2 Corintios 4
4
1Dios tʉs̈yajcau pa tʉmuyos̈watca je' ni'c tʉs̈moygau favor. Jemni'c tʉgadesmaya̱tcap. 2Tʉngawatcap neti cuyu'tsic jeme tʉs̈acwinchu̱gagámpay mit tʉngawe̱tcap nepʉn ne tʉngatigatscajap Dios ipalabra, po tʉnyʉmgap lo que iyacs̈ta'cway, mit tʉnactujawigap nu'pʉjʉn jayajwat ni'c tʉyo'ygap oy mam Dios tʉs̈-e'pcap. 3Po te una̱c jayajwat iga-entendia̱tcap ayé oyway noticia tʉnyʉmdacyo'ygapay, solo iga-entendia̱tcap jeme togoygámpay, 4ni'c ayé ma̱lwayna' imanda̱tpay ayʉ̱́j mundu igamoygʉs̈p laj ma entendia̱tca jeme cacupʉjcapay, pa we'n ca-oyáj igui-e'pca ayé luz iyacpay ayé oyway noticia, mit ayé nas̈actujawigap ni'c Cristu mʉjninʉmic, mit Cristu nije'yu Dios. 5Ni'c tʉga-ajque's̈cajap pa ʉjtsat is̈cupʉjcáj, tʉ-ajque's̈cajap pi cupʉjca Jesucristu el Señor, mit tʉservia̱tcajap mijchat solo ni'c tʉnwangap Jesús. 6Ichu̱chij ayʉ̱́j mundu, Dios manda̱t ni'c luz ma ta'cs̈ta'c mam i-it chítimic, mit nije'yu Dios i-acta'cs̈ tu'c luz najo̱tni'jcat pa najawiga ni'c Dios mʉjninʉmic, mit ayé luz i-oymanagui na-e'pcap mam ita'cs̈ iwindugʉtni'c Jesucristu.
Naga-e'pcap Dios po nacupʉjcap
7Mit tʉnaguepcap ayé oyway noticia as̈am tu'c tumi̱njuc iyajcapay en tu'c s̈uy, mit ayé s̈uy as̈am nacuerpu ni'c ayé cʉs̈p. Tʉnyʉmp we'n pa nu'pʉjʉn jayajwat ma jawiga ni'c Dios ayé ijtʉpay nu'pʉjʉn maj mit ʉjtsat naga-aguepcap maj. 8Tʉntunas̈cap jʉmgapa'tu po siempre Dios tʉs̈libra̱tcap. Tʉs̈mingajap mayo'c cosajat po tʉgadesmaya̱tcap. 9Tʉs̈po'ctangap po tʉs̈cacuyaguigap Dios. Tʉs̈moyta̱jcap po ca-oyap tʉs̈ago'jcap. 10Tʉyo'ygap jʉmgapa'tu en peligru pa tʉ-o'jcawa'n as̈am Jesús i-o'jc, pa nu'pʉjʉn ma jawiga ni'c je' siempre tʉs̈libra̱tcap, ni'c je' jutucta̱c mit jinap ijtʉp vida. 11Ni'c ʉjtsat tʉnaguepcapay vida oyap tʉ-o'jca-ate may veces ni'c tʉnwangap Jesús, pa nu'pʉjʉn ma jawiga ni'c en ayʉ̱́j cuerpu o'gámpay tʉnaguepcap vida as̈amu Jesús i-ijtʉ vida. 12Ʉjtsat tʉtsʉ̱́ngap en peligru pa tʉ-o'jcawa'n po ʉjtsat tʉntunas̈cap pa mijchat pi aguepca vida.
13Inʉm tu'c jayau Dios ilibruni'c: “Tʉncupʉcp Dios, jemni'c tʉgapʉ̱tp tʉcotswa'n.” Ʉjtsat tʉncupʉjcapey as̈amu je', jemni'guey tʉgapʉ̱tcap tʉcotscawa'n. 14Najawigap ni'c Dios i-acjutucta̱c el Señor Jesús mit ʉjtsat nas̈acjutucta̱jcámpey ni'c namutʉgʉygau Jesús, mit je' nas̈munʉs̈cáj pa mam Dios itsʉ̱na. 15Ʉjtsat tʉntunas̈cap wename pa mijchat pi tsʉ̱nga oy, mit Dios entre más iguimoygʉs̈ favor may jayajwat, maséy iguinʉmgajáj Dios ni'ctiyu̱s̈ mit más imʉjninʉmgáj je'.
16Jemni'c tʉgadesmaya̱tcap, ni'c te nacuerpu más cuna'wayip mit cʉs̈pey imaj, majawe'naj cada s̈ʉjw Dios nas̈moygap maj najo̱tni'jcat. 17Ni'c jinapu nas̈tunas̈ca, ayé cajecp, mit pichináj oy pa ʉjtsat ni'c Dios nas̈-oyajcajap tu'c lugar más oymanac tsajpni'c jeme cacʉs̈ámpay. 18Nagawátca cuenta ayé cosajat na-e'pay yam na̱s̈ni'c, po más oy nawátca cuenta ayé naga-e'pay. Ni'c jeme na-e'pay, ayé cʉs̈áj, po jeme naga-e'pay ayé tanáj pa siempre.
Currently Selected:
2 Corintios 4: PSNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
