Әмтнә то авлһн 11
11
Израилин әмтнә шууган
1Олн-әмтн шуугад һундлан келнә, Деед Эзн энүгинь соңсна. Соңссна хөөн Терүнә ур күрнә. Тегәд Деед Эзнә һал шатв, бәәрнә хол әңгнь шатв. 2Олн-әмтн Мошег дуудна, Моше Деед Эзнд мөргнә, тиигхлә һал унтрна. 3Тер ормд Тавера#11:3 Тавера – еврей келәр «һал шатлһн» гисн чинртә. гидг нер өгнә. Яһад гихлә тенд тедн дунд Деед Эзнә һал шатв.
4Израилин әмтнлә ниилсн зүсн-зүүл отга әмтн эврә онц заңта бәәҗ. Теднә ардас Израилин улс бас уульдг болцхав.
– Мах ода идсн болхнь! – гиҗ тедн келцхәв. 5– Маднд Египетд өңгәр заһс, хаяр, һу, ноһан мәңгрс, цуунгла әдл мәңгрс болн сермсг өгдгиг бидн саннавидн! 6Энд мел юмн уга, һанцхн манна хот иднәвидн. Терүнәс мадна седкл зовна.
7Манна болхла, кориандрин экнә бәәдлтә, өңгәрн хагсу каңкнсн салмин бәәдлтә билә. 8Әмтн йовад манна хотыг цуглулад теермин чолунд теермдәд эс гиҗ үүлүр үүлдг. Дәкәд буһшд чанад эс гиҗ терүгәр һуйр болһдг бәәҗ. Тер һуйр амтарн олив тоснд болһсна бәәдлтә. 9Сөөһәр бәәрнд чиг буухла, терүнлә хамдан манна ундг билә.
10Моше олн-әмтнә уульҗахиг соңсна. Өрк-бүл болһн эврәннь шатрин үүднд уульҗана. Деед Эзнә ур босад, Мошед йир гейүртә болв. 11Тегәд Моше Деед Эзнд келнә:
– Яһад Та намаг, эврәннь мухлаг, зоваҗанат? Юуһарн би Танд эс таасгдҗанав? Яһад Та эн әмтиг намаг килмҗән өгч хәләтхә гиҗәнәт? 12Би эн әмтнд үр тогтави, би эдниг һарһви? Эн әмтиг бичкдүдлә әдләр, хәләдг күүкд күн кевтә, һар деерән авч йовтха гиҗ заклат (Та теднә өвкнрт андһар өгсн һазрт күргх боллат). 13Эн олн-әмтнә төлә би альдас мах авхмб? Тедн мах идхәр ууляд намаг ээрчәнә. 14Би һанцарн теднд килмҗән өгч чадҗахшув. Нанд дегд күнд болҗана. 15Кемр Та цаарандан чигн намаг тиигҗ бәрхәр седҗәхлә, тиигхлә буйн болтха, тиим зовлң дәкҗ үздгоһар алтн намаг!
Далн медәт Мошед дөң болна
16Деед Эзн Мошед келнә:
– Израилин 70 медәтиг нан тал дууд. Тедниг – медәтнриг болн ахлачнриг – чи таньдг болхич. Харһлтын Шатр тал тедниг авч ир. Чамла хамдан тедн Харһлтын Шатрин өмн зогстха. 17Би бууһад тенд чамла күүндхүв. Чини деер бәәҗәх Сәкүснәс Би авад теднд өгнәв. Тедн чамла хамдан әмтнә тускар өгчәх чини килмҗиг хувалцтха. Тегәд чи һанцарн тер күнд ацаг даашгоч. 18Олн-әмтнд болхла кел: «Бийән әрүслтн, маңһдурк мах идх өдрт белн болтн. Деед Эзнә өмн тадн уульҗаввт, мах идхәр седҗәнәвидн, Египетд таднд сән билә гиһәд келҗәввт. Тегәд Деед Эзн таднд мах өгх! Тадн цадтлан идхит! 19Махиг тадн 1 өдр биш, 2 өдр биш, 5 өдр биш, 10 өдр биш, 20 өдр чигн биш идхит, 20бүкл сардан – хамрарн эс һартл идхит, җигштлән идхит! Тадн дунд бәәх Деед Эзиг бурушаснд тиим болх. Терүнә өмн ууляд тадн келҗәләт: Ю хәәҗ бидн Египетәс һарч йовсмб?»
21Моше келнә:
– Энд нанла хамдан 600 000 йовһн дәәч бәәнә. Теднд Та сардан күрх мах өгчәнәв гиҗәнәт! 22Кемр бод болн үүрмг малыг кевтнь алхла, тернь күртхий? Теңгст бәәх заһсиг цугтаһинь бәрҗ авхла, тернь күртхий?
23Болв Деед Эзн Мошед келв:
– Деед Эзнә һар күчн уга болхий? Нә, хәлә, Мини келсн үг күцхий аль угай!
24Моше һарад олн-әмтнд Деед Эзнә келсиг күргв. 70 медәтиг Моше хураһад Шатриг бүсләд зогстха гив. 25Деед Эзн үүләр бууһад Мошелә күүндв. Дарунь Моше деер буусн Сәкүснәс авад 70 медәтд өгв. Өгсн Сәкүсн медәтнр деер буухла, тедн әәлдсн үгмүд келҗәһәд зогсцхав.
26Бәәрнд бәәсн бийнь бас хойр күн деер Сәкүсн буув. Негнәннь нерн Элдад, хойрдгчнь – Медад. Тедн хоюрн медәтнрин тоод йовсмн, болв Шатр тал һарч ирсмн уга. Тегәд тедн бәәрн дотран әәлдслв. 27Нег зарц гүүҗ ирәд Мошед келнә:
– Элдад болн Медад бәәрндән әәлдслҗәнә!
28Баһ цагасн Мошед нөкд болҗасн Навина көвүн Ешуа хәәкрнә:
– Моше, мини нойн, тедниг тагчгртн гиҗ келтн!
29Болв Моше терүнд келнә:
– Эннь чи намаг хәәрлҗ харсчанчи? О, кемр Деед Эзнә әмтн цугтан әәлдсдг болсн болхнь! О, кемр Деед Эзн тедн деер Эврәннь Сәкүс буулһсн болхнь!
30Моше тегәд Израилин медәтнрлә хамдан бәәрн талан хәрү ирв.
Бөдн шовуд болн шууга татсн әмтиг засгллһн
31Деед Эзнә илгәсн салькн көдлв. Тер салькн теңгс талас бәәрнд бөдн шовуд авч ирв. Бәәриг эргүләд нег хонга өдрин хаалһин дуунад үзг болһн тал хойр тоха өндртән баг бөдн шовуд кевтнә. 32Әмтн тер шовудыг цуглулад авцхав. Кевтсн шовудыг әмтн тер өдртән, сөөни дуусн, маңһдур өдрин дуусн цуглулцхав. Күн болһн 10 хомерәс баһар авсн уга. Дәкәд бәәриг эргүләд бөдн шовуд тәвв. 33Болв тер махан җаҗлҗ, идҗ чиләһәд уга бәәтл, деерәснь Деед Эзн теднд цухлан буулһад зовлңтаһар алв. 34Тер ормиг Киврот-Таава#11:34 Киврот-Таава – еврей келәр эннь «юм һолдг әмтнә үкәр». гиҗ нерәдв. Яһад гихлә тенд юм һолдг әмтиг оршацхав.
35Киврот-Таавас Израилин улс Хацерот тал ирцхәв. Тенд тедн зогсцхав.
Currently Selected:
Әмтнә то авлһн 11: ХКО_ӘБ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
