San Juan 2
2
Tu'c cʉ'pa't nʉ'jcopac Caná
1Imutu̱gupay s̈ʉjw it tu'c cʉ'pa't nʉ'jcopac Caná Galileajway na̱s̈, mit jem its-naj Jesús ima̱m. 2Mit i-imvita̱tcawey Jesús mit ipʉctampajyat en ayé cʉ'pa't. 3Mit iguicʉs̈cajau vinu, Jesús ima̱m iguinʉjmau:
—Ca-itcʉjʉp vinu.
4Jesús inʉjmau:
—Mamá, tʉnjawinup ayʉ̱́j. Canicoyp hora tʉs̈ajque's̈wa'n tʉmpoder.
5Ima̱m inʉmgʉs̈au jeme majyigapay:
—Watca nu'pʉjʉn is̈nʉmgajámpay je'.
6Mit jem i-ijt seis tinaja de tsa' itucomgapay nʉ', itunicupujcʉjʉpay judíujat, ni'c we'n igui-acostumbrá̱tcaj. Mit cada tinaja i-i'cp mechc o tu̱gup majc nʉ'. 7Jesús inʉmgʉs̈au:
—Apátsca ayʉ̱́j tinajajat mit nʉ'.
Mit i-apatscau bien patsic. 8Cʉs̈ inʉmgʉs̈au:
—Je'pca mit munʉ́s̈caja ma̱s̈ʉuwatpayna'.
Mit imunʉs̈cajau. 9Mit ma̱s̈ʉuwatpayna' iproba̱t ayé nʉ' jatway vinu, mit igajawiwu jʉm imijn ayé, po ijawigau ayé majyipajyat ije'pcaway ayé nʉ'. Cʉs̈ iya̱s̈ noviona', 10mit inajau:
—Nu'pʉjʉn jayau iyajcʉ'cp oyway vinu, mit cʉs̈wa'n igui-u̱jca may, iyacpama vinu corrienteway, po mi̱ inguarda̱tway oyway vinu hasta jinap.
11Ayʉ̱́j milagru iwajtʉ'c Jesús itsʉ̱naj en ayé nʉ'jcopac Caná Galileajway na̱s̈, mit i-actujawigʉs̈ nu'pʉjʉn ni'c ijtʉp poder, mit ipʉctampajyat iguicupʉjcau.
12Mit cʉs̈ nʉs̈cau pa Capernaum, je' mit ima̱m, ije̱wajyat mit ipʉctampajyat, mit jem itángaj una̱c s̈ʉjwat.
Jesús ilimpia̱t templu
13Itomij ayé ma̱s̈ʉjw pascua itsowí̱jcapay judíujat, Jesús nʉcs̈ pa Jerusalén, 14mit ipa̱tcʉs̈ templuni'c jeme ito'jcapay buejyat, borregujat mit palomajat, mit jemey itsʉ̱ngaj tumi̱ntigatspayna'jat. 15Mit iguiwajt tu'c tʉps̈ pa mo'an, i-acpichingʉs̈ nu'pʉjʉn templuni'c, mit we'ney ayé borregujat mit buejyat, mit i-acs̈is̈cada̱c tumi̱ntigatspayna'jat itumi̱jnat, mit i-acchi'tpitujcʉs̈au ime̱s̈ajat, 16mit inʉmgʉs̈au jeme ito'jcapay palomajat:
—Acpíchinga yam ayʉ̱́jat, ingapʉjcajáj pa mercadu tʉnte̱t itʉjc.
17Wejpu'n ipʉctampajyat inijawigau jeme tsʉ̱napay ja'yic Dios ilibruni'c: “Tʉnwamp tʉs̈cuida̱twa'n intʉjc.”
18Mit judíujat iguinʉmgajau:
—¿Ti milagru is̈actu-e'pcáj pa tʉjáwiga ni'c inaguep derechu pa is̈wat we'n?
19Ipo'ngʉs̈ Jesús:
—Actogoydá̱jca ayʉ̱́j templu, mit en tu̱gup s̈ʉjw tʉs̈ajca's̈ʉ'cwa'natu.
20Cʉs̈ judíujat iguinʉmgajau:
—Cuarenta y seis s̈iwit itu-ajca's̈ʉ'jcaway ayʉ̱́j templu, ¿mit is̈jawi en tu̱gup s̈ʉjw is̈ajca's̈ʉ'cwa'n?
21Po je' inʉmo'jcʉp ni'c ayé templu icuerpu ayé. 22Jemni'c cuandu ijutucta̱jc mam itsʉ̱nga á̱nimajat, inijawigau ipʉctampajyat ni'c we'n iguinʉjm, mit icupʉjcau tsʉ̱napay ja'yic Dios ilibruni'c, mit lo que inʉmway Jesús.
Jesús i-is̈cap nu'pʉjʉn jayajwat
23Itsʉ̱naj Jesús Jerusalén en ayé ma̱s̈ʉjw pascua, may jayajwat icupʉjcau je' ni'c i-is̈cau ayé milagrujat iwatpay. 24Po Jesús iga-aguepcʉs̈awu confianza ni'c je' i-is̈capcʉs̈p nu'pʉjʉn jayajwat, 25mit je' iganesita̱tu nepʉn iguinʉjmáj nat itsʉ̱na tu'c jayau, ni'c je' i-is̈cajpap cada jayau ijo̱jt.
Currently Selected:
San Juan 2: PSNT
Highlight
Share
Copy
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].