Numbers 5

Hanadan tatagun mibilang an adi malini

1Kanan APU DIOS ke Moses di 2“Itugun mu nadah holag Israel an pakaanon dah kampu da nadan tatagun waday katatakut an dogon di bolat dan mit-an ya nadan tatagun waday malpuh adol da ya nadan adi mibilang an malini te dinapa da weno nidatum dah nate. 3Mun-ingngon maat hituweh linalaki ya binabai an pakaanon yu dida nah kampu yu te adik pinhod an adi malini tun boblen pakiboblayak ke dakayun tataguk.”

4Inun-unud nadan holag Israel di intugun APU DIOS ke Moses ot pakaanon da nah kampu da nadan mibilang an adi malini.

Hay molta gapuh adi maphod an inat di tagu

5Kanan bon APU DIOS ke Moses di 6“Itugun mu datuwe nadah holag Israel: Hanan tagu, lalaki weno babain adina un-unudon hi APU DIOS ta atonay adi maphod hi ibbanan tagu ya mumbahul. 7Mahapul an abulutonan numbahul ta bayadanay moltana nah tagun numbahulana ya udmanah duwampulun porsiento. 8Mu deket nate nan tagu ya maid di nih-up an iibanan pangidatan da nah bayad ya bagi mon APU DIOS hidiye, ta midat mo nadah papadi. Ya miunnud hituwen mibayad nah lakin kalneron maklong hi pangatan nan numbahul hi ine-en di punlini. 9Ya am-in di ialin nadan holag Israel an ibagin APU DIOS ya ibagin nan padin eda pangidatan. 10Ya am-in di midat nah padi ya ibagi na.”

Hay mipanggep nah lalakin mun-annil

11Datuwey kinalin APU DIOS ke Moses 12an ituguna nadah holag Israel: Deket e nanibo nan babai hi udum an lalaki 13ot ihuyop da, mu maid di tistigu te maid di nangakhup ke hiya 14ya deket mun-annil nan inayan diyen babai weno mun-olom di ohan lalaki takon di maid di inat di inayanah gaga-iho 15ya mahapul an ien nan lalaki nan inayana nah padi. Ya mahapul an umieh hingkilon alina, mu adina ha-adan hi mantekan di oliba weno bangbanglu te hidiye ya miappit hi punmahmahan di mun-annil an lalaki ta mainila hin numbahul nan inayana.

16Hanan padi ya ena pataddogon nan babaih hinangngab nan altar. 17Ne umalah danum nah pula an buhi ya umala boh luta nah dulung nan Tabernacle ta pungkammohona. 18Deket impresentan nan padi nan babai ke APU DIOS, ibukanay buuk diyen babai ne iha-ad na nan niappit an alinan in-appit nan lalakin mun-annil nah taklen diyen babai ta mainila hin makulug nan humlun an pun-annilan nan lalaki. Hanan padi ya tumaddog hi hinangngab nan babai ya odnanah diyen pula an buhi an niha-adan nan mumpait an danum an mangidut hi nabahulan. 19Punsapataon nan padi nan babai ya kalyonan hiyay “Deket uggeka nakihuyop hi udum an lalaki ya maid di inat muh malalaon humlun hi eka mibilang an adi malini ya adi maat ke he-a tun idut. 20Mu deket nakihuyop kah udum an lalaki ya 21,22hana ot ta hituwen danum an umeh putum an umidut ya pumbalinon dakan adi pakaimbabale ta tibon di tatagun maat ke he-ay idut APU DIOS ta mapihul ka.” Ne humangon nan babaih diyen kananay “Abulutok hinaen maat.”

23Itudok nan padih tuwen idut nah lalat, ne ahina bo inula nan nitudok nah mumpait an danum nah buhi. 24Ta ipainum nah babaih diyen danum an umidut ta munholholtap hin numbahul. 25Ne alan bon nan padi nan inodnan nan babain alinan niappit gapuh annil ta itagge nan ipresentana ke APU DIOS ta ahina ie nah altar. 26Ne gumamal nan padi kediyen alinat gobhonah di. Ne impainum na bo nah babai nan danum. 27Deket nakihuyop nan babaih udum an lalaki ya holholtapona nan namahig an ligat an idat nan naidutan an danum ya mumbalin an adi pakaimbabale. Hay ngadana ya mumbalin an gaga-ihon kalin usalon di tatagu.

28Mu deket uggena inat di athidi ya mahlag te adi maat ke hiya nan idut.

29Hinaey tugun mipanggep hi annil. Deket nakihuyop nan babaih udum an lalaki, 30weno mun-olom nan lalakin hay punnomnom na ya waday udum an lalakin nan inayana ya ie nat pataddogon nan padih hinangngab APU DIOS ta atonah tuwen tugun kediyen babai. 31Mibilang an maid di bahul nan lalaki, mu nan babai ya holtaponay kastiguna hin numbahul.

Currently Selected:

Numbers 5: ifkWB

Highlight

Copy