Mateo 24

Ko ja Jesús tnikäjpxy ko ja mëjtsajptëjk kyutëkoyä'äny

1Tso'omp ënäty ja Jesús ma ja mëjtsajptëjkën. Ko ja y'ijxpëjkpëtëjk myëwinkoonëtë ets tyuk'ixa'anëtë ja mëjtsajptëjk ko ja nyipotsy janty'oy kyëxë'ëky.

2Ënät ja Jesús y'ënëmaayëtë:

¿M'ijxtëp ya'atë tu'kë'ëyë? Tëy n'ënëëmëtë ko ya'atë tsaapotsy nitu'uk kyawë'ëma'any, tu'kë'ëyë jyijta'aja'any.

Mëti'ipë yajtuk'ixaanpën ko ja naaxwiinyëtë ënäty kyukëxë

Mr 13:3-23; Lc 21:7-24; 17:22-24

3Tam ënäty ja Jesús y'u'unyë Olivos kopkwinm, ko ja y'ijxpëjkpëtëjk nyimiinëtë ets yajtëëwëtë aak ayi'iyë:

Tuk'ëwa'anëtëkës jëna'a jëtu'un jyata'any kyëpäta'any ets tii ijxwë'ëmën yajtuk'ixëp ko ënäty mijts miny ets ko ja naaxwiinyëtë ënäty kyukëxë?

4Ënät ja Jesús y'ëtsoowëtë:

Näkyëwent'atëtë ets ka'ap pën mwin'ëënëtëty. 5Jä'ä ko may ja ja'ay myina'any ijxtëm jeexyë ëjtsën ets y'ëna'ana'any: Ëjts jëtu'un ja Kristë ets may ja ja'ay twin'ëëna'any. 6Ko miits xymyëtoy'atëty ja tsip xii yaa ets ko ja ja'ay tsyiptuntëty, ka'ap mtsë'ëkëtëty, kopkpëky ko jëtu'un tyunëtëty jyatëtëty, je'eyëp ko ka'anëm ënäty tpaaty ets ja naaxwiinyëtë kyukëxëty. 7Jä'ä ko tsiptunantëp ja naax kajpn nixim niyam naaxwiinyëtë apëtsëmy. Itaanp ja yuu xëëw ets ja naaxwiinyëtë yu'kxa'any xiitsow yaatsow. 8Ko jëtu'un tyunëtëty jyatëtëty, je'eyë ënäty ja ëyo'on tsyo'ontä'äkynyëm.

9Ënät miits myajkë'ëyaktëty ets myajtsaatytyuntëty ets ja ja'ay myaj'ookëtëty. Tu'kë'ëyë ja'ay nëjkx m'ëxëëk'ixëtë jä'äkyëjxm ko ënäty ëjts xymyëpëktë. 10Nimay nëjkx ja ja'ay jää t'ëxmatstë ja myëpëjkën ets nyäkyë'ëyakëtëty ets nyämyëtsip'atëtëty nixim niyam. 11May nëjkx nyätyijëtë Tios kyäjpxynyajxpë ets may ja ja'ay nëjkx twin'ëëny. 12Jä'äkyëjxm ko ënäty ja ëxëëkpë ku'oypyë myëjtëkë, paaty may ja ja'ay ka'ap oy t'ëkmëët'atanëtë ja nätsyokë. 13Temë pën xymyëpëjkpës mapaat jyëjpkëxyën, yë'ë nëjkx nyitso'oky. 14Ets ya'atë aaw ayuk oypyë ma Tios kyutujkën yajnimëtyä'äkyën, nëjkxëp yajkajpxwä'kxy ma tu'kë'ëyë naaxwiinyëtën ets nëjkx ja ja'ay tnija'awëtya'atë, täänëm ja naaxwiinyëtë kyukëxëty.

15Ojts ja käjpxynyajxpë Daniel tkuja'ay ja ëxëëkpë ja tuuntëko'oyën. Ko miits xy'ixtëty ma ja wa'atspë ja itën, mëti'ipë nokykyajpxpën wä'än tja'akyukë, 16ënät nëjkx kyä'äktë ja ja'ayëty mëti'ipë yajpatëpën jam Judea ets nëjkx kyäktso'oktë jam kopkëjxm; 17ets pën ënäty të pyetyën tyëjkëjxm jä'ä xëëw, ka'ap y'ëkjënajknëty ets tii tyajpëtsëma'anëty jap tyëkoty; 18ets pën ënäty kyamjotm, ka'ap nyäkwyimpitëty ets ja wyit twitsëty. 19Mëk nëjkx y'ëyowtë ja to'oxytyëjkëty mëti'ipë ënäty ja u'unk nyëkëjxm'ajtëpën ets mëti'ipë ënäty yaj'u'unktsi'tstëpën jä'ä xëëw. 20Amëtowtë pëjktsowtë ja Tios ets ka'ap jëtu'un jyatëty jä'ä xëëw ma ënäty pyotmëtyën, ëkë säpëtë xëëwën. 21Mëk nëjkx ja ëyo'on jotmay yaj'ixy, mëti'ipë ka'ap nijëna'a yaj'ixynyëmën maju'unëm ja naaxwiinyëtë tsyo'ontä'äkyën ets ka'ap jëtu'un ok y'ëkyaj'ixanë. 22Ko jeexyë ja Tios ja ëyo'on jotmay tkayajkëxy tkayajnaxy, tsip jeexyë ets ja ja'ay tmëmëta'aktë, paaty tyajkëxa'any tyajnaxa'any jä'ä ko tsoky tjawë ja y'u'unk y'ëna'k mëti'ipë të twin'ixyën.

23Ets ko pën jää m'ënë'ëmxëtëty: Ixtë, tyaa ja Kristë, ëkë y'ëna'antëty: Ixtë, xim jä'ä, këtii xymyëpëktëty. 24Jä'ä ko minantëp ja ja'ayëty mëti'ipë nëjkx nyätyijëtën Kristë ets mëti'ipë nätyijëtëpën Tios kyäjpxynyajxpë; nëjkxëp tyaj'ixëtë ja mëj'ajtën ets wi'ix kawi'ixëty nëjkx winë tuntë ets yë'ëpaat nëjkx yajwin'ëëntë mëti'ipë ënäty ja Tios të twin'ixyën. 25Tëë yam ntuk'ëwaanëtë mëti'ipë tunan jatanëpën. 26Paaty, ko pën m'ënë'ëmxëtëty: Ixtë, xim jä'ä të'ëts'itjotm, këtii jam mnëjkxtëty; ëkë oy mja'ënë'ëmxëtëty: Ixtë, tyap jä'ä tëkoty, këtii xymyëpëktëty, 27Jä'ä ko jëtu'un ja naaxwiinyëtë ja'ay ja y'U'unk myina'any ijxtëm ja wëtsuk yaj'ixyën xëëwpëtsëmy ets xëëwkëtä'äky. 28Ma ënäty jam tii të y'ookyën, jam ja majkwejkxy myuka'antë.

Wi'ix wyimpita'anyën ja naaxwiinyëtë ja'ay ja y'U'unk

29Ko ënäty të nyäxy ja ëyo'on jotmay, jää nëjkx ja xëëw wyinkootsë ets ka'ap ja po'o y'ana'any. Ka'ata'ajaanp ja matsa'a tsajpwinm ets ja ënä'ämpëtëjk yajkutujkpëtëjk nëjkxëp yu'kxpëjkta'atë. 30Ets yaj'ixa'any jam tsajpwinm ja ijxpäjtën ko ja naaxwiinyëtë ja'ay ja y'U'unk myina'any yootsjoty, mëët ja mëk'ajtën kutujkën ets oy'ajt mëj'ajtën, 31ets tkäxa'any ja anklëstëjk mëët ja pujxnxuxn mëti'ipë mëk tyukxu'uxantëpën ets myujkta'aja'antë xiitsow yaatsow ja ja'ayëty mëti'ipë ënäty të yajwin'ixtën, tyso'onta'akëty ma xëëw pyëtsimyën ets jampaat ma kyëtä'äkyën.

32Jatë ya'atë nyi''ijxpëjkën ja higo kepy: ko xye'entyjiitsy ets ja y'ääy pyëtsimy, yë'ë yajtuknija'ap ko myiny wyinkony ja xëkopk'ajtën. 33Näy timjëtu'un ko xy'ixtëty ja ëyo'on tyunyë jyätyë, yë'ë mtuknijawëtëp ko tëjk ëkë'ëyën ja naaxwiinyëtë ja'ay ja y'U'unk yajpatnë. 34Tëy miits n'ënëëmëtë, ko ya'atë jää tyuna'any jyata'anyë maanëm ënäty ja ja'ay ka'ap y'ooktënëm mëti'ipë jää tyam yajpatëpën. 35Këxaanp naxaanp yë tsajp ets naaxwiinyëtë, e yë n'aaw n'ayukës nijëna'a kyakëxa'any kyanaxa'any.

36Ni pën tkanijawë tii xëëw tii po'o jëtu'un tyuna'any jyata'anyë, ni anklëstëjk tsajpjotmëtë ets ni ëjts nkanijawë, ëjts Tios y'U'unk; Tios Teety, yë'ë tu'uk nyija'ap.

37Ijxtëm tyuunë jyaajtën ko ja Noé jyuuky'äjty, näjyëtu'un tyuna'any jyata'anyë ko ënäty ja naaxwiinyëtë ja'ay ja y'U'unk myiny jatëkok. 38Jä'ä ko ka'anëm ënäty ja komtuu myiny, kaaytyëp uktëp ets pëjktëp uktëp ënäty ja ja'ayëty. 39Ma ënäty ka'ap pën tmëmay tmëtajyën tii, jää ojts myiny ja komtuu ets tyajnëjkxtaay oy tyimtiijëty. Näyjyëtu'un nëjkx tyunyë jyätyë ko ënäty ja naaxwiinyëtë ja'ay ja y'U'unk wyimpity. 40Jam ënäty ja ye'etyëjk tyuntë nimäjtsk kyamjotm; tu'uk yajmënëjkxa'any ets tu'uk wyë'ëma'any. 41Nimäjtsk ja to'oxytyëjk ënäty jyëtstë; tu'uk yajmënëjkxa'any ets tu'uk wyë'ëma'any.

42Wijy kujk mjuuky'atëty, jä'ä ko ka'ap xynyijawëtë jëna'a myina'any ja mWintsënëty. 43Yë'ë nijawëtë, ko jeexyë tu'uk ja kutëjk nijawë ko koots myina'any ja mä'tspë ma tyëjkën, ka'ap jeexyë myaanaxy këtiipë tyëkëty ja mä'tspë ma tyëjkën ets tyonëty myäätsëty. 44Paaty miits näjyëtu'un mnäkyëwent'atëtëty, jä'ä ko jääjës nëjkx nminy ko ënäty miits ka'ap xyjyëjp'ixtës.

Ja ja'ay mëti'ipë oy mëtuunpën ets ka'apë oy myëtunyën

45¿Pën jëtää ja tuunk oy y'ëkmëpëtsëmëp? ko ja Wintsën tyajwë'ëmëty tu'uk ja tyuunpë ma ja tyëjkën mëti'ipë yajja'akyäyëpën tiempëpaaty. 46Akujk jotkujk ja tuunpë yajpaaty mëti'ipë tukxoonta'akanëpën ja Wyintsën ko ënäty pyäätyë tuunp mëtoop. 47Tëy miits n'ënëëmëtë, ko ja Wintsën yë'ë nëjkx tyuknipëkyë ja tuunk wä'än mëti'ipë tuunkëty ets yë'ë tniwintsën'atëty. 48E pën tääpë mëtuunpë ëxëëk ja jyot wyinma'any, ets myäyëty tyajëty ko ja wyintsën ka'ap tsyojkwinpita'any 49ets twopëty tka'atsëty ja tuunpëtëjk ets tmëëtkaay tmëët'uknëty ja ëmu'ukyë ja'ay; 50ma ënäty ka'ap t'a'ixy tjëjp'ixyën wyimpita'any ja wyintsën, jää nëjkx ja wyintsën y'ëkëty myiny, 51tääts nëjkx tyiytyunyë ets pyëjktä'äkyë ma ja ja'ayëtyën mëti'ipë wiinkë'ëy akë'ëy oyjyä'äy'ajtëpën. Ënät myina'any ja ëyo'on jotmay ma y'ityën ja jë'ëyën yaxën ets ma ja ja'ay ka'ap jeky ja ëyo'on tmëmëtä'äkyën.

Currently Selected:

Mateo 24: QUETZMIXE

Highlight

Copy

Compare