Gálatas 5
5
Tánga mʉgʉc mit Cristu
1Cristu is̈libra̱tcaway. Jinap tanga mʉgʉc mit camjatsʉ̱nga to'ctʉgʉyic as̈am mozojat.
2Maraugac. Ʉ̱ Pablo tʉnʉmgʉs̈ap ni'c te mitsʉ̱ngap marca̱tic as̈am judíujat inimarca̱tcʉjʉ, inyajcap jalmanu Cristu. 3Tʉnyʉmgʉs̈ap nu'pʉjʉn jayajwat jeme nimarca̱jtʉ́mpay wename, itp ti iguiguarda̱twa'n nu'pʉjʉn Moisés iley. 4Migajatsʉ̱ngap mit Cristu te inwangap is̈yacs̈icninʉmgáj ayé ley. Incuyaguigaway ayé favor iyacway Dios. 5Mit ʉjtsat na-atsʉ̱ngap nas̈yacs̈icninʉmgáj Dios, mit nacupʉjcap ni'c Espíritu Santu nas̈actu-atsʉ̱ngap ayé jatámpay. 6Ni'c te namutʉgʉygap Cristu Jesús, cavalia̱tp te namarca̱tic o te nagamarca̱tic. Más valia̱tp te naniwangʉjʉp pa jayajwat ma e'pca ni'c nacupʉjcap.
7Miyo'ygapate oymanac. ¿Jinap pʉn is̈atujcap pigajayaumayga lo que iyacs̈ta'cway? 8Dios is̈ya̱s̈cau, po caje' as̈am ayé jeme is̈jomigapay. 9Pi nijawiga ni'c s̈ʉ̱n levadura i-actimamp nu'pʉjʉn harina-cʉ't 10Tʉconfia̱tp mit el Señor ni'c migajatigatscáj, po pʉmba'tu jeme is̈trastorna̱tcapay, Dios iguijuzga̱táj.
11Hermanujat, te ʉ̱ tʉnajque's̈tacyo'yp ni'c jayajwat ma nimarca̱tcʉjʉ, ayé judíujat tʉs̈capo'ctangájate. Te tʉnyʉmgʉs̈ap jayajwat ma nimarca̱tcʉjʉ, másta judíujat caja-awa'nigáj ni'c tʉnyʉmdacyo'yp ni'c Cristu o'c cunu̱s̈ni'c. 12Ayé jayajwat jeme is̈jomigapay, ¡mejor ma nitsújcʉjʉ je'jatu!
13Hermanujat, Dios is̈ya̱s̈cau pa pi tsʉ̱nga libre. Solo camabusa̱tca ayé libertad pa is̈watcawa'n lo que iyo'tpay injo̱jtat, po nimájyigʉjʉ ni'c miniwangʉjʉp. 14Ni'c nu'pʉjʉn ley tsʉ̱nap cumplia̱tic te najayaumaygap lo que inʉmway Dios: “Inwa'náj inmupro̱wije̱way as̈am mi̱ inyiwajnʉ.” 15Po te mini-ago'jcʉjʉp mit te mitsuguinwatcap, nicuidá̱tcʉjʉ piganicʉs̈cʉjʉ.
Yo'yga mit Espíritu Santu
16Tʉnyʉmp ayʉ̱́j: Yo'yga mit Espíritu Santu mit we'n ingawatcáj ayé mal iyo'tpay injo̱jtat. 17Ni'c te inwangap ayé mal iyo'tpay injo̱jtat, ingawangáj lo que Espíritu Santu iwampay. Mit te inwangap lo que Espíritu Santu iwampay, ingawangáj ayé mal iyo'tpay injo̱jtat. Espíritu Santu igamunipʉjcʉp mal cosajat, jemni'c ca-oyap is̈wátca lo que inwangapay. 18Po te Espíritu Santu is̈wejnu'pcajap, ayé ley is̈cajamanda̱tcáj.
19Mit najawigap ti ayé ma̱jlat iyo'tpay jayajwat ijo̱jtat: iwangap jayto's̈ay, chajyo'ygap, iwatcap mal, iwatcada̱jcap tigapa'tu, 20iwangap tiyu̱s̈at, ipʉctangap tso'c, i-angap tu'c jayau, tsuguinwatcap, imu-awa'nigap pʉmba'tu, awa'ni-o'jcap, imutsuguinwatcap tambʉn, iwatcap división, catsʉ̱ngap de acuerdu, 21i-angap jeme ijtʉpay, ago'jcap, u̱ctupʉjcap, u̱ctacyo'ygap, mit iwatcap japu̱t cosajat as̈am ayʉ̱́jway. Mit tʉnʉmgʉs̈ap as̈am tʉs̈nʉjmʉ'jc, ni'c jeme iwatcapay ayé cosajat igapʉctsougáj neti en ayé lugar mam imanda̱t Dios.
22Po ayʉ̱́j ayé lo que iwatpay Espíritu Santu pa ʉjtsat: Nas̈acniwangʉjʉp, nas̈acji'jcajap najo̱jtat, nas̈moygap paz, nas̈moygap calma, nas̈acjayawangap, nas̈actuwatcap oy, nas̈actugupʉjcap Dios, 23naganimʉjninʉmgʉjʉp, nagawatcada̱jcap tigapa'tu. Mit ca-itp nejʉmay ley contra ayé, ni'c ayé puru cosa ojyatway. 24Po Cristu iwajyat tsʉ̱ngap as̈am crucifica̱tic mit je', mit igajawangap ayé mal iyo'tpay ijo̱jtat, mit nejʉmay mal igajawangap. 25Te Espíritu Santu tsʉ̱nap najo̱tni'jcat, nayo'yga-ey as̈am je' iguiwa'n.
26Naganimʉjninʉ́mgʉjʉ, naga-ac-awa'niga nahermanujat, nagani-ángʉjʉ.
Currently Selected:
Gálatas 5: PSNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
