Нүүдл 21

Еврей мухласин тускар

1Израилин улст өгх йоста закад бас иим:

2Кемр чи мухла кехәр еврей күүг хулдҗ авсн болхла, тер чамд зурһан җилдән көдлтхә, болв доладгч җилднь мөңгн угаһар сулдхгдад йовтха. 3Кемр тер һанцарн ирсн болхла, һанцарн йовтха. Болв гергтәһән ирсн болхла, терүнлә хамдан гергнь бас йовтха. 4Кемр эзнь терүнд герг өгснә хөөн терүнәс күүкд һарсн болхлаг, тиигхлә гергн күүкдтәһән эзнднь үлдтхә. Мухла залу һанцарн йовтха. 5Кемр мухла иигҗ келхлә: «Би эзндән, гергндән, күүкдтән дуртав, сулдхвр керго», – 6тиигхлә эзнь терүг Бурхнд мөргдг орм тал өөрдүлг. Дәкәд терүг үүдн тал өөрдүлг, эс гиҗ үүднә мөр тал өөрдүләд шөвгәр чикинь хатхтха. Тегәд тернь мөңкинд эзнәннь мухла болх.

7Кемр нег күн эврәннь күүкән мухла болтха гиһәд талдан күүнд хулдсн болхла, тиигхлә тер эзнәсн мухла залусла әдл сулдҗ һарч чадшго. Эзнәсн зуг мухла залу күн сулдҗ чадх. 8Кемр тер эзндән эс таасгдхла, тиигхлә тер мухла күүкиг хулдҗ авх зөв өгтхә, яһад гихлә эзн терүгәр гергән кехәр бәәсмн. Талдан күүнд тер күүкиг хулдшго, яһад гихлә терүг һазалв. 9Кемр эзн тер күүкиг көвүндән авч өгхәр седҗәсн болхла, тиигхлә эврә үрнләһән әдләр терүг хәләтхә. 10Кемр эзн бийдән талдан герг авхла, тиигхлә терүнд урдк хот, хувц болн герт нег орм батлад өгтхә. 11Болв кемр эзн тер һурвн юм эс өгхәр седхлә, тиигхлә мухла күүкн мөңг өглго йовҗ чадҗана.

Аллһна болн махмудын сөрвин тускар

12Кемр күүг кен-негнь цокхла, цокулсн күн үкхлә, цоксн күн алгдх йоста.

13Кемр цоксн күн алхар эс седҗәсн болхла (тиим юмн Бурхн Эврәннь седвәрәр учрасмн болхлаг), тер бийдән хорһдх орм олҗ чадх; Би танд тиим орм заасув. 14Кемр тер өөрхн күүһән зөрц алсн болхла, алтн терүг. Мини тәкл тәкдг ормин хаҗуд харслт хәәв чигн алтн.

15Эцкән болн экән цоксн күн алгдх йоста.

16Кен чигн күн кү хулхалад терүг хулдхла (эс гиҗ хулхалсиг терүнд олҗ авхла) алгдх йоста.

17Кемр кен чигн күн эцкән эс гиҗ экән му келхлә, алгдх йоста.

18Кемр цүүгҗәһәд нег күн негән чолуһар эс гиҗ нудрмарн цоксн болхлаг, болв цокулсн күн гемтәд чигн әмд үлдсн болхла, 19дәкәд босад тайг түшәд гертәсн һардг болсн болхла, тиигхлә цоксн күүг засглшго: тер күн гемнсн цагиннь мөңгинь өгх, эмнлһнднь дөң болх.

20Кемр эзн мухла залуг эс гиҗ мухла күүкд күүг модар цокхла, тернь дор ормдан үкхләг, эзнәс эн үклин ялынь авх кергтә. 21Кемр тер мухла цокулсна хөөн нег эс гиҗ хойр өдртән әмд бәәсн болхла, үкснә ялынь некх керг уга. Яһад гихлә мухла – эзнә өлг-эд.

22Кемр залус ноолдҗаһад саата күүкд күүг көндәхлә, зуурм нилх һарад бийнь эс үкхлә, тиигхлә бурута күн зуурм һарсн нилхин ял мөңгәр өгтхә. Зарһчнрин орлцлһтаһар тер гергнә залу сурсарнь өгтхә. 23Кемр тер саата күүкд күн үкхлә, тиигхлә чи иигҗ өгх йостач: әмн әмәр һарх, 24нүдән нүднә ормд өгх, шүдән шүднә ормд өгх, һаран һарин ормд өгх, көлән көлин ормд өгх, 25шатасн махмуд шатсна ормд өгх, шав шавин ормд, өвдкәлһн өвдкәлһнә ормд.

26Кемр эзн мухла залуг эс гихлә мухла күүкд күүг цокад нүдинь өвдкәхлә, тер нүднәс көлтә тедниг бийәсн сулдхх зөвтә. 27Кемр эзн ялч залуг эс гиҗ ялч күүкд күүг цокад шүдинь уңһахла, тер шүднәс көлтә мухласиг сулдхх зөвтә.

28Кемр залу күүг эс гихлә күүкд күүг бух мөргәд алхла, тер бухиг чолуһар шивәд алх кергтә. Терүнә махинь идҗ болшго. Бухин эзн ял даашго. 29Болв кемр бух урднь чигн мөргдг бәәсн бийнь эзнднь келҗәхлә, тер малан эс хәләҗәсәр кү мөргәд алхла, бухиг чолуһар шивәд алх кергтә. Эзинь бас алх йоста. 30Кемр эзиг мөңгнә ялд уңһахла, тиигхлә тер кергтә мөңгинь өгәд әмән хулдҗ авх. 31Эзнә бух өрк-бүлин толһалгч күүнә көвүһинь эс гихлә күүкинь мөргхлә, тиим кевәр бас кех кергтә.

32Кемр мухла залу күүг эс гихлә мухла күүкд күүг бух мөргхлә, бухин эзн мухласин эзнд 30 цаһан мөңгн шекель#21:32 Шекель – еврей келн-улсин чиңнүрәр 11,5 грамм. өгх йоста. Тер бухиг чолуһар шивәд алхмн болҗана.

33Кемр эзн күн ус бәрдг нүкиг секәтәһәр үлдәһәд эс гиҗ нүк малтхларн терүгән эс хаахла, терүнднь бух, элҗгн чигн унхлаг, 34тиигхлә нүкнә эзн күн малын мөңгинь өгх йоста, бүкл махинь бийдән автха.

35Кемр бух талдан күүнә бухиг мөргәд алхла, тиигхлә теднә эздүд әмд бухинь хулдад, авсн мөңгинь болн бүкл махинь хоорндан әдләр хуватха. 36Кемр бухнь өмннь чигн мөргдгинь меддг бәәсн болхла, тиигхлә малан эс хәләҗәсн эзн ялынь даатха: бухин ормд бух өгтхә. Бухин бүкл махинь эврән автха.

Currently Selected:

Нүүдл 21: ХКО_ӘБ

Highlight

Copy