Sekariah 7

Hay mipanggep hi maandong an pangat ya hay homok

1Handih mikap-at an algoh mikahiyam an bulan an Kisleb hi mikap-at an toon an nun-ap-apuwan Darius ya kimmalih APU DIOS ke ha-on. 2Handi ya intud-ak di iBethel da Sareser ke Regemmelek ya nadan tatagu dat eda ibagay baddang APU DIOS. 3Kinali da pay ke didan ibaga da nah padi ya profetas nah Templon APU DIOS di “Nganney aton mi, kon punnanongon min u-umyung ya muntopol an adi kami mangan ten nadatngan nan mikaliman bulan hi katootoon an panginomnoman mih nadadagan nan Templo?”

4,5Kanan APU DIOS an Kabaelanan am-in ke ha-on di “Kalyom hanadah tatagu tuh boble ya nadah papadi an man-ut nuntopol dan ugge nangan ya inu-umyung da nah mikalima ya mikapitun bulan hi katootoon handidah nala-un napitun toon an niha-adan dah udum an boble, mu bokon gapuh pundayaw dan ha-on. 6Ya hanah punhahamulan yuh piyesta yu, kon bokon gapuh pun-an-anlaan yu? Hay kakulugana ya adiyak nomnomon. 7Kon uggek kinali tuwali datuwe handidah profetas dih done handih kadangyan di Jerusalem ya napnuh tatagu takon nadan udum an bobled Judah, ya naboblayan di Negeb ya nadan puun di bilid ad Judah?”

8,9Indani ya kimmali boh APU DIOS ke ha-on an kananay “Kalyom hituwe: Ha-oy an APU DIOS an Kabaelanan am-in ya kanak di: Mahapul an maandong di pangipanu yuh kasu, munhinhohhomok kayu ya mun-uullayan kayu. 10Adiyu paligaton nadan nabalun binabai, nadan napuh-ig, nadan tatagun nalpuh udum an boblen nakiboblen dakayu ya nadan nawotwot. Ya adi kayu numanomnom hi panadag yuh ibbayu.

11Mu handida ken aammod yu ya nginohe da datuwen kinalik ke dida handi. 12Paddungnay impakulhi day ulu dat kay batu te adida mo hangudon an donglon di tuttuduk an intuttudun handidah profetas ku. Kinali bimmobboh-olak ke dida.

13Ot gapu te uggeda hinangud an dingngol di kinalik ya uggek damdama dingngol di dasal da. 14Ot kayak puwok an intayyap ku dida ot miwahit dan e numbobleh nidawwin boblen uggeda inila. Ya hituwen boble da ya numbalin hi adi maboblayan te natoan ot maid di nundalan weno nala-u. Ha-oy an APU DIOS an Kabaelanan am-in di nangalin datuwe.”

Currently Selected:

Sekariah 7: ifkWB

Highlight

Copy

Compare