Әмтнә то авлһн 4
4
Кахатын хөөт үйнр
1Деед Эзн Мошед болн Ахаронд келв:
2– Левитмүд дунд Кахатын хөөт үйнриг уңг-тохмарнь болн өрк-бүл болһнарнь бүрткҗ бичҗ автн. 3Харһлтын Шатрт көдлмш кеҗ чадх күн болһниг 30 настаһаснь авн 50 наста күртлнь тоод орултн. 4Кахатын хөөт үйнр Харһлтын Шатрт, хамгин әрүн бәәрнд, әрүн юмсиг харҗ хәләх даалһврта.
5Кемр хаалһд һарад йовҗахларн, Ахарон көвүдтәһән Харһлтын Шатрт орад халхлх көшгиг суһлҗ авад Бооцана хәәрцг бүркх йоста. 6Деерәснь терүг нимглсн арсн бүркәһәр бүркх, терүн деерәснь көк өңгтә бүркә делгәд, ут модд орулад тәвх кергтә.
7Әрүн өдмг тәвдг ширә деер көк бүркә бүркәслтхә, терүн деернь тәрлкс, шанһс, шалдрң юм кехин төлә ааһс болн буһшс тәвтхә, таслврт уга бәрц бәрдг өдмг ширә деер оньдин бәәх йоста. 8Цуг эднә деерәснь улавр күрң бүркә делгтхә, деерәснь нимглсн арсн бүркәһәр бүркәд ут модд орулад тәвтхә.
9Тедн герлин гегәг көк бүркәһәр бүркх йоста, дәкәд герлин гегәнә цөгцс, чимкүрмүд, күҗ шаталһна савмуд болн герлин гегәнә тос кедг савмуд бас көк бүркәһәр бүркх зөвтә. 10Дарунь герлин гегәг болн терүнд кергтә тоотынь нимглсн арсн бүркәһәр бүркәд дамҗур деер тәвтхә.
11Күҗ уңһдадг алтн ширә деер көк бүркә делгтхә, деерәснь нимглсн арсн бүркәһәр хааһад ут модд орулад тәвтхә. 12Мөрглһнә керг күцәҗәх цагт кергтә тоотыг авад көк бүркәд оратха, деерәснь нимглсн арсн бүркәһәр хаатха. Тедниг цугтаһинь дамҗур деер тәвтхә.
13Тәкл тәкдг ормиг үмснәс цеврләд деернь чисм улан бүркә тәвтхә. 14Терүн деернь тәклд кергтә тоотынь тәвтхә: һалта үмс һарһдг совг, мах бәрдг серә, күрзс, цус кедг савмуд. Тедниг цугтаһинь нимглсн арсн бүркәһәр бүркәд ут модд орулад тәвтхә.
15Кемр хаалһд һарад йовхларн, түрүләд Ахарон болн терүнә көвүд әрүн юмсиг болн әрүн ааһ-савиг цугтаһинь хааһад бүрктхә. Тегәд дарунь Кахатын хөөт үйнр өөрдәд тер ацаг авч чадҗана. Кахатын хөөт үйнр әрүн юмсиг көндәшго болҗана, эс гиҗ тедн үкҗ одх. Харһлтын Шатрин эн юмсиг Кахатын хөөт үйнр авч йовх даалһврта.
16Ахарон гелңгин көвүн Элеазар герлин гегәнә тосиг, күҗ шаталһиг, таслвр угаһар өдмгин бәрциг, түрклһнә тосиг хәләх дааврта. Элеазар өргә гериг болн дотрнь бәәх юмсиг цугтаһинь хәләх дааврта. Тер тоод әрүн эд-тавр болн әрүн ааһ-савмудыг хәләхмн.
17Деед Эзн Мошед болн Ахаронд келнә:
18– Кахатын хөөт үйнрин уңг-тохмснь үкҗ одхас болн левитмүдин отгас хусгдад уга кегдхәс саглҗ хәләтн. 19Тедн әмд үлддгәр, хамгин әрүн бәәрн тал өөрдснәс үкдгоһар, Ахарон болн терүнә көвүд бийснь ирәд Кахатын хөөт үй болһнд терүнә ацаһинь өгх йоста. 20Кахатын хөөт үйнр әрүн юмс тал өөрдшго болҗана, нам нүднәннь булңгар үзшго терүг, эс гиҗ үкҗ одх.
Гершона хөөт үйнр
21Деед Эзн Мошед келв:
22– Гершона хөөт үйнриг өрк-бүл болһарнь болн уңг-тохмарнь бүрткҗ бичҗ ав. 23Һучн настаһас авн 50 наста күртлнь Харһлтын Шатрт мөргүл кеҗ чадхинь болн көдлҗ чадхинь цугтаһинь бүрткҗ бичҗ ав. 24Гершона уңг-тохмин хөөт үйнрин кех көдлмш болн зөөх ацан эн: 25тедн өргә герин некмр эд, Харһлтын Шатр, терүнә бүркә болн нимглсн арсар кегдсн деерк бүркә, Шатрт ордг үүднә көшг, 26хашан көшг, хашан тал дунд бәәх өргә гер болн тәклин орм хаадг үүднә көшг, теднә деесд болн көдлмш кехлә цуг кергтә тоот зер-зевс хәләх йоста. Тедн цуг кергтә тоот көдлмшиг кетхә. 27Гершона хөөт үйнр Ахарона болн терүнә көвүдин заасар көдлмш кех болн аца зөөх. Тадн эн ацаг теднд даалһтн, тедн иим даалһврта болх. 28Харһлтын Шатрт Гершона уңг-тохмин хөөт үйнрт тиим көдлмш даалһгдҗана. Теднә һардачнь Итамар – Ахарон гелңгин көвүн.
Мерарин хөөт үйнр
29Мерарин хөөт үйнрин уңг-тохм болһинь, өрк-бүл болһинь бичҗ ав. 30Һучн настаһас авн 50 наста күртл цугтаһинь бичҗ ав. Харһлтын Шатрт керг күцәх болн көдлмш кеҗ чадх әмтиг цугтаһинь тоод орулад бич. 31Харһлтын Шатрт иим юм тедн дааҗ кех: өргә герин тулг бахнс, көндлң модд, бахнс болн түшгүд, 32өргә герин һазак түшгтә бахнс, бичкн һастаһинь болн деестәһинь, дәкәд болхла талдан шишлң кергтә юмсиг цугтаһинь хәләҗ даах. Тиигчкәд кех көдлмшиг цугтаһинь кетхә. Теднд эн кергиг тадн даалһҗанат, тедн күцәх йоста. 33Мерарин уңг-тохмин хөөт үйнрин кех көдлмш иим. Ахарон гелңгин көвүн Итамарин һардврт Харһлтын Шатрт күцәх көдлмш иим болҗана.
Левитмүдин өрк-бүлин болн уңг-тохмин то бичҗ авлһн
34Моше, Ахарон болн хамцана һардачнр Кахатын хөөт үйнриг уңг-тохмин болн өрк-бүлин тооһарнь бичҗ авцхав. 35Теднь 30 настаһас авн 50 наста күртл Харһлтын Шатрт керг күцәх, көдлмш кеҗ чадхнь тоолгдад бичҗ авгдв. 36Уңг-тохмарн тедн 2 750 күн болв. 37Кахатын уңг-тохмин хөөт үйнрин бичлһнд орсн тонь иим болв. Тедн Харһлтын Шатрт көдлх йоста. Моше Ахарон хойр тедниг Мошеһәр дамҗад Деед Эзнә заасар тоолад бас бичҗ авв.
38Гершона хөөт үйнр уңг-тохмарн болн өрк-бүләрн 3930 настаһасн авн 50 наста күртл – Харһлтын Шатрт керг күцәх болн көдлмш кеҗ чадхнь – 40уңг-тохмарн болн өрк-бүләрн 2 630 күн болв. 41Гершона уңг-тохмин хөөт үйнр тооһарн тиим болв. Тедн Харһлтын Шатрт көдлх йоста. Моше Ахарон хойр тедниг Деед Эзнә заасар бичҗ авцхав.
42Мерарин уңг-тохмин хөөт үйнринь болн өрк-бүлинь бичгдҗ авсн тооһарн – 4330 настаһас авн 50 наста күртл – Харһлтын Шатрт керг күцәҗ чадх болн көдлмш кеҗ чадхнь 443 200 күн болв. 45Мерарин уңг-тохмин хөөт үйнрин тонь тиим болв. Моше Ахарон хойр тедниг Деед Эзн Мошед заасар бичҗ авцхав.
46Левитмүдиг цугтаһинь уңг-тохмарнь болн өрк-бүләрнь тоолад Мошен, Ахарона болн Израилин һардачнрин бичҗ авснь – 4730 настаһас авн 50 наста күртл – Харһлтын Шатрт керг күцәһәд, көдлмш кеһәд, аца зөөҗ чадхнь – 48ут тоодан 8 580 күн болв. 49Деед Эзнә заасар тедн Мошен тоолсар бичҗ авгдв. Күн болһнд кех көдлмш болн зөөх ацань йилһҗ өггдв. Деед Эзн Мошед күцәтхә гиһәд заагдсар цугнь кегдв.
Currently Selected:
Әмтнә то авлһн 4: ХКО_ӘБ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
