Mateo 15

Mëti'ipë yaj'ëxë'këpën

1Ënät ja Jesús nyimiinëtë ja fariseë ja'ayëty ets ja tsajptëkotyëtë yaj'ijxpëjkpëtëjk mëti'ipë tso'ontëpën jam Jerusalén ets tyajtëëwtë:

2¿Tii ko yë m'ijxpëjkpëtëjk ka'ap jëtu'un tii tuntë ijxtëm ja aptëjk ijty winë tuntën? ¿Tii ko kyakë'ëpujtë ko kyäya'antë ijxtëm tnijawë'atën?

3Tääts ja Jesús yajtëëwëtë:

E miitsëty, ¿tii ko xykyapatuntë ja Tios ja y'ënä'ämën tyiyajtën ets aakjä'ä mtuuntëp kë'ëmpë xyjyot'at xywyinma'any'atën? 4Jä'ä ko jëtu'un ja Tios y'ënä'äny: wintsë'ëkë mtaak mteety, ets pën ja tyaak tyeety kyajpxpojkpy, ookëp yë'ë. 5Temë miits jä'ä m'ëna'antë ko mëpaat tu'uk ja ja'ay ja tyaak tyeety je'eyë t'ënëëmëty: Tëës ja Tios ntukmëyojxta'ay ja mpëjktä'äky mëti'ipë jeexyë miits ntukputëjkëtëpën; 6ets ko pën jëtu'un y'ënä'äny, ka'ap ja tyaak tyeety atsip t'ëkputëjkënë. Paaty miitsëty tëë ja Tios ja y'aaw y'ayuk xyajkutëkooyëtë mëët ko jëtu'un winë xytyuntë ijxtëm ja mkë'ëmjot mkë'ëmwinma'anyëtyën. 7Oyjyä'äy mnätyijëtë. Miits ojts myajnimëtya'aktë ko yë käjpxynyajxpë Jeséas y'ënäny:

8Winkë'ëy akë'ëyës ya'atë ja'ay xywyintsë'ëkëtë;

yë jyot wyinma'anyëty jëkäm yajpaaty.

9Nëkoopë nyätyijëtë koos xywyintsë'ëkëtë;

yë y'ijxpëjkënëty, ja'ay yë y'ënä'ämën.

10Tääts ja Jesús tmëkajpxmujky ja mayjyä'äy ets t'ënëmaay:

Mëtoow'itë ets ja'akyukëtë: 11Mëti'ipë aawjoty tëjkëpën ka'ap yë'ëjëty ja'ay yaj'ëxëëkëty; yë'ë tëy mëti'ipë jap aawjoty pëtsëëmpën.

12Ënät ja y'ijxpëjkpëtëjk nyimiinëtë ets y'ënëmaayëtë:

¿Mnija'ap mijtsë? yë fariseë ja'ayëty näwyinkajpxpätë të tjawëtë ko jëtu'un të m'ëna'any.

13Tääts ja Jesús y'ëtsooy:

Jëtu'un yë fariseë ja'ayëty ijxtëm yë ujtsën mëti'ipë ka'ap yë nTeetyës të tkojyën. Oytyii'ujtsëty pën ka'ap yë'ëjëty yë nTeetyës tsajpjotmëpë të tkojy, yajwijxë'ëkaanp jappaat ma tyiktsën. 14Paaty n'ënëëmëtë, ëxmatstë. Jä'ä ko yë'ëjëty jëtu'un ijxtëm ja ja'ay wiintspë tu'uwinwoy ja myëwiints. Ko tu'uk ja ja'ay wiintspë tu'uwinwoy ja myëwiints, nimäjtsk muum jyutkukëtawtë.

15Ënät ja Pedro t'ënëmaay ja Jesús:

Tukmëmëtyaktëkës tii jëtu'un të xyjyatija'any ko të mëtyä'äky.

16Tääts ja Jesús y'ëtsooy:

¿Miitspaat ka'ap të xyjyä'äkyukëtë? 17¿Këtii xynyijawëtë? ko tii tyëkë aawjoty, jap jootjoty kyëtä'äky ets tëyë nyäxyë. 18E mëti'ipë pëtsëëmpën aawjoty, jap tsyoony ma naaxwiinyëtë ja'ay jyotën ets yë'ë yaj'ëxëëkëty. 19Jä'ä ko jootjoty tsyoony ja ëxëëk winma'any, ënät ja ja'ay yaja'ay ooktë, tyajma'atë ja pëjkën ukën, nyämyëëttsëënëtë nixim niyam, myäätstë, y'anta'aktë ets nixim niyam nyäwyinkajpx nyäjyëjpkajpxëtë. 20Yë'ëkyëjxm ja ja'ay wyë'ëmtë pokyjoty ets ka'ap yë'ëjëty ko ja'ay jaaykyë'ëpujy kyäy.

Ko tu'uk ja to'oxytyëjk ka'apë jyutiisëty tmëpëky ja Jesús

21Tääts ja Jesús jam tsyo'ony ets ojts nyijkxy jam Tirë ets Sidón. 22Ets tu'uk ja to'oxytyëjk Canaán ja'ay nyimiinë yaxp jojkp:

Wintsën, David yë y'u'unk y'ok, pa'ëyoowkës. Yë nnëëxës myëët'ajtyp tu'uk ku'oypyë mëti'ipë yaj'ëyoowëpën.

23Ja Jesús ka'ap nitu'k'aaw t'ëtsooy. Ënät ja y'ijxpëjkpëtëjk nyinëjkxëtë ets myënu'kxtakëtë:

Ënëëmë tääpë to'oxytyëjk wä'än tnëjkxy, jä'ä ko yaxp jojkp xypyami'inëmë.

24Tä ja Jesús y'ënäny:

Yi'iyës ja Tios të xytyuknikexy ja Israel ja'ay. Jä'ä ko jëtu'un yë'ëjëty ijxtëm yë kupixyny tyëkoy'itën.

25E ja to'oxytyëjk ojts tmëwinkony ja Jesús ets twinkoxtënaay ets t'ënëmaay:

Wintsën, putëjkëkës.

26Tääts ja Jesús y'ëtsooy:

Ka'ap y'oyëty ets ja u'unk ëna'k yajpëjkëtëty yë tsajpkääky ets yajmo'ojëty yë uk.

27Ets ja to'oxytyëjk y'ënäny:

Wintsën, mëtëy yë'ë, je'eyëp ko yë uk jyë'kxtëp yë akiink aka'ak mëti'ipë ka'apën kaaypyäjn pa'tkë'p ma wyintsën kyäyën.

28Ënät ja Jesús y'ënëmaayë:

To'oxytyëjk ja'ay, janty mëj ja mmëpëjkën. Wä'än jëtu'un tunyë tjatyë ijxtëm mijts xytsyokyën.

Ënätyë ja to'oxytyëjk ja nyëëx tsyoky.

Ko ja Jesús tyajtso'oky ja maypya'am ja'ay

29Tääts ja Jesús jam tsyo'ony ets ojts nyäxy Galilea mejypyë'am. Ënät pyatëjkëy jam Kopkwinm ets jam nyaaxwe'tsy. 30Janty nimay ja ja'ay myujktë ma ja Jesús ets ojts tukninëjkxtë may ja pa'amja'ay, tam tekymya'atpë, wiintspë, uumpë ets wi'ixëty ja pa'am y'ixëty. Jesús ojts tyajtsokta'ay. 31Mëj ixy ja ja'ay tja'awëtyë ko ja uum kyajpxë'ktë, ko ja kë'ëma'atpë y'o'oyëtë ja kyë'ë, ko ja tekymya'atpë ye'epyëjktë ets ko ja wiintspë y'ixë'ktë. Ënät ja Israel Tios tyajmëjnajxtë.

Ko ja Jesús tyajkay nimajktaxk mil ja ja'ay

Mr 8:1-10

32Tääts ja Jesús tmëkajpxmujky ja y'ijxpëjkpëtëjk ets t'ënëmaay:

Mpa'ëyoopyës ya'atë ja'ayëty, jä'ä ko tëë tyëkëëkxëëwpäjnë ma yaa y'itën mëët ëjts, ets ka'ap tmëët'atë tii kyäytyëp jyë'kxtëpën. Ka'apës nkäxa'antë ma tyëjkën ayuu, jä'ä ko tsojk muum yuukëtawtëty tu'ujoty.

33Tääts ja y'ijxpëjkpëtëjk y'ënëmaayëtë:

¿Ets maas npëktëty yë kääky uuky yaa apaktuuy etsës yë mayjyä'äy nyajkaytyëty?

34Tääts ja Jesús yajtëëwëtë:

¿Jënaak jap yë tsajpkääky xymyëët'atë?

Ets y'ëtsoowtë:

Wëxtujk ets wäänë nëë jëyujk mutskëtypë.

35Tääts ojts tni'ënä'ämë ets ja ja'ay nyaaxwäätstëty naaxkëjxy, 36ets tkoonë'ky ja wëxtujkpë ja tsajpkääky ets ja ajkx. Ko ja Tios tkukajpxëy, tääts ojts tujkwä'kxy ets tmooy ja y'ijxpëjkpëtëjk. Ja y'ijxpëjkpëtëjk jä'ä kyumaaytyë ja mayjyä'äy. 37Ni'ëmukë ojts kyäytyë y'uuktë ku'uxyë ets ja ijxpëjkpëtëjk tpëjkmujktë wëxtujk katsy ja tsajpkääky natëkë ets ja ajkx natëkë. 38Nimajktaxk mil ja ye'etyëjkëty mëti'ipë ojts kyäytyën, ëpëky ja to'oxytyëjkëty ets ja pi'k ëna'këty. 39Tääts ja Jesús ojts nyäjyëkajpxënë mëët ja mayjyä'äy ets kepy nëëwinye'epyëjoty tyëjkëy, jam ojts nyijkxy Magdala y'itjotm.

Currently Selected:

Mateo 15: QUETZMIXE

Highlight

Copy

Compare