1 Juan 4
4
Jeme imuyo'ygapay Espíritu Santu
1Mijchat tʉwangʉs̈pay, te impʉctsougap tu'c jayau, proba̱jtʉ'jca te imuyo'yp Espíritu Santu, mit camtʉ'tscupʉ́jcayu jayajwat inʉmgapay ni'c Dios igui-ajyu'tcau, ni'c mayo'c we̱tpajyat ipíchinga en ayʉ̱́j mundu, mit inʉmgap ni'c cotscap pa Dios. 2Yename is̈-is̈capcawa'n imuyo'ygapay Espíritu Santu: Nu'pʉjʉn jayajwat inʉmgámpay ni'c Jesucristu jat jayau yam, aye'jat imuyo'ygap Espíritu Santu. 3Mit nu'pʉjʉn jayajwat inʉmgámpay ni'c Jesucristu cajátu jayau yam, aye'jat igamuyo'ygap Espíritu Santu. Je'jat inʉmgap we'n ni'c igui-ajyu'tcau Cristu imutsuguin. Mijchat inmaraugau ni'c itp ti imi'nwa'n Cristu imutsuguin mit jinap tsʉ̱nanup en ayʉ̱́j mundu.
4Mijchat tʉ-e'pcʉs̈p as̈am tʉ̱wajyat. Dios is̈je'játcau mijchat mit imvencia̱tcaway ayé we̱tpay jayajwat, ni'c Espíritu Santu inmuyo'ygapay más ijtʉp poder que ayé malwayna' imuyo'ygʉs̈pay maljayajwat tsʉ̱ngapay en ayʉ̱́j mundu. 5Ayé jayajwat solo ipensa̱tcap itpay en ayʉ̱́j mundu, mit jayajwat ayʉ̱́j mundujway imaraugap lo que inʉmgapay. 6Ʉjtsat Dios nas̈je'játcau. Jeme i-is̈capay Dios, nas̈maraugapey. Mit jeme caje'way Dios ijayau, nas̈camaraugap. Jemni'c nas̈-is̈cápca jayajwat imuyo'ygapay Espíritu Santu jeme inʉmpay iyacs̈ta'cway, mit na-is̈capcapey jeme imuyo'ygapay malwayna' jeme we̱tpay.
Dios nas̈wangap
7Mijchat tʉwangʉs̈pay, naniwángʉjʉ nanu'pʉjʉjnat, ni'c Dios nas̈acniwángʉjʉp. Pʉmba'tu jeme iwampay ihermanu, ayé Dios ijayau mit i-is̈cap Dios. 8Jeme igawampay ihermanu, iga-is̈cap Dios, ni'c Dios iwangʉs̈p nu'pʉjʉn jayajwat. 9Dios nas̈actujawigap ni'c nas̈wangap, ni'c je' i-ajyu't iway tu'gujyuway en ayʉ̱́j mundu pa nas̈moygáj vida cacʉs̈ámpay. 10Yename nas̈jawiga ni'c Dios nas̈wangap: ʉjtsat nagawangapate Dios, po como je' nas̈wangau ʉjtsat, i-ajyu't iway, mit je' o'c pa iguitso'cwa'n nu'pʉjʉn mal nawatcaway.
11Mijchat tʉwangʉs̈pay, te yename Dios nas̈wangap, naniwángʉjʉ-ey nanu'pʉjʉjnat. 12Nepʉn igani-e'p Dios. Po te naniwangʉjʉp nanu'pʉjʉjnat, najawigap ni'c Dios nas̈wangap iyacs̈ta'cway, mit je' tsʉ̱nap mit ʉjtsat. 13Najawigap ni'c natsʉ̱ngap mit Dios, mit je' tsʉ̱nap mit ʉjtsat, ni'c je' nas̈moygau Espíritu Santu. 14Tʉ-actujawigap ni'c Dios Nate̱jat i-ajyu't iway pa iguisalva̱twa'n jayajwat ayʉ̱́j mundujway. Mit je' tʉn-is̈cau. 15Pʉmba'tu jeme inʉmpay ni'c Jesús ayé Dios iway, Dios tsʉ̱nap mit je', mit je' tsʉ̱nap mit Dios.
16Ʉjtsat najawigap mit nacupʉjcap ni'c Dios nas̈wangap. Dios iwangʉs̈p nu'pʉjʉn jayajwat. Mit jeme iwampay ihermanujat tsʉ̱nap mit Dios, mit Dios tsʉ̱nap mit je'. 17Te naniwangʉjʉp iyacs̈ta'cway, nagapʉ̱tcáj en ayé s̈ʉjw cuandu Dios i-arregla̱twa'n, ni'c as̈am Jesucristu nas̈wangap, we'ney ʉjtsat naniwángʉjʉ en ayʉ̱́j mundu. 18Jeme iwampay Dios, capʉ̱tp. Ni'c jeme iwampay Dios iyacs̈ta'cway igapʉ̱táj neti. Po jeme pʉ̱támpay, itunas̈p ni'c igawamp Dios iyacs̈ta'cway.
19Ʉjtsat nawangap Dios ni'c je' nas̈wajnʉ'jcau. 20Po te tu'c jayau inʉmp ni'c iwamp Dios, mit i-amp ihermanu, ayé tu'c we̱tpay. Ni'c te igawamp ihermanu jeme i-e'pay, ¿natpaj iguiwa'nwa'n Dios jeme igani-e'pay? 21Mit je' nas̈moygau ayʉ̱́j mandamientu: ni'c jeme iwampay Dios ma wa'ney ihermanu.
Currently Selected:
1 Juan 4: PSNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
