Левит 4
4
Килнцәс цеврллһнә бәрц
1Деед Эзн Мошед келнә:
2– Израилин улст соңсх: Деед Эзнә зааврин негинь кен чигн күн медлго эвдхлә, һарһшго юм һарһхла, иигҗ кех кергтә. 3Кемр тос түркүлсн ах гелң нег йовдл һарһад, терүнднь цуг әмтн гемшәгдҗәхлә, тиигхлә тер гелң Деед Эзнд килнцәс цеврллһнә бәрц гиһәд эрмдг уга бүрү мал авч иртхә. 4Бүрүг авч ирәд Харһлтын Шатрин үүднд Деед Эзнә өмн зогсатха. Дәкәд һаран бүрүһин толһа деер тәвәд Деед Эзнә өмн алтха. 5Тос түркүлсн ах гелң бүрүһин цусиг кеҗ авад Харһлтын Шатрт орултха. 6Тер цуснд хурһан норһад Деед Эзнә өмн, әрүн бәәрнә көшгин өмн дола дәкҗ цацл цацтха. 7Харһлтын Шатр дотр Деед Эзнә өмн бәәх күҗ уңһдадг тәклин ширән өвртнь бас цус түрктхә. Үлдсн цусинь Харһлтын Шатрин үүднд бәәх тәкл шатадг ормин улд асхтха. 8Цеврллһнә бәрц бәрҗәх бүрүһин өөкинь кевтнь – дотркинь ораҗах болн хаҗуднь бәәх өөкиг – автха. 9Хойр бөөринь болн терүн деернь ташан хаҗуд бәәх терүн деерк өөкинь, элкнә семҗиг керчҗ авх кергтә (терүг бөөртә хамднь суһлҗ авх). 10Эвцлһнә бәрц бәрҗәх бухиг тиигҗ эвтәлх кергтә болҗана. Тегәд гелң эн тоотыг цугтаһинь тәкл шатадг ормд шататха. 11Бүрүһин арсинь болн терүнә бүкл махинь толһатаһинь, көлтә-шииртәһинь, дотрктаһинь болн киртә кевтнь – 12бүрүһәс үлдсинь цугтаһинь – бәәрнәс һазаран үмс асхдг цевр ормд һарһад модн түлән деер тәвәд шатах кергтә. Эдниг цугтаһинь үмс асхдг ормд шатахмн болҗана.
13Израилин улсин хамцан ямаран чигн йовдл эндүһәр һарһсмн болхла, терүг эс медсн болхла – кемр тедн Деед Эзнә ямаран чигн заквр эвдхлә, буру йовдлыг хамцан даахмн болҗана. 14Теднд буру йовдл һарһсинь заагдх. Тегәд хамцан килнцәс цеврллһнә бәрц бәрхин төлә бүрү мал авч ирәд Харһлтын Шатрин өмн зогсатха. 15Хамцана ахлачнр Деед Эзнә өмн бүрүһин толһа деер һаран тәвәд Терүнә өмн алтха. 16Тос түркүлсн ах гелң бүрүһин цусиг Харһлтын Шатрт орулад, 17хурһан цусар норһад, дола дәкҗ Деед Эзнә өмн, көшгин өмн цацл цацтха. 18Харһлтын Шатрт Деед Эзнә өмн бәәх күҗ уңһдах ширән өвринь цусар будтха. Үлдсн цусиг Шатрин үүднд бәәх тәкл шатадг ормин улд асхтха. 19Бүрүһәс бәәсн өөкинь кевтнь һарһҗ авад терүг тәклин ормд шатах кергтә. 20Цеврллһнә бәрцд орулҗах бүрү малын бәрциг күцднь күцәхмн болҗана. Тиигҗ гелң терүн деер гемән хәрүллһнә авъяс кеҗәнә. Тегәд цуг хамцана килнцнь тәвгдҗәнә. 21Бүрүһин бүкл махинь күүнә бәәрнәс һарһад, өмнкләһән әдләр шатах кергтә. Эннь хамцана төлә кеҗәх килнцәс цеврллһнә бәрц.
22Кемр һардач килнц һарһхла, кемр тер зөрц биш Деед Эзнә заавр эвдхлә, тер гемтә болхла, 23эс гиҗ терүнә һарһсн буруһинь заахла – тиигхлә тер күн эрмдг уга тек авч иртхә. 24Текин толһа деер тер һардач һаран тәвәд, Деед Эзнә өмн шаталһна тәкл тәкдг ормин хаҗуд алтха. Эннь килнцәс цеврллһнә бәрц болҗана. 25Тегәд гелң хурһан эн бәрцин цуснд норһад шатадг тәклин өвринь цусар будтха. Үлдсн цусинь тәклин ормин улд асхтха. 26Текин өөкинь кевтнь тәклин орм деер эвцлһнә бәрц кевтә шатах кергтә. Тиигҗ гелң терүн деер гемән хәрүллһнә авъяс кеҗәнә. Һардач гемән хәрүллһнә авъяс күцәһәд буруһас тәвгднә.
27Кемр эгл әмтнәс кен-негнь зөрц биш йовдл һарһхла – Деед Эзнә ямаран чигн заавр эвдхлә – тер бурута болад, 28эс гиҗ терүнд буру йовдл һарһсинь заахла, тиигхлә эрмдг уга яма авч иртхә. 29Тегәд тер килнцәс цеврллһнә бәрцин толһа деер һаран тәвәд шишлң бәрц шатадг тәклин ормд алтха. 30Дарунь гелң хурһан цуснд норһад шатадг тәклин өвринь цусар будтха. Үлдсн цусинь тәклин ормин улд асхтха. 31Эвцлһнә бәрцәс авчах кевтә өөкинь цугтаһинь автха. Тер өөкиг гелң тәклин ормд шататха. Эннь Деед Эзнд таасгдх каңкнсн үнр болх. Тиигҗ гелң килнцтә күн деер гемән хәрүллһнә авъяс кеҗәнә. Эн күүнә килнцнь тәвгдҗәнә.
32Кемр эн күн килнцәс цеврллһнә бәрцән хөөнә сүргәс бәрхәр седҗәхлә, тиигхлә эрмдг уга хө авч иртхә. 33Тегәд цеврллһнә бәрцин толһа деернь һаран тәвәд шатадг тәклин ормд алтха. 34Гелң хурһан бәрцин цуснд норһад шатадг тәклин өвринь будтха. Үлдсн цусинь тәклин ормин улд асхтха. 35Өөкинь кевтнь, эвцлһнә бәрцд орулҗах хөөнәс авчах кевтә, һарһҗ авх кергтә. Тегәд гелң тер өөкиг тәклин бәәрнд Деед Эзнд нерәдсн һалын бәрцлә хамднь шататха. Тиигҗ гелң гемән хәрүллһнә авъяс тер күн деер кех. Иигҗ күүнә килнцнь тәвгдҗәнә.
Currently Selected:
Левит 4: ХКО_ӘБ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
