Нүүдл 20

Арвн Заавр

1Бурхна келсн үгмүд иим:

2– Би Деед Эзн, чамаг Египетәс, мухласин һазрас һарһсн чини Бурхн.

3Чамд Нанас талдан бурхд уга болх зөвтә.

4Деер теңгрт эс гиҗ дора һазрт, эс гиҗ һазрас дор уснд бәәдг юуна чигн бәәдлтә шүтә бийдән бичә ке. 5Эднд бичә мөрг болн бичә шүт, юңгад гихлә Би, Деед Эзн, чини Бурхн, – хару Бурхн мөн. Нанд дурго болҗасн эцкнрин килнцәс көлтә, Би эднә үрдинь һурвдгч болн дөрвдгч үй күртлнь цааҗлнав. 6Болв Нанд дурлдг болн Мини заавриг күцәдг әмтнә төлә – Би миңһдгч үйд чигн, эднә хөөт үрдт чигн хәәрлтән күргҗәнәв!

7Деед Эзнә, чини Бурхна, нериг хара зөңдән бичә кел. Хара зөңдән Энүнә нериг келсн күүг Деед Эзн засгллго бәәшго.

8Бемб өдриг тодлад авчк, әрүнәр терүг бәр. 9Зурһан өдртән көдләд, цуг кергүдән күцә, 10доладгч өдр – бемб өдр: эн Деед Эзнә, чини Бурхна өдр. Эн өдр кен чигн көдлх зөв уга – чамд, чини көвүнд, күүкнд, чини мухла залуд, мухла күүкд күүнд, чини малд, чини балһсдт бәәдг нүүҗ ирсн күүнд бас әрүн өдр. 11Юңгад гихлә зурһан өдртән Деед Эзн теңгриг, һазриг болн теңгсиг – эдниг дүүргҗәх хамг тоотыг үүдәсмн, доладгч өдрт болхла амр-таварн бәәв. Тегәд чигн Деед Эзн бемб өдриг йөрәһәд, энүг әрүн чинртә кев.

12Чамд Деед Эзн – чини Бурхн белглсн һазрт җирһлчн ут болхин төлә эцкән болн экән күндл.

13Бичә кү ал.

14Бичә авалясн талдан күүнлә оралд.

15Бичә хулха ке.

16Өөрхн улсин тускар худл герч бичә бол.

17Күүнә герт, күүнә гергнд, күүнә мухла залуст болн мухла күүкд улст, күүнә бухмудт болн элҗгүдт – күүнә юмнд бичә дуран күрг.

18Цуг улс оһтрһуг болн һал цәкллһиг, бүрән әәг болн утан һарчах уулыг үзәд соңсв. Әмтн үүмлдәд, хооран һарад зогсв.

19– Маднла чи күүнд, – гиҗ эдн Мошед келв. – Бидн чамаг соңснавидн. Бурхн маднла бичә күүндтхә эс гиҗ бидн үкхвидн.

20– Бичә әәтн, – гиҗ Моше хәрү өгв. – Бурхн тадниг сөрхәр болн Терүнәс әәһәд иргчдән килнц бичә һарһтха гиһәд ирв.

21Әмтн холд зогсхла, Моше болхла Бурхна бәәсн харлсн нигт үүлнд өөрдв.

Шүтәнә болн тәклин ормин тускар

22Деед Эзн Мошед закв:

– Израилин улст кел: «Теңгрәс Би таднд дуудвр кесиг тадн үзләт. 23Нанла зерглҗ талдан бурхд бичә кетн! Бийдән цаһан мөңгн болн алтн бурхд бичә кетн! 24Нанд һазрар тәклин ормиг босхад, терүн деер һал шаталһна болн эвцлһнә бәрц бәрлһнә төлә бас – чини сүргәс үүрмг болн бод мал авч ир. Би Эврәннь нерән һарһсн ямр чигн ормд Би чам тал ирәд, чамаг йөрәхүв. 25Кемр Мини төлә чолуһар тәклин ормиг босххларн, өөһинь авсн чолуг бичә олзл: чолуна өөһинь хурц төмрәр авхларн чи тәклин ормиг бузрдахич. 26Чини чир нүцкн бәәдл үзгдшгон төләд Мини тәкл тәклһнә ормин давшурар деегшән бичә өөдләд һар!»

Currently Selected:

Нүүдл 20: ХКО_ӘБ

Highlight

Copy