El Apocalipsis 7
7
Imarca̱tcap 144,000
1Mit cʉs̈ tʉn-is̈ mactas̈p ángejlat, mit je'jat tenagap cada esquina en ayʉ̱́j mundu, mit itentsougap ayé mactas̈p s̈e'jmat na̱s̈ni'cway pa magas̈ujca na̱s̈ni'c ne lama̱tni'c ne maga-ajca'uga tu'c cujy. 2Mit tʉn-ís̈ey jatu'c ángel, mit je' cu't mam ipichin s̈ʉjw, mit je' imuyo'jyau imarca ayé Dios jeme tsʉ̱napay pa siempre. Ayé marca inʉmo'jcʉp ni'c je'jat Dios ijayajwat. Ayé ángel imucotscʉs̈ mʉgʉc ayé mactas̈p ángejlat, ni'c je'jat imoygau poder ma watca dañu na̱s̈ni'c mit lama̱tni'c. 3Mit inʉmgʉs̈au:
—Camniwatca dañu na̱s̈ni'c, ne lama̱tni'c, ne cuyni'jcat. Mojyʉ'jcac laj tʉmarcá̱tca iwimpacni'jcat ayé jayajwat iservia̱tcajapay Dios.
4Mit tʉnmarau pʉjʉjnat imarca̱tcámpay. Imarca̱tcau ciento cuarenta y cuatro mil jayajwat, nu'pʉjʉn Israelway jayajwat ifamiliajat. 5Imarca̱tcau iwimpacni'jcat doce mil jayajwat jeme pichingaway Judá ifamiliani'c. Imarca̱tcau doce mil jayajwat jeme pichingaway Rubén ifamiliani'c. Imarca̱tcau doce mil jayajwat jeme pichingaway Gad ifamiliani'c. 6Imarca̱tcau doce mil jayajwat jeme pichingaway Aser ifamiliani'c. Imarca̱tcau doce mil jayajwat jeme pichingaway Neftalí ifamiliani'c. Imarca̱tcau doce mil jayajwat jeme pichingaway Manasés ifamiliani'c. 7Imarca̱tcau doce mil jayajwat jeme pichingaway Simeón ifamiliani'c. Imarca̱tcau doce mil jayajwat jeme pichingaway Leví ifamiliani'c. Imarca̱tcau doce mil jayajwat jeme pichingaway Isacar ifamiliani'c. 8Imarca̱tcau doce mil jayajwat jeme pichingaway Zabulón ifamiliani'c. Imarca̱tcau doce mil jayajwat jeme pichingaway José ifamiliani'c, mit imarca̱tcau doce mil jayajwat jeme pichingaway Benjamín ifamiliani'c.
Tu'c jayaujuc cutigatsijcat mit po'pjamuc
9Mit cʉs̈ tʉn-is̈ mayo'c jayajwat mit nepʉn ca-oyawu iguimaycupa̱ti. It jayajwat de nu'pʉjʉn na̱s̈at, nu'pʉjʉn grupu de jayajwat, nu'pʉjʉn nʉ'jcopajcat mit nu'pʉjʉn cotscapay jatu'c ajwat. Mit je'jat tsʉ̱ngau mam Dios imanda̱t itrononi'c, mit mam itsʉ̱na ayé borreguwáy Jesucristu. Mit nu'pʉjʉn je'jat cutigatsijcat mit po'pjamuc, mit imuyo'ygau tu̱ts-ajy icʉ'ni'jcat ni'c imʉjninʉmgau Cristu. 10Mit cotscau mʉgʉc, inʉmgau:
Dios tsʉ̱nap itrononi'c,
mit je' mit ayé borreguwáy Jesucristu nas̈salva̱tcau.
11Mit nu'pʉjʉn ángejlat tenagau mam Dios itsʉ̱na itrononi'c, mit mam itsʉ̱nga na'waywájat mit we'ney mam itsʉ̱nga ayé mactas̈p ángejlat. Mit nicos̈atenda̱jcʉjʉu mam i-it ayé trono, mit i-adora̱tcau Dios. 12Mit inʉmgau:
Namʉjninʉ́mga Dios pa nu'pʉjʉn tiempu.
Na-oyninʉ́mga je' mit nanʉ́mga ni'c je' oymanac,
mit nanʉmí̱jcaja ni'ctiyu̱s̈ ni'c je' ijawip nu'pʉjʉn
mit ijtʉp nu'pʉjʉn poder.
We'n ma jat.
13Mit cʉs̈ tu'c de ayé na'waywájat tʉs̈mucots, inʉm:
—¿Is̈jawiga pʉjnat ayé jayajwat cutigatsijcatway mit po'pjamuc, mit jʉm imíngaj?
14Mit tʉnyʉjmau:
—Señor, mi̱ más injawip.
Mit je' tʉs̈nʉjmau:
—Ayʉ̱́jat itunas̈o'jcau na̱s̈ni'c mit jinap mingau pa yam. Mit jinap nilimpia̱tcʉjʉu as̈am putsijcatway ijamujcat, mit limpiu itajn ni'c ayé borreguwáy Jesucristu o'c cunu̱s̈ni'c pa iguichi'tcajáj ima̱jlat. 15Jemni'c je'jat tsʉ̱ngap mam Dios imanda̱t itrononi'c, mit iservia̱tcajap je' tsu'm mit s̈ʉ̱m je' itempluni'c. Mit Dios jeme tsʉ̱napay itrononi'c iguicuida̱tcáj. 16Mit je'jat cajacayo'jcʉjʉ̱́j ne cajanʉ-u̱go'jcʉjʉ̱́j, mit ne s̈ʉjw iguigajano'jcáj, mit ne catoygáj. 17Ni'c ayé borreguwáy Jesucristu jeme tsʉ̱napay mam Dios imanda̱t itrononi'c, je' icuida̱tcʉs̈áj, mit je' iwejnu'pcʉs̈áj pa mam imu'twa'n nʉ' jeme iyacpay vida. Mit Dios icupo'tcʉs̈á̱j iwinʉ'jat mit cajajʉygáj.
Currently Selected:
El Apocalipsis 7: PSNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
