Hechos 14
14
Pablo mit Bernabé en Iconio
1Mit cuandu itsʉ̱́ngaj Iconio, Pablo mit Bernabé tʉgʉygau tuwitic mam judíujat i-adora̱tca, mit imucotscau oymanac hasta iguicupʉ́jcaj Jesús may judíujat, mit we'ney jeme caje'jatway judíujat. 2Po judíujat jeme cacupʉjcaway i-acochigau jeme caje'jatway judíujat, mit i-ac-awa'nigau contra ayé hermanujat. 3Po majawe'naj jego'c itángaj jem, mit capʉ̱tcawu iguinʉmdacyo'yga el Señor ipalabra, mit inʉmgau ni'c Dios nas̈moygap favor mit el Señor i-actujawigʉs̈ ni'c iyacs̈ta'cway ayé, mit imoygʉs̈ poder ma watca milagrujat mit ma acnigu-épigʉjʉ ayé jayajwat. 4Po ayé nʉ'jcopac jayajwat catsʉ̱́ngawu en acuerdu. Una̱c imunipʉjcʉjʉu judíujat, mit una̱c imunipʉjcʉjʉu ayé apóstojlat. 5Mit cʉs̈ judíujat mit jeme caje'jatway judíujat ni-apʉcmujcʉjʉu mit autoridajat, mit iwatcau tu'c acuerdu pa igui-apes̈ta̱jcawa'n ayé hermanujat, mit pa iguipojcajawa'n mit tsa'. 6Po Pablo mit Bernabé iguijáwigaj we'n, po'jcau pa Listra mit Derbe, ayé nʉ'jcopajcat tsʉ̱ngau Licaoniajway na̱s̈. Mit nu'pʉjʉn ayé laj ituyo'ygau. 7Mit inʉmdacyo'ygajau jem Jesús i-oyway noticia.
Pablo iguipojniguitaugau Listrajwayna'jat
8Mit tu'c jayau Listrajway ca-oyawu iyo'y ni'c ca-ijtʉwu maj ita'n. Ayé jayau tsʉ̱nau jem ni'c je' cu̱s̈u desde ima̱m iguita̱c, mit nunca caniyo'yp. 9Ayé jayau imarau icojts Pablo, mit Pablo icu-e'pca̱t ayé jayau, mit i-is̈ ni'c ayé cu̱s̈uwáy cupʉcp pa i-oytanwa'n. 10Mit cʉs̈ Pablo imucots mʉgʉc:
—Nitendá̱jcʉ.
Mit iguimojy tu'c tsut, chu̱chiu yo'ypay ayé cu̱s̈u. 11Wejpu'n ayé jayajwat, igui-ís̈caj lo que iwatway Pablo, cotsta̱jcau mʉgʉc, inʉmgau Licaonia-auni'c:
—Ayʉ̱́j jayajwat diosat mit manajcau mam ʉjtsat natsʉ̱nga. We'n iguipensa̱tca.
12Mit inʉmgapayta ni'c Bernabé ayé dios Júpiter, mit Pablo ayé dios Mercurio, ni'c je' ayé más cotsway. 13Mit Júpiter ipa̱nij ijtʉu itemplu tʉgʉyda'gʉj de ayé nʉ'jcopac. Je' imumin tu̱rujat mit i-apʉcmuc pijic. Ayé pa̱nij mit nʉ'jcopac jayajwat iwangau igui-ago'jcajawa'n ayé tu̱rujat ni'c i-adora̱tcájate Pablo mit Bernabé.
14Iguimáraugaj ayé apóstojlat Bernabé mit Pablo ni'c we'n iguiwatcajáj, i-acna̱tcau ijamujcat ni'c ayé jayajwat itucotscau Dios, mit nʉs̈cau jaran mam jayaujuc itsʉ̱nga, mit ya̱s̈cau mʉgʉc, 15inʉmgau:
—Jayajwat, ¿tini'c is̈watca we'n? ʉ̱jtsat tʉjayajwatey as̈am mijchat, mit tʉmumingajau tu'c oyway noticia pi cuyaguiga ayʉ̱́j cosa ca-ojyatway mit cupʉjca Dios jeme tsʉ̱námpay pa siempre, ni'c je' iwat tsajp, na̱s̈, lama̱t mit nu'pʉjʉn itpay jem. 16Mit ampay tiempu Dios imoygʉs̈ laj nu'pʉjʉn jayajwat ma yo'yga natu iguiwángaj, 17po majawe'naj i-actujawigʉs̈ ni'c je' Dios, ni'c iwatp oy, nas̈acmingajap tu̱ mit may cosechajat, nas̈moygap ti nacaygámpay mit nas̈acji'jcajap najo̱jtat. We'n iguinʉjm Pablo.
18Po majawe'naj, majo'c igui-atújcaj ayé jayajwat, ni'c iwangau igui-adora̱tcawa'n Pablo mit Bernabé, jemni'c i-ago'jcajájate aníma̱jtat.
19Mit wejpu'n coygau mam je'jat judíujat Antioquíajway mit Iconiojway, mit i-acochigau jayajwat, mit ipojniguitaugau Pablo mit tsa', mit iquebejpichingau Pablo hasta nʉ'jcopac-auni'c, ni'c inʉmgapayta ni'c o'guiganu. 20Po cupʉcpajyat i-apitucje̱jcau Pablo, mit je' ca's̈ʉ'c, mit tʉgʉyatu nʉ'jcopacni'c. Icus̈ʉwij jatu'c s̈ʉjw, pichin mit Bernabé pa nʉ'jcopac Derbe.
21Mit inʉmdacyo'ygajau Jesús i-oyway noticia en ayé nʉ'jcopac, mit i-actugupʉjcau may jayajwat. Mit cʉs̈ pitujcau pa ayé nʉ'jcopajcat Listra, Iconio mit Antioquía, 22mit i-anima̱tcʉs̈ jem ayé cupʉcpajyat, mit itsawigau ma siguia̱tca iguicupʉjcawa'n Jesús, mit inʉmgajau ni'c itp ti nas̈tunas̈cawa'n may antes natʉgʉygawa'n mam imanda̱t Dios. 23Mit icupiugau jayajwat jeme más cumplia̱tcapay pa ma majyiga en cada templu mam itsʉ̱nga cupʉcpajyat. Mit cʉs̈ ora̱tcau mit ayuna̱tcau, mit iyajcau el Señor Dios icʉ'jugum ma cuida̱tcʉs̈ ayé cupʉcpajyat.
Pablo mit Bernabé pitujcap pa Antioquía
24Inás̈caj Pisidiajway na̱s̈, coygau Panfiliajway na̱s̈. 25Mit inʉmdacyo'ygau Dios ipalabra nʉ'jcopac Perge, mit cʉs̈ nʉs̈cau pa nʉ'jcopac Atalia. 26Mit de jem nʉs̈cau barcuni'c pa nʉ'jcopac Antioquía. Mit en ayé nʉ'jcopac primeru iyo'tcajau Dios ma moygʉs̈ favor Pablo mit Bernabé. Mit jinap cʉs̈way iguiwatca ayé yos̈ lo que Dios iguimoygaway. 27Icóygaj jem, ni-apʉcmujcʉjʉu cupʉcpajyat, mit i-ampiugajau nu'pʉjʉn cosa majatway iwatway Dios mit je'jat, mit inʉmgajau ni'c Dios itsʉjcʉs̈au ijo̱jtat jeme caje'jatway judíujat ma iguicupʉjcac je'. 28Mit Pablo mit Bernabé jego'c itángaj jem mit ayé cupʉcpajyat.
Currently Selected:
Hechos 14: PSNT
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
