Hebreos 2
2
Salvación mʉjo'cway
1Jemni'c oy nawátca más cuenta ayé cosajat namaraugaway, pa nagacunʉ́s̈iga jatu'c laj. 2Ni'c nu'pʉjʉn inʉmgaway ángejlat pichin iyacs̈ta'cway, mit nu'pʉjʉn ampay jayajwat iwatcaway mal mit cajayaumaygaway, Dios oyo'gu igui-actutso̱jcʉs̈ jaran. 3Te wename ijajt ámbanu, ʉjtsat ca-oyámpey napo'jca te nagawatcap cuenta tu'c mʉjway salvación. Mit ayé salvación el Señor i-anuncia̱jtʉ'c, mit jeme imaraugaway nas̈nʉmgajau ni'c ayé iyacs̈ta'cway. 4We'ney Dios i-actujawigʉs̈ jayajwat ni'c iyacs̈ta'cway ni'c i-actu-is̈cʉs̈ ipoder, mit i-acnigu-epigʉs̈ʉu mit ayé milagrujat iwatway. Mit i-ajyu'tcʉs̈au Espíritu Santu, mit imoygʉs̈ cada jayau as̈am je' iguiwajn.
Jesús it ti ijajt jayau
5Dios igamoygʉs̈u ángejlat ma manda̱tca ayé nam mundu mi'námpay, mit jinap na-ampiugap de ayé nam mundu. 6Dios itumuyajcʉs̈ jayajwat nu'pʉjʉn cosajat, ni'c tu'c jayau imucots Dios en tu'c salmu, inʉm:
¿Ti valia̱tp tu'c jayau pa is̈nijawiwa'n je'?
Tini'c is̈wat cuenta tu'c jayau?
7Mi̱ inyajcʉs̈ jayajwat más menus que ángejlat,
po inyajcʉs̈ mʉjninʉmijcat,
mit intumuyajcʉs̈ nu'pʉjʉn inwatway,
8nu'pʉjʉn cosajat inactudomina̱tcʉs̈.
Ni'c Dios itumuyajcʉs̈ jayajwat nu'pʉjʉn cosajat, po majawe'naj cani-oyap iguidomina̱tca nu'pʉjʉn cosajat. 9Po najawigap ni'c Jesús Dios iguiyac más menus que ángejlat pa tu'c tiempujyu. Dios nas̈wano'jcau mit iyac iway ma o'c pa nu'pʉjʉn jayajwat ma nisalva̱tcʉjʉ, mit jemni'c iyagatu más mʉjninʉmic que ángejlat ni'c je' itunas̈ cuandu i-o'jc.
10Nu'pʉjʉn cosajat Dios i-actambʉ'mp mit je' iwat nu'pʉjʉn. Mit Dios inʉm ni'c oy iguitunas̈wa'n iway pa ma pichin oy, pa we'n oyáj igui-acnisalva̱tcʉs̈ʉ jayajwat, pa iguimunʉs̈cʉs̈wa'n yucm mam i-oymanagui. 11Ni'c jeme ilimpia̱tcʉs̈away ima̱jlat mit jeme tsʉ̱ngapay limpiu itcʉjʉp tu'gu Dios iguimanda̱tcapay. Jemni'c Jesús cawinchu̱gap iguinʉm ni'c je'jati-e'pcʉs̈p as̈am ije̱wajyat. 12Ni'c inʉm Dios ilibruni'c:
Tʉnje̱wajyat tʉ-actu-is̈capcʉs̈áj mi̱,
tʉn-ʉwáj himnujat pa tʉmʉjninʉmwa'n mam itsʉ̱nga jayajwat apʉcmuguijcat.
13Mit inʉmatu:
Ʉ̱ tʉconfia̱táj mit je'.
Mit inʉmey:
E'pca, yam tʉtsʉ̱na mit Dios iwajyat jeme tʉs̈moygʉs̈way.
14Ʉjtsat najayajwat en ayʉ̱́j mundu, jemni'c Jesús jatey jayau, mit je' o'c pa igui-actogoyda̱jcawa'n Awayagatsna' ipoder, ni'c ayé poder nas̈ago'jcap. 15Mit Jesús nas̈libra̱tcau nanu'pʉjʉjnat, ni'c Awayagatsna' nas̈actsʉ̱ngau domina̱tic nu'pʉjʉn navidajat ni'c napʉ̱tcapate na-o'jcawa'n. 16Iyacs̈ta'cway Jesús igamajyigʉs̈u ángejlat, más iwan iguimajyigʉs̈wa'n nu'pʉjʉn jayajwat ni'c je'jat pichingau Abraham ifamiliani'c. 17Jemni'c Jesús it ti ijajt jayau pa igui-e'pcʉs̈wa'n jayajwat as̈am ije̱wajyat, mit pa itanwa'n je' meru mʉjpa̱nij pa iguiservia̱jtawa'n Dios, ni'c je' más ayo̱wis̈p mit más cumplia̱tp, mit itso̱jcʉs̈au nu'pʉjʉn jayajwat ima̱jlat. 18Mit como je' itunas̈ cuandu iguitenta̱t ma̱lwayna', jinap je' ijtʉp poder pa iguimajyigʉs̈wa'n jeme yo'ygapay tenta̱tic.
Currently Selected:
Hebreos 2: PSNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
