Левит 5
5
1Кемр дор келгдх йовдлмудас көлтә күн гемшәгдҗәхлә:
– эс гиҗ юм үзсн болхла, эс гиҗ тер йовдлын тускар юм меддг болхла, болв герч күн гиһәд харалар әәлһәд зарһд дуудхла мел юм келсн уга болхла, учрсн йовдлын герчнь болад килнц һарһсн болхла;
2– кемр тер цевр биш юм көндәсн болхла, эс гиҗ бузр аңгин күш, эс гиҗ бузр малын күш, эс гиҗ үүрмг бузр адусдын күш медлго көндәһәд болв эврән бузрдхла;
3– кемр тер күүнә кир көндәсн болхла (ямаран чигн күүнд бәәдг кир көндәхлә), түрүләд терүг медлго, болв дәкәд медхлә;
4– кемр тер урдаснь ухаллго ю чигн кех болад андһар өгсн болхла – тернь хар саната эс гиҗ сән саната болв чигн (ухалл уга ямаран чигн андһар өгсн болхла, әмтнә өгдг андһар), түрүләд эннь ямаран чинртәһинь эс медҗәһәд, болв хөөннь медхлә, –
5тегәд эн йовдлмудас негхн гем һарһсн күн терүгән медәд келтхә, 6һарһсн йовдлын ормд Деед Эзнд цеврллһнә бәрц авч иртхә – хө эс гиҗ яма. Тегәд гелң терүн деер гемән хәрүллһнә авъяс күцәх, терүг килнцәс цеврлх.
7Кемр тер күн бәрц бәрхәр седхләрн хө эс авч ирҗ чадхла, Деед Эзнд эврәннь йовдлын ормд 2 көглҗрһн шову эс гиҗ 2 баахн көглҗрһн шову: негинь килнцәс цеврллһнә бәрц гиҗ, хойрдгчинь шатахин төлә авч иртхә. 8Теднән гелңд өгтхә. Тернь түрүләд цеврллһнә төлә авч ирсн шовуг автха, толһаһинь күзүнәснь салһлго мошктха. 9Тер цеврллһнә бәрцин цусар тәклин эрсиг будтха. Үлдсн цусинь тәклин ормин улд шувтлад һарһтха. Эннь килнцәс цеврллһнә бәрц. 10Дәкәд гелң хойрдгч шовуг шаталһна бәрцд дигтәһәр орулх. Тиигҗ гелң күүнә гемән хәрүллһнә авъяс күцәх. Терүг кесн килнцәснь цеврлх, тегәд эн күүнә гемнь тәвгдх.
11Кемр тер 2 көглҗрһн эс гиҗ 2 баахн көглҗрһн шову авч ирҗ эс чадхла, тиигхлә һарһсн йовдлын ормд ефән арвна нег хүв буудян цаһан һуйр авч ирәд цеврллһнә бәрцд орултха. Һуйрт олив тос бичә кетхә, ладан бичә цацтха. Эннь килнцәс цеврллһнә бәрц болҗана. 12Эврәннь бәрцән гелңд өгтхә, тернь нег атхм һуйриг бәрцин дееҗ гиһәд тәклин бәәрнд Деед Эзнә һалын бәрцтә хамднь шататха. Эннь килнцәс цеврллһнә бәрц.
13Тиигҗ гелң тер күүнә һарһсн геминь хәрүллһнә авъяс күцәх, эн күүнә гемнь тәвгдх. Үлдсн һуйр өдмгин бәрцлә әдл гелңгин болх.
Һару даалһна бәрц
14Деед Эзн Мошед келнә:
15– Кемр кен нег күн буру йовдл һарһхла, Деед Эзнә альк нег кешго әрүн юмиг зөрц биш кесн болхла, тиигхлә Деед Эзнд һаруднь эрмдг уга хуц өгтхә. Терүнә үннь әрүн бәәрнә цаһан мөңгн шекель күрх зөвтә. Тернь һару даалһна бәрц болх. 16Әрүн юмнд һару һарһсндан бас нег тавна хүвинь немәд цугтаһинь гелңд өгтхә. Тиигҗ гелң һару даалһна хуциг авад, тер күүнд гемән хәрүллһнә авъяс күцәтхә, тегәд эн күүнә гемнь тәвгдх.
17Кемр кен чигн килнц һарһхла – зөрц биш, медл уга Деед Эзнә зааврин негинь эвдхлә, тер күн гемтә болх. 18Тиигхлә һару даалһна төлә гелңд тер эрмдг уга хуц келсн үнләһән әдләр өгтхә. Гелң эн күүнд медл уга һарһсн гемән хәрүллһнә авъяс күцәтхә, тегәд эн күүнә гемнь тәвгдх. 19Эннь һаруһан даалһна бәрц: Деед Эзнә өмн кеҗәх күүнә һару даалһн болҗана.
Currently Selected:
Левит 5: ХКО_ӘБ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
