Gálatas 3
3
¿Nacumplia̱tcáj ley o nacupʉjcáj Jesucristu?
1¡Oh jayajwat Galaciajatway mitontojo'jcat! ¿Pʉn itrastorna̱t incopajcat pigajayaumayga lo que iyacs̈ta'cway? Ʉ̱ tʉ-ajque's̈cʉs̈au pajcu ni'c Jesucristu tsʉ̱nau crucifica̱tic. 2Tʉnwamp tʉs̈jawiwa'n ayʉ̱́j: ¿Impʉctsougau Espíritu Santu ni'c incumplia̱tcau Moisés iley o ni'c incupʉjcau ayé inmaraugaway? 3¿Is̈jawiga mitontojo'jcat? Michu̱chigau mit Espíritu Santu, ¿mit jinap is̈jawiga mitsʉ̱ngáj oy ni'c mijchatu miniconfia̱tcʉjʉp? 4¿Intunas̈o'jcau jalmanu? Mijchat injawigap te jalmanu is̈tunás̈caj. 5Dios is̈moygau Espíritu Santu, mit iwat milagrujat mam mijchat. ¿Is̈jawiga iwat ayé ni'c incumplia̱tcau ley o ni'c incupʉjcau ayé inmaraugaway?
6Abraham icupʉc Dios, jemni'c Dios iguipʉctso̱u as̈am tu'c jayau yacs̈icway. 7Jemni'c pi jawiga ni'c jeme cupʉjcapay, aye'jat as̈am Abraham iwajyat. 8Mit Dios inʉjmʉ'c ilibruni'c ni'c je' iyacs̈icninʉmgʉs̈áj jeme caje'jatway judíujat te iguicupʉjcap, mit inʉjmʉ'jcau Abraham ayé oyway noticia, inʉm: “Dios i-oyninʉmgʉs̈áj nu'pʉjʉn jayajwat as̈am igui-oyninʉjm je'.” 9Jemni'c jeme cupʉjcapay, Dios igui-oyninʉmgáj as̈am igui-oyninʉjm Abraham jeme cupʉcway.
10Ni'c nu'pʉjʉn jayajwat jeme pensa̱tcapay pa puru ley iguicumplia̱tcawa'n tsʉ̱ngap maldiciona̱tic ni'c ja'yic itsʉ̱na Dios ilibruni'c: “Maldiciona̱tic pʉmba'tu jeme igajayaumaypay nu'pʉjʉn jeme tsʉ̱napay ja'yic leyni'c, ni'c itp ti iguiwatwa'n lo que inʉmpay ley.” 11Najawigap ni'c ayé ley igayacs̈icninʉmp nepʉn mam igui-e'p Dios, ni'c ja'yic itsʉ̱na Dios ilibruni'c: “Dios iyacs̈icninʉmp tu'c jayau jeme cupʉcpay, mit je' tsʉ̱náj oy.” 12Po Moisés iley caje' pa jeme cupʉcpay, ni'c inʉmp ayé ley: “Jeme icumplia̱tpay ley, tsʉ̱náj oy.”
13Cristu nas̈libra̱tcau pa nagatsʉ̱nga maldiciona̱tic por ayé ley ni'c je' tsʉ̱nau maldiciona̱tic pa ʉjtsat. As̈am itsʉ̱na ja'yic Dios ilibruni'c: “Maldiciona̱tic pʉmba'tu jeme tsʉ̱námpay tʉyic en tu'c cujy.” 14Jat we'n pa Dios igui-oyninʉmgʉs̈wa'n jeme caje'jatway judíujat te icupʉjcap Cristu Jesús ni'c we'n igui-oyninʉjm Abraham, mit napʉctsougáj ayé Espíritu Santu iprometia̱tway Dios ni'c nacupʉjcap.
Ayé ley mit ayé promesa
15Hermanujat, tʉmoygʉs̈áj tu'c ejemplu. Te jayajwat iwatcap tu'c acuerdu mit te inipo'ngap, nepʉn iga-actogoyda̱cp ne igatigatsp. 16Mit Dios imoy tu'c promesa Abraham mit jeme pichinámpay ifamiliani'c. Iganʉmu ni'c ayé promesa pa iwajyat as̈am te mayo'jcat, po imoy pa tu'gu. Inʉm: Ayé promesa pa jeme pichinámpay infamiliani'c, mit ayé inʉmo'jcʉp Cristu. 17Tʉnyʉmo'jcʉp ni'c Dios iwajtʉ'c tu'c acuerdu mit Abraham, mit Moisés iley jeme minway cuatrocientos treinta años después igaja-actogoyda̱gu ayé acuerdu pa iguiyacwa'n jalmanu ayé promesa. 18Te napʉctsougap nu'pʉjʉn ni'c najayaumaygap ley, cajavalia̱tp lo que iprometia̱tway Dios. Po Dios iprometia̱jtau Abraham ni'c ipʉctsowáj we'nujyu nu'pʉjʉn iguimo'ámpay Dios.
19¿Pa ti oy ayé ley? Ayé ley iyajcau pa nas̈culpa̱tcáj hasta tegamimp Cristu jeme i-acminway Dios, mit je' ipʉctso̱u ayé promesa. Mit ángejlat itumuyajcau ayé ley Moisés, mit Moisés imoygʉs̈ ayé ley pa jayajwat ma jayaumayga, mit je' tan as̈am tu'c cowampay. 20Mit tu'c cowampay igacowamp tu'gu jayau, po Dios itu'gumu iguiyajc ayé promesa.
¿Pa ti oy ayé ley?
21¿Is̈jawiga ayé ley i-atucp ayé promesajat iyacway Dios? Caje' we'n. Ni'c te ayé ley iyacway Dios oyapate nas̈moygap vida, iyacs̈ta'cway nas̈yacs̈icninʉmgájate ayé ley. 22Po Dios ilibru inʉmp ni'c nu'pʉjʉn jayajwat tsʉ̱ngap to'ctʉgʉyic mit ma̱jlat, po jeme icupʉjcámpay Jesucristu ipʉctsougáj ayé promesa iyacway Dios.
23Po antes nas̈cupʉ́jcaj Jesucristu, ayé ley nas̈actsʉ̱ngau as̈am presujat, mit to'ctʉgʉyic natsʉ̱́ngaj hasta nas̈jáwigaj ni'c nacupʉjcap Jesucristu. 24Mit ayé ley nas̈manda̱tcau as̈am tu'c amayipay hasta imijn Cristu, mit nacupʉjcau je' pa Dios nas̈pʉctsougáj. 25Po como nacupʉjcanup Cristu, nas̈cajamanda̱tcap ayé ley as̈am amayipay.
26Ni'c mijchat minu'pʉjʉjnat is̈wajyat Dios ni'c incupʉjcap Cristu Jesús. 27Mijchat minʉ'gutemijcat ni'c inmutʉgʉygau Cristu, mit jinap inaguepcanup nam vida mit je'. 28Dios niwe'nu igui-e'pcʉs̈ nu'pʉjʉn jayajwat, judíujat mit jeme caje'jatway judíujat, mozojat mit jeme yo'ygapay libre, qui'chajyat mit to's̈ajyat, ni'c minu'pʉjʉjnat as̈am tu'jcatu ni'c incupʉjcap Cristu Jesús. 29Mit te mijchat is̈wajyat Cristu, iyacs̈ta'cway mijchat is̈wajyatey Abraham, mit impʉctsougáj lo que iprometia̱tway Dios.
Currently Selected:
Gálatas 3: PSNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
