Левит 21
21
Гелңгүдин шишлң диг-даран
1Деед Эзн Мошед келнә:
– Гелңгүд болҗах Ахарона көвүдт соңсхад кел: «Өңгрсн төрл талан өөрдҗ гелң бийән бузрдашго болҗана. 2Зуг кемр хамгин өөрхн улс болхлаг – эк, эцк, көвүн, күүкн, ах-дү, 3эс гиҗ терүнлә бәәх мордад уга күүкнә эгч-дүнь болхла өөрдҗ болҗана. 4Гелң бийән талдан төрл-саднас көлтә бузрдаһад цевр биш болшго юмн.
5Үксн күүнд һундлан һарһҗ гелңгүд бичә толһаннь үсән хәәчлтхә, сахлыннь үзүринь бичә керчтхә, махмудтан сөрв бичә һарһтха. 6Тедн эврәннь Бурхна әрүн улс болх зөвтә, эврәннь Бурхна нериг бичә һутатха. Тедн Деед Эзнд тәклин ормд бәрцән авч ирцхәнә, Бурхндан хотынь авч ирцхәнә. Тедн әрүн болх зөвтә.
7Тедн эврәннь Бурхна әрүн улс. Тегәд тедн гер авхларн, аля күүкд кү эс гиҗ му нертә гергиг, залуһасн салсн гергиг авх зөв уга. 8Гелңгин әрүниг бәрҗ хәлә. Тер чини Бурхна төлә тәкл тәкдг ормд бәрц авч ирнм. Чамд тер әрүн болтха, яһад гихлә Би әрүнв, Деед Эзн – тадна әрүн бәәдлин булг.
9Кемр гелңгин күүкн аля һарһад, бийән бузрдахла, эцкдән тер му нер өгчәнә. Тиим күүкиг шатах кергтә.
Ах гелңгин диг-даран
10Ахнр-дүүнр дундас толһадан тос түркүлсн, гелңгин нер зүүсн ахнь әрүн хувц өмсҗ чадҗана. Тиим күн үксн төрлдән һундлан һарһҗ арзасн үстә йовшго, деерк хувцан шуулшго болҗана. 11Өңгрсн күн кевтх орм тал гелң оршго болҗана. Нам эцк-экин төлә чигн бийән бузрдашго юмн. 12Әрүн бәәрнәс һарх зөв уга. Эврә Бурхна әрүн орм бузрдашго болҗана. Яһад гихлә терүнд нерәдлһ кесмн болҗана – терүнә Бурхнас тосн түркгдсмн. Би – Деед Эзн.
13Тиим гелң зуг гиҗгтә күүк авх. 14Белвсн герг авч чадшго. Салсн, му нертә эс гиҗ аля герг мордулҗ авшго. Зуг тер эврәннь тохмас гиҗгтә күүк буулһҗ авч чадҗана. 15Тегәд тиим гелң эврәннь хөөт үйнрән бузрдашго, эврәннь тохман бузрдашго болҗана. Яһад гихлә Би – Деед Эзн, терүнә әрүн булг».
Гелңгүдин цогц-махмудт эрмдг уга болх зөвтә
16Деед Эзн Мошед келнә:
17– Ахаронд кел: «Терүнә хөөт үйнр кемр цогц-махмудтан альк чигн цагтан эрмдгтә болхла, тәкл тәкдг орм тал эврәннь Бурхнд нерәдҗ хот авч ирҗ чадшго юмн. 18Цогц-махмудтан сөрвтә күн: кемр сохр, доһлң, чирәнь коочисн, кольчхр көлтә, кольчхр һарта болхла бәрц бәршго болҗана. 19Хамхрха көлтә эс гиҗ хамхрха һарта, 20бөгчхр нурһта, маштг күн, нүдндән хорһта күн, цогцдан бүрлдлһтә эс гиҗ шархта, бөөсгтән эрмдгтә күн Нанд гелңлә әдл көдлшго болҗана. 21Ахарона хөөт үйнр цогц-махмудтан сөрвтә болхла, Деед Эзнд һалын бәрц гиҗ белг авч иршго юмн. Эрмдгтә күн тәклин ормд эврәннь Бурхнд гиҗ хот авч ирх зөв уга. 22Зуг тиим күн эврәннь Бурхнд нерәдсн хот идҗ чадҗана – әрүнәс әрүнинь болн әрүн бәәрнә хот. 23Болв тиим күн көшг тал болн тәклин орм тал өөрдшго болҗана. Терүнә цогц-махмудтнь сөрв бәәнә. Мини әрүн ормиг бичә тер бузрдатха. Яһад гихлә Би – Деед Эзн, теднә әрүн бәәдлин булгнь болҗанав».
24Моше энүг Ахаронд болн терүнә көвүдт, Израилин улст цугтаднь келүлв.
Currently Selected:
Левит 21: ХКО_ӘБ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
