Efesios 6
6
1Nu'pʉjʉn ya̱wájat ma jayaumayga ima̱jmat mit ite̱jtat as̈am iguijayaumáyga el Señor, mit oy ma watca wename. 2Oyninʉm inte̱t mit inma̱m, ni'c ayʉ̱́j ayé imanda̱tway Dios primeru, mit iyac tu'c promesa pa jeme ijayaumaypay ayé mandamientu. 3Iprometia̱t ni'c mitsʉ̱ngáj oy, mit inaguepcáj vida yagatsway en ayʉ̱́j mundu.
4Jayajwat, camac-awa'niga inwajyat, po acye'jca bien yacs̈ic, mit actupʉctánga lo que inʉmpay el Señor.
5Mozojat, jayaumáyga injaycat jeme tsʉ̱ngapay en ayʉ̱́j mundu, pʉ̱́tca mit respetá̱tca je'jat. Jayaumáyga mit nu'pʉjʉn injo̱jtat as̈am is̈jayaumáyga Cristu. 6Yos̈wátca mit injaycat, caje'yu cuandu is̈-e'pcap, po yos̈wátca as̈am iguiwátca Cristu imozojat, mit watca mit nu'pʉjʉn injo̱jtat lo que iwampay Dios. 7Yos̈wátca oy ni'c inservia̱tcajap el Señor mit caje' pa jayajwatu. 8Injawigap ni'c jeme iwatpay oy, wename-ey iguitso'gáj el Señor, te yos̈watp jayyos̈ni'c o te iwatp je'yu iyos̈.
9Mit mijchat mijefejat, watca ni-as̈amu mit inmozojat. Cammu-awa'ncotsca mʉgʉc. Injawigap ni'c tsʉ̱nap tsajpni'c jeme is̈manda̱tcapay mijchat mit we'ney je'jat, ni'c el Señor niwe'nu igui-e'pcʉs̈ nu'pʉjʉn jayajwat.
Ayé arma nas̈moygapay Dios
10Hermanujat, tsʉ̱́nga mʉgʉc mit el Señor ni'c je' ito'jcʉp maj pa is̈majyigáj. 11Muyo'yga nu'pʉjʉn arma is̈moygapay Dios, pa we'n Awayagatsna' ca-oyáj is̈watcajap neti mit imaña. 12Ni'c nagalucha̱tcap mit jayajwat, nalucha̱tcap mit mal-espíritujat jeme manda̱tcapay mit i-acyo'ygap jayajwat chitimicni'c ni'c je'jat imanda̱tcap nu'pʉjʉn mundu, mit ayé mal-espíritujat manda̱tcapey s̈e'mni'c. 13Jemni'c muyo'yga nu'pʉjʉn arma is̈moygapay Dios, pa we'n oyáj is̈majmóyga cuandu is̈mingajáj tu'c mal s̈ʉjw. Mit te inmuyo'ygap nu'pʉjʉn arma, mitangáj mʉgʉc. 14Siguiá̱tca mʉgʉc ni'c injawigap lo que iyacs̈ta'cway, mit mitsʉ̱ngáj prepara̱tic as̈am tu'c soldaj jeme i-actsʉ'cs̈pay ipi̱nic. Mit watca oy mit mitsʉ̱ngáj prepara̱tic as̈am tu'c soldaj icompay ichec waticway de pus̈an. 15Tsʉ̱́nga prepara̱tic pa is̈nʉmdacyo'ygawa'n ayé oyway noticia nas̈moygapay paz, mit we'n mitsʉ̱ngáj prepara̱tic as̈am tu'c soldaj jeme tsʉ̱napay listu comic ita'ncʉ'ac. 16Mit más oy pi watca ayʉ̱́j: cupʉ́jca mʉgʉc mit mitsʉ̱ngáj prepara̱tic as̈am tu'c soldaj itunidefendia̱jtʉpay tu'c mʉjway pus̈an, mit wename inmajmoygáj ayé malwayna', ni'c je' iwa'náj is̈cotcáj, mit icotan as̈am flecha jeme tinimpay. 17Mit cupʉ́jca ni'c is̈salva̱tcaway Dios, mit mitsʉ̱ngáj prepara̱tic as̈am tu'c soldaj icompay ipus̈ancumo'n. Mit pʉjca ayé espada is̈moygapay Espíritu Santu, mit ayé espada inʉmo'jcʉp Dios ipalabra inyʉmdacyo'ygapay. 18Na-ora̱tí̱jca nu'pʉjʉn tiempu, mit nayo'tí̱jcaja Dios, mit nas̈majyigáj Espíritu Santu pa na-ora̱tcawa'n. Tsʉ̱́nga prepara̱tic mit camdesmaya̱tca. Ora̱tí̱jca pa nu'pʉjʉn Dios ijayajwat. 19Orá̱tcajaguey pa ʉ̱, pa cuandu tʉcotswa'n, Dios ma tʉs̈mo'ac ti tʉnyʉmámpay. Pa we'n tʉgapʉ̱táj tʉs̈nʉmwa'n ayé oyway noticia nas̈actujawigapay Dios, ni'c jayajwat igajawigapate ayé oyway noticia. 20Mit Dios tʉs̈ajyu't pa tʉyo'ywa'n pa je', po jinap tʉtsʉ̱nap presu. Yo'tcaja Dios pa tʉgapʉ̱t tʉs̈nʉmdacyo'ywa'n ayé oyway noticia, ni'c wename itp ti tʉcotswa'n.
Pablo isaluda̱tcʉs̈p Efesiojatway
21Mit Tíquico is̈actujawigáj nat tʉtsʉ̱na mit ti tʉnwatpay, ni'c je' tu'c hermanu nawangapay, mit je' imuyos̈watp oy el Señor. 22Jemni'c tʉs̈ajyu'jt je' mam mijchat pa pi jawiga nat tʉtsʉ̱nga, mit pa pi tsʉ̱nga anima̱tic.
23Dios Nate̱jat mit el Señor Jesucristu ma moyga paz hermanujat, ma niwangʉjʉ ni'c je'jat cupʉjcap mʉgʉc. 24Dios ma moygʉs̈ favor nu'pʉjʉn jayajwat jeme iwangapay iyacs̈ta'cway el Señor Jesucristu. Amén.
Currently Selected:
Efesios 6: PSNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
