GENESE 1
1
Gau ibounai karaia sivaraina
1Matamaia neganai Dirava ese guba bona tanobada ia karaia. 2Tanobada be toana lasi bona anina lasi, bona dibura ese davara badana ia koua. Vadaeni Dirava ena Lauma be davara ena kopina latanai ia marere noho.
3Dirava ia gwau, “Diari ia vara namo.” Vadaeni, diari be ia vara. 4Dirava ese diari ia itaia, ia namo vadaeni, bona Dirava ese diari bona dibura ia hapararaia. 5Dirava ese diari ena ladana ia atoa Dina, bona dibura ena ladana ia atoa Hanuaboi. Adorahi ia ore, bona daba ia mai, be dina namba 1.
6Ma Dirava ia gwau, “Gau ta ese davara badana ena ataiai do ia noho, henunai ranu bona ataiai ranu be gabu rua do idia noho totona.” 7Bona Dirava ese gau ta ia karaia, henunai ia noho ranu bona ataiai ia noho ranu ia hapararaia totona. Vadaeni unai bamona ia vara. 8Dirava ese unai gau ena ladana ia atoa Guba. Adorahi ia ore, bona daba ia mai, be dina namba 2.
9Ma Dirava ia gwau, “Guba henunai ia noho ranu be gabu tamona dekenai ia haboua be namo, bona tano kaukau do ia hedinarai.” Vadaeni unai bamona ia vara. 10Dirava ese tano kaukau ena ladana ia atoa Tanobada, bona ia haboua gabu tamona ranu edia ladana ia atoa, Davara. Bona Dirava ese ia itaia, ia be namo vadaeni. 11Ma Dirava ia gwau, “Tanobada dekenai rei ia vara be namo, bona ava idauidau mai edia uhe, bona anina idia atoa audia, edia huahua be mai uhe, ta ta edia orea, edia orea hegeregerena, tanobada ena latanai.” Vadaeni unai bamona ia vara. 12Rei ia vara tanobada ena latanai, bona ava idauidau mai edia uhe edia orea hegeregerena, bona anina idia atoa audia, edia huahua be mai uhe, edia orea hegeregerena. Bona Dirava ese ia karaia gaudia ia itaia, be idia namo vadaeni. 13Adorahi ia ore, bona daba ia mai, be dina namba 3.
14Ma Dirava ia gwau, “Diari do idia vara guba dekenai namo, dina bona hanuaboi do idia hapararaia totona. Bona do idia be toa, lahara bona laurabada ena toana, dina bona lagani edia toana. 15Guba dekenai do idia diari be namo, tanobada do idia hadiaria totona.” Vadaeni, inai bamona ia vara. 16Bona Dirava ese diari badadia rua ia karaia, badana be dina do ia biagua, bona maragina be hanuaboi do ia naria. Hisiu danu ia karaia. 17Dirava ese guba lalonai ia atodia, tanobada do idia hadiaria totona, 18dina bona hanuaboi do idia biagua, bona diari bona dibura do idia hapararaia totona. Bona Dirava ese ia karaia gaudia ia itaia, be idia namo vadaeni. 19Adorahi ia ore, bona daba ia mai, be dina namba 4.
20Ma Dirava ia gwau, “Davara ese mauri gaudia momo do idia havaraia namo, bona manu be tanobada ena ataiai kahana, guba ena henuna dekenai do idia roho.” 21Vadaeni, Dirava ese davara dekenai idia mauri gau badadia ia karaia, bona mauri gaudia ibounai ranu lalonai idia marere gaudia, ta ta edia orea, edia orea hegeregerena, ia karaia. Bona ataiai manudia ibounai danu, ta ta edia orea, edia orea hegeregerena. Bona Dirava ese ia karaia gaudia ia itaia, be idia namo vadaeni. 22Bona Dirava ia hanamodia, ia gwau, “Emui bese umui havaraia, do umui momo herea, davara ibounai do idia honu momokani, manu danu do idia vara rohoroho tanobada ena latanai.” 23Adorahi ia ore, bona daba ia mai, be dina namba 5.
24Ma Dirava ia gwau, “Tanobada ese mauri gaudia do ia havaraia namo, ta ta edia orea, edia orea hegeregerena, boromakau, bona tano dekenai idia rau gaudia, bona tanobada boroma idauidau, ta ta edia orea, edia orea hegeregerena.” Vadaeni unai bamona ia vara. 25Dirava ese tanobada ena boroma bona dagedage gaudia idauidau ia karaia, ta ta edia orea, edia orea hegeregerena, bona boromakau, bona ubua gaudia, ta ta edia orea, edia orea hegeregerena, bona tanobada dekenai idia rau gaudia ibounai, ta ta edia orea, edia orea hegeregerena. Dirava ese ia karaia gaudia ia itaia, be idia namo vadaeni.
26Bona Dirava ma ia gwau, “Taunimanima ita karaia namo, iseda toana bona iseda laulau hegeregerena. Davara gwarume bona ataiai manudia bona boromakau, bona tano dekenai idia rau gaudia ibounai, ia ese do ia biagua.” 27Vadaeni Dirava ese taunimanima ia karaia, ia sibona ena laulau bamona, Dirava ena toana hegeregerena ia karaia. Tau bona hahine ia karaia.
28Bona Dirava ese ia hanamodia, idia dekenai ia gwau, “Emui bese do umui havaraia, do umui momo herea. Tanobada ena gabu ibounai dekenai do umui noho, bona unai tano do umui biagua. Davara ena gwarume bona ataiai manudia, bona mauri gaudia, tanobada dekenai idia marere gaudia ibounai do umui biagua.” 29Ma Dirava ia gwau, “Umui itaia, tanobada ibounai edia latanai uhe idia atoa ava ibounai, bona huahua idia atoa au ibounai, umui dekenai lau henia vadaeni, inai be emui aniani. 30To tanobada ena boroma idauidau ibounai, bona ataiai manudia ibounai, bona tanobada dekenai idia rau mauri gaudia ibounai dekenai, ava ena rauraudia lau henia vadaeni. Inai be edia aniani.” Vadaeni unai bamona ia vara.
31Bona Dirava ese ia karaia vadaeni gaudia ibounai ia itaia, bona momokani idia be namo herea. Adorahi ia ore, bona daba ia mai, be dina namba 6.
Currently Selected:
GENESE 1: HMOTU93
Highlight
Share
Copy
Want to have your highlights saved across all your devices? Sign up or sign in