Hechos 24
24
Pablo nicowajnʉu mam Félix
1Iguinás̈caj cinco s̈ʉjw, coygau ayé mʉjpa̱nij Ananías mit una̱c na'waywájat, mit tu'c abogado inʉ'jyway Tértulo, mit nipresenta̱tcʉjʉu mam ayé gobernador pa igui-acusa̱tcawa'n Pablo. 2Cuandu iguimumíngaj Pablo, Tértulo chu̱chiu igui-acusa̱t je', mit inʉjmau ayé gobernador:
—Por mi̱ oyo'gu natsʉ̱nga mit nepʉn nas̈camunyajcap, mit como inis̈capo'cp, may cosa oyway is̈wajt pa nu'pʉjʉn ayʉ̱́j na̱s̈. 3Siempre ʉjtsat mit jeme tsʉ̱ngapay nu'pʉjʉn lugajrat tʉmpʉctsougap lo que inwatway, mit tʉnʉmgajap ni'ctiyu̱s̈, oh Félix más mimʉjninʉmicway. 4Mit pa tʉgajomiwa'n más, tʉyo'jtap pi is̈maraugac s̈ʉ̱n ni'c mi̱ inaguepo'cp calma. 5Tʉmpa̱tcau ni'c ayʉ̱́j jayau Pablo nas̈jomi-o'jcap, mit je' i-acchu̱chip tsuguin jʉmba'tu mam judíujat. Ayʉ̱́j jayau imanda̱tp tu'c grupu inʉmgapay nazarenujat. 6Ayʉ̱́j jayau iwaney iguijinwa'n tʉntemplujat, mit cuandu tʉs̈actángaj, tʉnwangau tʉs̈juzga̱tcawa'n as̈am iguinʉm tʉnlejyat. 7Po tʉs̈pʉctʉgʉygau ayé mʉjcapitán Lisias, mit tʉs̈chi'tcajau tʉncʉ'jugujmat. 8Mit inʉmgʉs̈au jeme i-acusa̱tcapay je' ma minga mam mi̱. Mi̱ oyap is̈-ucyo't ayʉ̱́j jayau pa is̈jawiwa'n nu'pʉjʉn ayʉ̱́j cosajat tʉntu-acusa̱tcapay.
9Mit ayé judíujat inʉmgau ni'c iyacs̈ta'cway nu'pʉjʉn inʉmway Tértulo. 10Mit cʉs̈ ayé gobernador iwajtau seña Pablo ma cots. Mit cʉs̈ Pablo inʉm:
—Como tʉnjawip ni'c pa mayap s̈iwit is̈manda̱tcʉs̈ jayajwat ayʉ̱́j na̱s̈atway, tʉnwamp tʉnicowajnʉwa'n mam mí̱. 11Lo que ʉ̱ tʉnyʉmámpay, oyap is̈-ucyo'tcʉs̈ te iyacs̈ta'cway. Cani-ijtʉp doce s̈ʉjwat tʉcojy Jerusalén pa tʉs̈adora̱twa'n Dios. 12Mit tʉs̈capa̱tcawu ni'c tʉnwat mal. Tʉngamuninʉjmʉp nepʉn ne tʉnga-apʉcmugu jayajwat ma tsuguinwatca, ne templuni'c, ne mam i-adora̱tca judíujat, ne nʉ'jcopacni'c. 13Ayʉ̱́j jayajwat ca-oyap iguicomproba̱tca ayé cosajat jeme tʉs̈tu-acusa̱tcapay jinap. 14Po ayʉ̱́j tʉnʉjmap: Je'jat inʉmgap ni'c tʉnajque's̈p jatu'c ama̱s̈an, po tʉnadora̱tpey tʉnte̱jtat ámbanuway iDiosat, mit tʉncupʉcp nu'pʉjʉn jeme tsʉ̱napay ja'yic Moisés ileyni'c mit profetajat ilibruni'jcat. 15Tʉncupʉcp as̈am je'jat iguicupʉjca, ni'c Dios i-acjutucta̱jcʉs̈áj o'guijcatway, oyjayajwat mit maljayajwatey. 16Mit jemni'c tʉngawamp tʉtsʉ̱nawa'n culpa̱tic mam igui-e'p Dios, mit we'ney mam igui-e'pca jayajwat.
17’Mit may s̈iwijtat tʉyo'y jaynʉ'jcopacni'jcat, mit cʉs̈ tʉnʉcs̈ pa tʉntʉcmayna̱s̈ pa tʉs̈yacwa'n limosna mit ofrenda. 18Mit una̱c judíujat Asiajatway tʉs̈pa̱tcau templuni'c, mit wejpu'n tʉniprepara̱jtʉu as̈am iguinʉm Moisés iley. Tʉgayo'yu mit may jayajwat ne mit tsuguinwatpajyat. 19Ayé jayajwat itp ti imingawa'n yam pa tʉs̈acusa̱tcáj te tʉnwatcʉs̈au tanti. 20Tegaje', ma nʉmga ayʉ̱jat jeme tsʉ̱ngapay yam te tʉnwatcʉs̈au mal cuandu tʉtsʉ̱́naj iyos̈tujugujmat. 21Dejuru tʉs̈acusa̱tcap ni'c cuandu tʉtsʉ̱́naj mam je'jat tʉnmucotscʉs̈ mʉgʉc, tʉnyʉm: “Ʉ̱ is̈juzga̱tcap jinap ni'c tʉncupʉcp ni'c jutucta̱jcáj á̱nimajat. We'n iguinʉjm Pablo.”
22Iguimarajw we'n Félix, mit como ijawip nat icupʉjca Jesús ijayajwat, iyajcʉs̈au pa jatu'mbac, inʉmgʉs̈au ayé judíujat:
—Imi'nwa'n ayé mʉjcapitán Lisias, wejpu'n tʉs̈-arregla̱twa'n in-asuntujat.
23Mit imanda̱t tu'c capitán ma guarda̱t Pablo, po ma iguimo'ac s̈ʉ̱n libertad, ma mo' laj i-amigujat ma iguitʉcyo'ygac, mit ma iguimajyigac.
24Iguinás̈caj una̱c s̈ʉjwat, coygau Félix mit ito's̈ay Drusila, mit je' judía. Mit cʉs̈ i-acmin Pablo ma iguinʉjmac nat iguicupʉjcawa'n Jesucristu. 25Mit Pablo inʉmgʉs̈au ni'c jayajwat itp ti iguiwatcawa'n oy, mit magawatcada̱jca neti, mit inʉmgʉs̈au ni'c mi'náj tu'c tiempu cuandu Dios ijuzga̱twa'n. Mit ni-apʉ̱tijyʉu Félix, mit inʉjmau:
—Jinap nʉs̈, cuandu tʉs̈aguepwa'n tiempu, tʉya̱s̈patu.
26Félix i-atsʉ̱napate te Pablo iguimo'áj tumi̱n pa igui-acjo'nwa'n. Jemni'c iguiya̱s̈í̱jc pa iguimu-ampiwa'n. 27Icʉs̈ mechc s̈iwit, Félix pichinuw de gobernador, mit tʉgʉy tu'c nam gobernador inʉ'jyway Porcio Festo. Mit como Félix iwan itanwa'n oy mit judíujat, iyac Pablo ma tan presu.
Currently Selected:
Hechos 24: PSNT
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
