AMANNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento Tzeltal de Amatenango © Sociedad Bíblica de México, 2006.
