Левит 17
17
Израилин улсин бәәрнәс талдан һазрт мал алгдшго
1Деед Эзн Мошед келнә:
2– Ахаронд, терүнә көвүдт болн Израилин улст цугтаднь Деед Эзнә заавр иим гиһәд кел: 3«Кемр кен чигн күн Израилин әмтн дундас бухиг, хөөг эс гиҗ ямаг бәәх бәәрн дотр, эс гиҗ һазань алхлаг, 4һарсн малын цусн эн күүг гемшәх. Эн цус асхв, тегәд эн эврәннь келн-улс дундас уга кегдх. Яһад гихлә тер малыг Харһлтын Шатрин үүднд, Деед Эзнә өргә герин өмн, Деед Эзнд бәрц бәрхмн билә. 5Теегт ода алҗах малмудыг Израилин улс Деед Эзн тал Харһлтын Шатрин үүднд гелңд авч иртхә. Тегәд тенд Деед Эзнд бәрҗәх эвцлһнә бәрц гиҗ алтха. 6Харһлтын Шатрин үүднд бәәх тәкл тәкдг ормд малын цусиг гелң цацтха. Өөкинь шататха. Эннь каңкнсн үнр болх, Деед Эзнд таасгдх. 7Дәкҗ текин бәәдлтә кегдлмүдт бичә бәрц бәртхә, теднд бичә шүттхә! Израилин улст мөңкинд өгчәх зокал эн. Үйәс үй һатлад терүг күцәтхә».
8-9Бас теднд кел: «Израилин улсин кен-негнь, эс гиҗ тедн дунд бәәх нүүҗ ирсн әмтн Харһлтын Шатрин үүднд Деед Эзнд өргдг бәрцин ормд биш, талдан һазрт шаталһна авъяс кеһәд, эс гиҗ эвцлһнә бәрц бәрхлә, тиигхлә тер күн эврәннь келн-улс дундас уга кегдх.
Цусн хотд орулҗ идгдшго
10Кемр Израилин улсин кен чигн, эс гиҗ тедн дунд нүүҗ ирсн әмтн цусар хот кеҗ идхлә, тиигхлә Би эврәннь цухлыг тиим күүнд һарһхув. Терүг эврә келн-улс дундас уга кехүв. 11Яһад гихлә әмд юмна җирһлнь цуснднь бәәнә. Гемән хәрүллһнә авъяс күцәхләрн, малын цусиг тәкл тәкдг ормд авч иртхә гиҗ заалав. Ямаран чигн әмд юмна җирһл – цуснд, тернь күүнә һарһсн гем хәрүлнә. 12Тегәд Би Израилин улст келләв: „Таднас нег чигн күн болн тедн дунд бәәх нүүҗ ирсн әмтн цусиг хотдан орулҗ идшго юмн“.
13Кемр Израилин улсин кен чигн, эс гиҗ тедн дунд бәәх нүүҗ ирсн әмтн аңһучлҗ йовад иддг аң, аль шову хаҗ авсмн болхла, тиигхлә теднәннь цусинь асхад элсәр булхмн болҗана. 14Ямаран чигн әмд юмна җирһлнь цуснднь бәәнә. Цусар әмд йовҗана. Тегәд чигн Би Израилин улст келләв: „Әмд юмсин цус бичә хотдан орултн. Цусн ямаран чигн әмд юмсин җирһлнь болҗана. Хотдан цус орулад идҗәх күн алгдх“.
15Ямаран чигн күн – бәәрн болну, нүүҗ ирсн болну – үксн малын мах, эс гиҗ зерлг аңгудт шуучгдад алгдсн малын мах идсн болхла, тер күн хувцан уһах зөвтә, бийән уһах зөвтә. Тер күн асхн күртл бузр болх, дәкәд цеврдх. 16Болв кемр тер хувцан болн бийән эс уһахла, тер күн бурута болх».
Currently Selected:
Левит 17: ХКО_ӘБ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
