Соломона хамгин сән дун 2
2
[Күүкн:]
1– Би Шарона#2:1 Шарон – Израилин орн-нутгин барун бийд бәәх тегш һазр. һазрин цецгв,
Би тиньгр һазрин лилия.
[Көвүн:]
2– Хатханчг дунд лилия цецг мет –
хәәртә иньгм күүкд дунд.
[Күүкн:]
3– Ода седклим авлсн көвүм
Ө-шуһу модд дунд –
Ор һанцхн альмна моднла әдл,
Олн көвүд дунд тиим;
Терүнә сүүдрт суухдан дуртав,
Терүнә темсн әмтәхн амтта.
[Күүкн:]
4– Намаг тер бийләһән авв,
Намаг тер чаһрар тоодг герт орулв,
Дурна туган деерм өргв.
5Намаг уста үзмәр тоотн,
Нанд альм өгәд сергәтн:
Намаг дурн авлҗана!
6Терүнә зүн һарнь –
мини толһа дор бәәтхә.
Терүнә барун һарнь –
минь ода намаг тевртхә!
7Ерусалимин күүкд, тадниг
Йир эрҗ сурҗанав,
Зерлг буһ өңгтә адусар,
Зүстә сәәхн адусар андһар өгтн:
Дуриг бичә серүлтн.
Дурн эврән эс сертл
Дуудад бичә бәәтн!
Хойрдгч дун
[Күүкн:]
8– Эннь седклим авлсн иньгм!
Энүг би соңсчанав: өөрхнд йовна,
Давшад уулмудар һәрәдҗ йовна,
Довуд деерәһәр довтлҗ йовна.
9Седклим авлсн иньгм – зерлг буһ мет,
Гөрәснә бәәдлтә хурһн мет.
Тер ода мана эрс һатц зогсҗана,
Терзәр маниг хәләҗәнә,
Терзин хааһул һатц хәләҗәнә.
10Седклим авлсн иньгм нанд келв:
«Бос, эңкр күүкм,
Берк сәәхләм, һарад ир!
11Үзҗәнч? Үвл ода давв,
Үүлнәс хур орҗахш, давв.
12Делкәд цецгүд урһҗана,
Дуулх цаг ирвә,
Делкәд көглҗрһнә дун соңсгдҗана.
13Цаачнь инҗр темсн болҗана,
Цецгәлҗәх уста үзмин ацин үнр каңкнҗана.
Бос, эңкр күүкм,
Берк сәәхләм, һарад ир!
14Уулын хад дотр,
Уулын белчрәр бултсн көглҗрһм,
Чамаг үзх зөв нанд өгич!
Чини ду соңсх арһ нанд өгич!
Чини дун җөөлн,
Чини бәәдл авта».
15Аратын кичгүд бәртн,
Бичкн кичгүд бәртн!
Тедн үзмин тәрә үрәнә,
Болв мана үзмин тәрән цецгәлҗәнә!
16Седклим авлсн иньг – мини,
би – терүнәв.
Лилия цецгүд дунд тер бәәнә.
17Өдр экләд уга бәәтл,
Өр цәәһәд уга бәәтл,
Уулмуд дотраһар,
довуд дотраһар
Уйн буһ мет,
Гөрәснә бәәдлтә хурһн мет
Гү хәрү, седклим авлсн иньгм!
Currently Selected:
Соломона хамгин сән дун 2: ХКО_ӘБ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
