Левит 1
1
Шаталһна бәрцин тускар
1Харһлтын Шатрас Деед Эзн Мошег дуудад иигҗ терүнд келнә:
2– Кемр кен-негнь Деед Эзнд бәрц бәрхәр седхлә, тиигхлә гертән бәәсн бод малар чигн, үүрмг малар чигн кеҗ чадҗана. Энүнә тускар Израилин көвүдт соңсхад кел.
3Кемр тер шаталһна бәрцән бод малар кеҗәхлә, тиигхлә эрмдг уга бүрү авх йоста. Терүг Деед Эзнд таасгддгар Харһлтын Шатрин өмн зогсатха. 4Бәрц бәрҗәх күн гемән хәрүлдгәр, тер бәрцнь Деед Эзнд таасгддгар бүрүһин толһад һаран тәвтхә. 5Бүрүг Деед Эзнә өмн алтха. Гелңгүд болҗах Ахарона хөөт үйнр, бәрцин цусиг Харһлтын Шатрин үүднд бәәх тәкл тәкдг ормд эргүләд цацтха. 6Шатагдх бәрцин арсинь шувтлад, махинь әңгләд чавчх кергтә. 7Ахарон гелңгин хөөт үйнр тәклин ормд һал шатаһад түлә тәвтхә. 8Гелңгүд болҗах Ахарона хөөт үйнр, бәрцин зәрм әңгинь, толһатаһинь болн өөктәһинь, тәклин ормд, шатчах түләнә модн деер тәвтхә. 9Бүрүһин дотринь болн көл-туруһинь уснд уһах кергтә. Эдниг гелң цугтаһинь тәкл тәкдг орм деер шататха. Эннь цугтан шаталһна бәрц болҗана, Деед Эзнд һалын бәрц, каңкнсн үнр Терүнд таасгдна.
10Кемр кен-негнь үүрмг малар – хөөһәр эс гиҗ ямаһар – бәрц бәрхәр авч ирхлә, тиигхлә тер хуциг эс гиҗ текиг эрмдг угаһаснь авх йоста. 11Терүг Деед Эзнә өмн тәклин ормин ар үзг талнь алтха. Гелңгүд болҗах Ахарона хөөт үйнр тәклин ормд эргүләд бәрцин цусиг цацтха. 12Алгдсн малыг әңгләд, чавчад, толһаһинь болн өөкинь салһх кергтә. Эдниг цугтаһинь гелң тәклин ормд, шатҗах түләнә модн деер тәвтхә. 13Бәрцин дотринь болн көл-туруһинь уснд уһах кергтә. Тегәд гелң бәрцән бәрәд цугтаһинь тәклин ормд шататха. Эн цугтаһинь шаталһн Деед Эзнд һалын бәрц, каңкнсн үнр Терүнд таасгдна.
14Кемр кен-негнь Деед Эзнд шаталһна бәрцд шову авч ирхлә, тиигхлә бәрцән көглҗрһн эс гиҗ баахн көглҗрһн шовудар кехмн болҗана. 15Гелң шовуг тәкл тәкдг орм тал авч ирәд, күзүһинь мошкад, толһаһинь тенд шатах йоста. Шовуна цусинь тәклин эрс деернь шахад һарһтха. 16Терүг өрвлгәснь бәрәд, цогцаснь киртә ар бийинь таслҗ уга кеһәд, тәклин үмс асхдг зүн үзг тал хайтха. 17Далвагаснь бәрәд цогцинь әрә шуулг (болв әңгләд шуулхмн биш). Терүг гелң тәкл тәкдг ормд шатчах модн деер шататха. Эннь цугтаһинь шаталһн Деед Эзнд һалын бәрц, каңкнсн үнр Терүнд таасгдна.
Currently Selected:
Левит 1: ХКО_ӘБ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
